UEFA Millətlər Liqasının püşkü atıldı

Bu gün UEFA-nın yeni layihəsi olan Millətlər Liqasının ilk mövsümünün püşkü atılıb.

Futbolinfo.az xəbər verir ki, İsveçrənin Lozanna şəhərində baş tutan püşkatmada qitənin ali futbol qurumuna üzv olan 55 ölkənin millisi 2018/19 mövsümünün qalibi adı uğrunda mübarizədə rəqiblərini tanıyıb.

Yığmaların UEFA reytinqinə görə yarış iştirakçıları 4 liqada qüvvəsini sınayacaq. A liqasında yer alan ən güclü 12 komanda kubok və medallar üçün “döyüşəcək”. B liqasında 12, C liqasında 15, D liqasında 16 yığma mübarizə aparacaq. 

Bütün liqalarda komandalar 4 qrupa bölünəcək. A liqasında qrup qalibləri mükafatlar uğrunda yarımfinal və finalda oynamaq imkanı qazanacaq. Digər liqaların qrup birinciləri isə 2020/21 mövsümündə daha yüksək dəstədə çıxış etmək imkanına yiyələnəcək. A, B və C liqalarında qrup sonuncuları növbəti mövsümdə aşağı dəstədə oynamaq məcburiyyətində qalacaq.

Qrup mərhələsinin nəticələri təkcə liqalar arasında yuxarı-aşağı hərəkət etmək üçün önəmli deyil. AÇ-2020-nin seçmə mərhələsinin püşkatması zamanı yığmaların səbətlərə bölünməsi məhz Millətlər Liqasının nəticələrinə görə gerçəkləşəcək.

Bundan başqa, hər liqadan 1 komanda AÇ-2020-nin final mərhələsinə yüksələcək. Seçmə mərhələdə vəsiqə qazanmayanlar arasında öz qrupunda ən yaxşı olanlar 2020-ci ilin martında pley-offa xoşbəxtlər sırasına düşmək üçün döyüşəcək.

Reytinqə görə UEFA-nın 40-cı komandası olan Azərbaycan yığması D liqasında yer alıb. Millimiz ən zəif 16 komanda sırasında 1-ci idi. Komandamız elə ən zəiflərin yer aldığı qrupa düşüb. Belə ki, Azərbaycan millisi Kosovo, Farer adaları və Malta ilə mübarizə aparacaq.

Millətlər Liqasının qrup mərhələsinin oyunları 2018-ci ilin sentyabr-noyabr aylarında keçiriləcək.

Millətlər Liqası
Qrup mərhələsi

A liqası

1-ci qrup: Almaniya, Fransa, Hollandiya
2-ci qrup: Belçika, İsveçrə, İslandiya
3-cü qrup: Portuqaliya, İtaliya, Polşa
4-cü qrup: İspaniya, İngiltərə, Xorvatiya

B liqası

1-ci qrup: Slovakiya, Ukrayna, Çexiya
2-ci qrup: Rusiya, İsveç, Türkiyə
3-cü qrup: Avstriya, Bosniya və Herseqovina, Şimali İrlandiya
4-cü qrup: Uels, İrlandiya, Danimarka 

C Liqası

1-ci qrup: Şotlandiya, Albaniya, İsrail
2-ci qrup: Macarıstan, Norveç, Bolqarıstan, Kipr
3-cü qrup: Sloveniya, Yunanıstan, Finlandiya, Estoniya
4-cü qrup: Rumıniya, Serbiya, Çernoqoriya, Litva

D Liqası

1-ci qrup: Gürcüstan, Latviya, Qazaxıstan, Andorra
2-ci qrup: Belarus, Lüksemburq, Moldova, San Marino
3-cü qrup: Azərbaycan, Farar adaları, Kosovo, Malta
4-cü qrup: Makedoniya, Ermənistan, Lixtenşteyn, Cəbəllütariq