Ölkə futbolu
Əhmədov rəhbərlikdən sponsorlara şikayət etdi
“Neftçi” klub halında Antalyadadı. Məşqç…
“Neftçi” klub halında Antalyadadı. Məşqçi və futbolçu heyəti ilə yanaşı, rəhbərlik də Türkiyəyə yığışıb. Bu, gözləniləndi. Mövsümün ikinci yarısına hazırlaşan bakılılar burada idarə olunur, qərarlar yerində verilir.
Yoxlama oyunlarında ardıcıl 4 məğlubiyyət, transferlərin gecikməsi azarkeşlərin ciddi narazılığına səbəb olub. Məşqçi heyəti ilə rəhbərliyin birləşməməsi, ayrı xətləri təmsil etməsi klubun axsamasına gətirib çıxarıb. Sanki komanda 2 ayrı mərkəzdən idarə olunur və belədə toqquşmalar, büdrəmələr, bir-birinə mane olma halları üzə çıxır.
Son 2 gündə transfer bazarında qismən hərəkətlənmənin şahidi oluruq. Mətbuatın tənqidlərindən, sosial şəbəkələrdə azarkeşlərin narazılığını aşkar bildirməsindən sonra 3 oyunçunun transferində irəli addım atılıb. Xüsusilə “Futbolinfo”da Kamil Məmmədovla bağlı yazılanlardan sonra klub rəhbərliyi vəziyyəti tənzimləməyə çalışır.
Komandaya gələn yeni hücumçunun menecer Çinar Məmmədovun vasitəsi ilə tapılması xəbərinin mətbuata çıxması təsadüf deyil. Klub bununla oyunçu keçidlərinin guya Kamil Məmmədovun inhisarında olmadığını bəyan etmək istəyir. Halbuki baş məşqçi Tərlan Əhmədovun dünənki müsahibəsində (futbolpress.az) vəd etdiyi digər 2 oyunçu məhz bu menecerin vasitəsi ilə dəvər olunub. Lakin yenə onun adı açıqlanmır, gizli saxlanılır.
“Neftçi” gec də olsa, transferlərə başlayır və son anda gələnlərin hazırlıq səviyyəsinin necə olacağı, onların nə vaxt formaya düşəcəyi daha sonra müzakirə ediləcək. Hələ futbolçuların səviyyəsini və qiymətini demirik.
Bütün bunlar sponsorların kluba təpkisindən sonra reallaşır, işlər sürətlənir. Və bu məsələdə Əhmədovun böyük rolu var. Söhbət ondadı ki, məşqçi rəhbərliyin başı üstündən bəzi addımlar atıb. Onun dünən Peşəkar Futbol Liqasının prezidenti Ramin Musayevlə növbəti görüşü təsadüf deyil. Sifarişli işləmədiyini deyən, lakin özü “Neftçi”yə məhz Musayevin sifarişi ilə gələn Əhmədov indi klubun problemlərini də öz rəhbərliyi ilə deyil, məhz PFL prezidenti ilə müzakirə edir.
Bir neçə gün öncə isə Əhmədov rəhbərliyin başı üstündən daha bir iş görüb. O, klubun sponsorlarına, SOCAR-dakı bəzi rəsmilərə məhz rəhbərlikdən şikayət edib, ona işləməkdə mane olduqlarını bildirib. Əhmədov ardıcıl məğlubiyyətlərdə, komandanın hazırlığının qənaətbəxş olmamasında məsuliyyəti boynundan atmaq üçün bu addıma ehtiyac duyub.
Təbii ki, bu şikayət rəhbərliyə problem yaradacaq. Onlar düşərgədə ola-ola klub başqa yerlərdən idarə olunur. Susqun qalan Tərlan bəyin son 3 gündə 3 fərqli müsahibə verməsinin də səbəbi budur. O, klubun ağası olduğunu, lakin maliyyə məsələlərinə görə çətinlik çəkdiyini, süni əngəllərlə üz-üzə qaldığını nümayiş etdirməyə çalışır. Onun müsahibələrində ayrı-ayrı rəhbər şəxslərin adını çəkib, tərif yağdırması isə prezidentin, vitse-prezidentin başının altına yastıq qoymaqdı. Hər şey qaydasındadısa, SOCAR-a edilən şikayətin səbəbi nədir?
Təbii ki, məşqçinin birbaşa cavabdeh olduğu idman nəticələrinin bərbadlığına rəğmən, belə at oynatması elə klub rəhbərliyinin günahıdı. Onlar kluba lazımi diqqət ayırmır, hər şeyi məşqçilərin üzərinə atıblar, Əhmədov da təmsil etdiyi xəttin güclənməsi üçün meydandankənar işlərlə məşğuldu.
AĞA