Albanların iddiasına sənədsiz cavab

U-21 yığmamızın Türkiyənin Antalya şəhərində keçirdiyi təlim-məşq toplanışı çərçivəsində Albaniyanın U-21 deyil, U-20 yığmasına qarşı oynadığını xəbər vermişdik. Və bu xəbərdə alban mənbələrinə əsaslanmışdıq.

Belə ki, AFFA-nın rəsmi saytı eyni yaş qrupundan ibarət millilərin üz-üzə gəldiyini yazsa da, rəqib ölkənin mətbuatı, daha doğrusu, Albaniya futbol federasiyasının rəsmi saytı fərqli məqamı qabardır. Albanlar U-20 yığmalarının 21 yaşlılarımızı məğlub etdiyini (1:0) bildirirlər.

Dünən milli komandamızın düşərgəsindən bu xəbərin doğru olmaması ilə bağlı iradlarla üzləşdik. Bizimkilər albanların yalan yazdığını, əslində, hər iki komandanın U-21 komandasına güvəndiyini iddia edir. Etirazı anlayışla qarşılayırıq, amma…

Əvvəla, bu, albanların iddiasıdı və biz bu ölkənini mətbuatında yazılanları işıqlandırmışıq. Etirazı onlara bildirmək lazımdı.

Düzdü, Rəşad Sadıqov həm U-20, həm də U-21 millimizin baş məşqçisidi və Antalyadakı toplanışa da bu iki komandaya namizədləri çağırıb. Amma Sadıqov meydana hətta 17 yaşlıları da buraxsa, komanda U-21 adlanıb.

Rəqibin heyətində yaşı 20-ni keçmiş 4 futbolçu çıxış edib və bizimkilər də buna görə albanların U-20 adı ilə oynamasının mümkünsüzlüyünü iddia edir. Halbuki bizdə də 22 yaşı olan bir neçə nəfər – Fəhmin Muradbəyli, Ramil Şeydayev və s. oynayıb.

Yaş senzinə görə, millimizin mətbuat xidmətinin albanların xəbərini yalanlaması başadüşüləndi – çünki U-20 və U-21 üçün müəyyən edilmiş təvəllüdlər var. Tsikl başlayanda futbolçunun yaşı hansı tələbə cavab verirsə, ona uyğun komandada oynaya bilər. Bu səbəbdən Şeydayevin 21 yaş həddini ötməsi qəbahət deyil. Lakin eyni məntiqlə Albaniya millisinin heyətində çıxış etmiş 4 21 yaşlıya görə də rəqibə U-21 deyə bilmərik.

Mübahisəni davam etdirmək olar. Lakin başağrısı olmamaq üçün olaya rəsmi yanaşmaq lazımdı. Biz oyunun statusunu müəyyənləşdirmək üçün bizimkilərdən rəsmi sənəd istədik. Bu, milli komandalar arasında beynəlxalq yoldaşlıq görüşüdü. Deməli, AFFA-da bununla bağlı rəsmi müqavilə olmalıdı. Lakin bütün cəhdlərimizə rəğmən, həmin anlaşmanın surətini əldə edə bilmədik.

Belədə çıxış yolunu matçın protokolunu tələb etməkdə gördük. Sadəcə, hakimlərin doldurduğu və üzünü komandalara verdiyi hesabat bütün suallara son qoya bilərdi. Ədalət təmsilçilərinin qarşılaşan komandaların adını qeyd etdiyi rəsmi sənəddə yazılan bizim üçün əsas sayılacaqdı. Maraqlıdı ki, belə bir sənəd də ortaya çıxmadı – millinin düşərgəsində protokolun surəti tapılmadı.

Albanların doğru yazdığını, bizimkilərin isə yalan danışdığını iddia etmirik. Lakin ortada yanlışlıq var və bu boşluğu rəsmi sənəd vasitəsi ilə doldurmaq olar. Söhbət məhəllə komandalarının oyunundan yox, U-21-lər arasında beynəlxalq yoldaşlıq görüşündən gedir və belə qarşılaşmalar rəsmi sənədlə tarixləşməlidi. Varsa, təqdim və sübut edin, yoxdursa, ya ortada yalan var, ya da milli komandayla bağlı təşkilati məsələlərdə qüsurlusuz.

CAVAD

P.S.: Ümid edirik, Gürcüstanla bugünkü oyundan sonra eyni problem ortaya çıxmayacaq.