Premyer-liqa
“Sumqayıt”ın “saqqallı uşaqları”
Bakıya yaxın olan, amma bu yaxınlıqdan "bir qram"da fayd…
Bakıya yaxın olan, amma bu yaxınlıqdan "bir qram"da fayda götürməyən Sumqayıt adlı şəhərin eyniadlı komandasından danışsaq, nə dərəcədə sizi "feyziyab edərik"? Elitada oynadığı dönəmdən bəri yalnız vaxt keçirən və rəqiblərinin qapazaltısı olan "gənclik şəhəri"nin təmsilçisi belə desək, yaşamaqla yox, sürünməklə məşğuldu.
Hazırda bu komanda sadəcə, elitada "xala xətrin qalmasın" deyə oynayır. Əslində, "Sumqayıt" AFFA-nın "bu şəhərdə komanda var" adlı layihəsinin boyat versiyasından başqa bir şey deyil. 2011/12 mövsümündə birinci dəstə komandalarının lisenziya ala bilməməsinə görə premyer-liqaya "dürtülən" "Sumqayıt" elə ovaxtdan ayaq altda qalmaqla ad çıxardı.
Almaniyadan Bernard Raabı "qul" kimi gətirib işlətsələr də, alman mütəxəssis elitada Spartak üsyanı qaldıra bilmədi. Hətta "Sumqayıt" ilk elitaya yüksəldiyi mövsümdə sonuncu pilləni tutmaqla da "göz oxşadı". Sadəcə, AFFA-nın baş katibi Elxan Məmmədovun sevimli komandası yenə də birinci dəstə təmsilçilərinin lisenziya ala bilməməsinə görə elitada öz yerini qorudu. Ötən mövsüm isə "Sumqayıt" belə desək, "cırmaq-cırmaq" elitadakı yerini qorudu. Sadəcə, Raabın komandasının bəxti "Kəpəz" və "Turan"ın acınacaqlı vəziyyətdə olmasına görə gətirdi. Yoxsa, "Neftçi"yə 1:8 hesabıyla darmadağın olunan komandadan necə ağzıdolusu danışasan?
Məsələ ondadı ki, komandanın bu gedişlə perspektiv vəd etmədiyini görən idman müəllimi Raab "nemesliyinə" sığışdırmayaraq Sumqayıtı tərk etdi.
Yox, Raaba "qınından çıxıb qınını bəyənmədi" damğasını da vurmaq olmazdı. Sən dahi məşqçi olmasan da, qapaz altında qalmağa da məhkum deyilsən. Tük üstündə gəzmək heç vaxt qəhrəmanlıq sayıla bilməz. Ona görə də Raabı yola salıb yerli mütəxəssis axtarışına çıxan "Sumqayıt" rəhbərliyi seçimi Aqil Məmmədov üzərində etdi. Belə baxanda bu sövdələşmə hər iki tərəf üçün sərfəli oldu. Məmmədov "dəlləkliyi yetimin başında öyrənməli" olduğu halda, "Sumqayıt" rəhbərliyi də ucuz ətdən şorba hazırlamağın bu gün üçün daha münasib olduğunu dərk etdi. Amma görünən odu ki, komanda çempionata qismən uğurlu başlasa da, yanacaq tez qurtardı. Turlar ötdükcə aydın oldu ki, "Xəzər Lənkəran"la heç-heçə və "Qəbələ" üzərində qələbə təsadüf də olmasa, zərurət də deyildi. Oradan-buradan lazımsız oyunçuları komandaya doldurmaqla, "Əlini Vəliyə qatmaqla" nəyəsə nail olmaq mümkün deyil. Düzünü deyim? "Sumqayıt" indi futbol komandasından çox Cəlil Məmmədquluzadənin təsvir etdiyi "saqqallı uşağ"a bənzəyir. Düzü, adamın səviyyəli futbol oynamaq əvəzinə saqqal saxlayan komandanın üzvlərinin yerinə ürəyi ağrayır. Ancaq oynamağı bacarmayan sumqayıtlı gənclərin öz ölmüş futbollarına saqqal saxladığını da başa düşmək olar. Sadəcə, bizim adət-ənənəyə görə ölənə 40 gün saqqal saxlayarlar. Di gəl ki, sumqayıtlı futbolçuların "matəmi" uzun çəkir. Yetimin başında dəlləkliyi öyrənən Aqil Məmmədov isə nəinki başını qaşıya, heç öz yetirmələrinin üzündə saqqalı qırxa bilmir. Ara yerdə sumqayıtlı azarkeşlərin əsəbləri korlanır. Ancaq eyb etməz, mövsüm başa çatar, qətiyyən güclənmək istəməyən "Sumqayıt" layiq olduğu birinci dəstəyə yuvarlanar (Ekspress).
Düzü, orada bu komandanın ağlı başına gələcəyini iddia edə bilmərəm. Çünki biz hələ də oradan elitaya gələnin coşduğunu görməmişik. Bizdə ya gedən qayıtmır, ya da gələn sürünür. Çünki futbol komandasını necə qurmağın yolunu bilmirik. Adicə, "Sumqayıt"da qat-qat imkanlı olan "Bakı", "Xəzər Lənkəran" və buna oxşar adı iddialı komandalar heç nə ilə yadda qalmır. Biz dəniz piratlarına oxşayan sumqayıtlı oyunçulardan nə gözləyək? Eh, bizdə hərəsi bir cürdü. "Sumqayıt"ı da gördüyümüz kimi qəbul etməliyik. Bugünə qədər görə-görə gəldik və gələ-gələ gördük ki, bizim futbolun şəfa tapmasına hələ çox var. Bakıya yaxınlıq və uzaqlıqla deyil, əsas futbola yaxınlıq və uzaqlıqdı. "Sumqayıt" isə bu mənada əsl həqiqətən də uzaq düşüb. Azarkeşə saqqal yox, "sağ qal" sözü lazımdı!
CAVAD
- Ölkə futbolu2024-04-17 17:17
Kadiri yeni məşqçiyə uyğunlaşır: “Zamana ehtiyacımız var”
- Müsahibə2024-04-18 08:00
Rezabala avrokuboka vəsiqə istəyir: “Səhv etməyə ixtiyarımız yoxdur”
- I Liqa2024-04-17 17:34
Apellyasiya Arbitraj Tribunalı AFFA İntizam Komitəsinin qərarını dəyişdi
- Dünya futbolu2024-04-17 16:41
Daha bir özbək İtaliyaya köçür