Ölkə futbolu
"Keşlə"nin yeni baş məşqçisi: pedaqoq, yoxsa boksçu?
“Keşlə”nin həftəsonu yeni müqavilə bağlayacağ?…
“Keşlə”nin həftəsonu yeni müqavilə bağlayacağı ukraynalı məşqçi Yuri Maksimov futbolçu karyerasında da ölkə xaricinə çıxmaq imkanı qazanıb. Futbolinfo.az saytı xəbər verir ki, sabiq yarımmüdafiəçinin 1997-ci ildə Kiyev “Dinamo”sunu “Verder”ə dəyişməsi heç də birmənalı qarşılanmayıb.
Maksimovun bu addımına Ukrayna klubunun rəhbərliyindən çox bir nəfər qəzəblənib. Söhbət əfsanəvi məşqçi, həmin vaxt “Dinamo”nu çalışdıran Valeri Lobanovskidən gedir. Mərhum mütəxəssis nə qədər çalışsa da, Maksimovu fikrindən daşındıra bilməyib. “Keşlə”nin yeni baş məşqçisi illər sonra müsahibəsində həmin dövrü yada salaraq, Lobanovskinin onu heç vaxt bağışlamadığını bildirib: “Dinamo”da pis maaş almırdım. Sadəcə, özümü Avropada sınamaq, yeni macəra yaşamaq istəyirdim. Buna görə də, “Verder”ə keçdim. Bundesliqa nağıllar aləmidi. Orda oyunların keçirildiyi şənbə və bazar günləri əsl bayram idi. Həm azarkeşlər, həm də futbolçular matç gününü gözləyirdilər. Tomas Şaaf, Feliks Maqat kimi məşqçilərlə çalışdım. Maqat intizam baxımından Lobanovskidən geri qalmırdı. Yadımdadı, o gələndən sonra səhər saat 6-da yuxudan durub, meşədə qaçırdıq. Halbuki, orda üfunətdən durmaq olmurdu, meşə qabanlarla dolu idi. Hətta hava qaralandan sonra da bizdən qaçmaq tələb olunurdu. Lobanovski ilə çalışdığım vaxt belə şeyləri gördüyümdən, digər futbolçularla müqayisədə mənə nisbətən asan gəlirdi. “Dinamo”dan getdiyimi biləndə ən çox Lobanovski əsəbləşmişdi. Məşqdən sonra mənimlə danışdı. Dedi ki, hara gedirsən, sən mənə lazımsan. Mən isə nə vaxta qədər Ukraynada oynayacağımı soruşaraq, özümü Avropada yoxlamaq istədiyimi bildirdim. Lobanovski buna görə məni heç vaxt bağışlamadı”.
37 yaşında futbolçu karyerasını bitirən Maksimov dərhal məşqçilik fəaliyyətinə başlayıb. Qısa müddət Minsk “Dinamo”sunda köməkçi məşqçi kimi çalışan ukraynalı daha sonra baş məşqçiliyə start verib. Kiyev MOİK-i, “Obolon”, “Krivbas” və “Metallurq”un ardınca “Mordoviya”nın “sükanı arxası”na keçib. Lakin Saransk klubundakı fəaliyyəti də uzun çəkməyib. “Mordoviya”dan ayrılması haqda danışan Maksimov bunu həmin vaxt Rusiya və Ukrayna arasında siyasi münasibətlərin gərginləşməsi ilə əlaqələndirib: “Müharibə başladığı üçün biz qovulduq. Hər şey buna doğru gedirdi, üzərimizdə təzyiq var idi. Son vaxtlar Rusiyaya uçmaq belə, çətinləşmişdi. Bilmirəm, bəlkə də yerimə başqa məşqçi gətirmək istəyirdilər? Komandanı Premyer Liqaya çıxaranda şəhərin meri məni təbrik etmişdi. Amma bir neçə gün sonra zəng edib qovulduğumu dedilər. Müqaviləmizə əsasən, almalı olduğum növbəti 6 ayın maaşını verib, yola saldılar”.
Ukrayna yığmasında 27 oyun keçirmiş Maksimovu Rusiya çempionatının hazırkı səviyyəsi razı salmır. O, açıqlamasında bu ölkədə çıxış edən futbolçuların göstərdikləri oyuna görə qat-qat çox pul qazandıqlarını bildirib: “Rusiyada futbolçular, demək olar ki, heç nə etmirlər, amma pul alırlar. Buna görə də, ölkə xaricinə tək-tük oyunçu yollanır. Çünki xaricdə milyonları qazanmaq üçün əziyyət çəkmək lazımdı. Rusiya çempionatında tək ayaqla da oynamaq və Almaniyadakından çox pul almar olar. MOİK-in qapıçısı İqor Akinfeyev Çempionlar Liqasında nə qədər səhv buraxır? Amma yenə də onun yerinə başqa qapıçı yoxlanılmır”.
“Mordoviya”dan ayrıldıqdan sonra işsiz qalan Maksimov 2 il sonra Qazaxıstandan təklif alıb. Yeni macəra yaşamaq həvəsində olan məşqçi bu təklifi də qəbul edib. Lakin “Taraz”dakı fəaliyyəti də uğurlu alınmayıb: “Qazaxıstanda çalışmaq mənə maraqlı gəldiyi üçün bu ölkəyə getməyə razılıq verdim. Nədən qorxmalıydım? Yeni çağırışlardan heç vaxt çəkinmirəm. Mövsümün qızğın vaxtında “Taraz”a getdim, komanda sonuncu pillədə qərarlaşmışdı. “Taraz”a güclü futbolçular dəvət etmək çox çətin idi. Buna görə də, gətirə bildiklərimizi gətirdik. Hətta barlardan yığışmayanlara da futbola qayıtmaq şansı yaratdıq. Amma bəziləri özlərini göstərə bilmədilər. Həlledici oyunlarda məğlubiyyətlə üzləşəndə elə əsəbləşirdim ki, futbolçuların üzünə baxmaq istəmirdim. Onu da deyim ki, Qazaxıstan çempionatı asan liqa deyil. Mən heç vaxt işdən qaçmıram. Amma orda uğur qazanmaq çətin idi və bunun öz səbəbləri var. Həmin səbəbləri açıqlamaq istəmirəm”.
Maksimov məşqçilik karyerasında ən çox futbolçusu ilə əlbəyaxa olması ilə diqqət mərkəzinə düşüb. Bu, “Taraz”da işlədiyi vaxt baş verib. Özünün dəvət etdiyi Azərbaycan əsilli, ukraynalı futbolçu Aleksandr Əliyevlə arasındakı problem dava ilə nəticələnib. İnsident komandanın gözü qarşısında, səfər oyununa gedərkən hava limanında yaşanıb. Maksimov gecikdiyi üçün Əliyevə etirazını bildirib, o isə cavab qaytarıb. Yekunda baş məşqçi və futbolçu əlbəyaxa davaya çıxıblar. Bundan sonra Əliyev klubdan göndərilib.
Maksimov açıqlamasında davanı təkzib etsə də, yetirməsindən razı qalmadığını gizlətməyib: “Əliyevlə dalaşmışıq? İlk dəfə sizdən eşidirəm. Yalnız onu deyə bilərəm ki, Saşaya həyatında daha bir şans vermək istədim. Ondan özünü sakit aparmasını, səhvləri təkrarlamamasını xahiş etdim. Amma hər şey başqa cür alındı”.
İnsidentlə bağlı danışan “Taraz”ın qapıçılarla işləyən sabiq məşqçisi Miroslav Radovanoviç isə davanı təsdiqləməklə yanaşı, Maksimovun futbolçunu vurduğunu açıqlayıb: “Bunu mənə Saşa dedi. Baş məşqçi hava limanında, özü də kameraların qarşısında Əliyevi iki dəfə vurub. Onlar arasında dava avtobusun qarşısında da olmuşdu. Əliyev bundan sonra taksiyə əyləşərək, Taraza getmişdi. Görün, Maksimov necə məşqçidi? O, pedaqoq olmalıdı, boksçu yox. Futbolçunu vurmaq yox, cərimələmək olar. Məşqçilik karyeram ərzində öz köməkçilərinə və futbolçularına bu cür yanaşan ikinci adam görməmişəm”.
48 yaşlı Maksimov 5 il Almaniyada futbol oynadığından, bu ölkəni çox sevir. Təsadüfi deyil ki, imkan düşdükcə oraya istirahətə və dostlarını, sabiq komanda yoldaşlarını görməyə gedir. Alman dilini bilən Maksimov işsiz qaldığı müddətdə bir çox klubun düşərgəsində olub: “Hər dəfə Almaniyaya gedəndə kirayəyə maşın götürürəm. İşsiz qalanda xeyli matça baxmışam. Bir neçə klubun düşərgəsində olub, akademiyalarına baş çəkmişəm. Yaxın gələcəkdə özümü Ukrayna klublarında görmürəm. Çünki bizim ölkədə futbolun səviyyəsi aşağı düşüb”. (Apasport.az)
- Müsahibə2024-05-23 08:00
Aleks Souza: “Menecerim danışmamağı tapşırıb”
- Ölkə futbolu2024-05-23 12:03
“Neftçi” daha bir legioner aldı: Anderssonun sözü ilə əməli üst-üstə düşmür
- Ölkə futbolu2024-05-23 08:32
“Yurqorden” Musanı icarəyə verəcək
- Müsahibə2024-05-24 08:00
Şahin Diniyev: “Qarşımıza avrokuboklara vəsiqə qazanmaq tapşırığı qoyulmamışdı”