Rövşən Hüseynli: “Növbəti mərhələyə aparan yol bu matçdan başlayır”

Avropa çempionatının hazırlığını Bakıda davam etdirən futzal üzrə Azərbaycan millisi İran yığması ilə iki yoldaşlıq oyunu keçirdi. Futbolinfo.az xəbər verir ki, ilk oyunda 3:3 hesablı heç-heçə edən komandamız ikinci qarşılaşmada məğlub oldu – 1:4.

Oyunlarla bağlı yığmamızın qapıçısı Rövşən Hüseynli federasiyanın mətbuat xidmətinə fikirlərini açıqlayıb: “Avropa çempionatından əvvəl İran kimi güclü komanda ilə qarşılaşmaq xeyrimizə oldu. Bu matçlarda səhvlərimizi müəyyənləşdirdik, hansı çatışmazlıqları aradan qaldırmalı olduğumuzu dəqiqləşdirdik. Birinci oyun daha sürətli və bir qədər də aqressiv keçdi. Thaqonun yoxluğu müdafiədən çıxmağımızda, eləcə də hücumlar qurmağımızda bizə çətinlik yaratdı. Məşqlərdə bu cür tapşırıqları edərkən oyunu əsasən onun üzərində qururduq. Məcbur olub başqa taktika ilə oynadıq. İkinci oyunda sürət aşağı idi ki, bunu da yorğunluqla əlaqələndirmək olar. Çünki belə güclü komanda ilə ardıcıl iki gün ərzində oynamaq çox çətindi. Həm də Vassouranın yoxluğu hiss olundu".

Hüseynlinin fikrincə, İran və Fransa yığmalarının oyun üslubu bir-birinə yaxın olduğundan bu, bizim üçün əla sınaq olub: "Bildik ki, nələri düzəltməliyik, harda axsayırıq. Xətai, Ramiz, İsa oyunlarda özlərini yaxşı tərəfdən göstərə bildilər. Fineo, Vassoura və Vitali komandaya gec qoşulduqlarına görə, müəyyən problemlər yaşandı. Ancaq çempionata qədər bunun yoluna qoyulacağına əminik. Komanda Avropa çempionatına təxminəm 80-90 faiz hazırdı. Qarşıdakı 7-8 gündən də maksimum istifadə edəcəyik. Təbii ki, rəsmi və yoldaşlıq oyunları tam fərqlidi. Çalışdıq Fransa ilə oyunda etmək istədiklərimizi bu matçlarda tətbiq edək. Fransa ilə oyun bizim üçün finala bərabərdi. Çünki növbəti mərhələyə aparan yol bu matçdan başlayır. Komandamız üçün uğurlu bir yarış olacağına inanıram”.