Ölkə futbolu
“Kəpəz” könüllü darmadağın olub?
“Kəpəz”in Polşanın "Yagelloniya” klubuna 1:…
“Kəpəz”in Polşanın "Yagelloniya” klubuna 1:8 hesabı ilə uduzması ətrafında bəzi söz-söhbətlər gəzir. “Neftçi”nin ardınca daha bir klubumuzun belə biabırçı hesabla üz-üzə qalması müəyyən şaiyələrin yaranmasına səbəb olub.
Yunis Hüseynovun baş məşqçi postuna gəlişindən sonra nəticələri bir az da pisləşən autsayder qış fasiləsində heyətinə xeyli legioner dəvət edib. Lakin görünən odur ki, məşqçinin bütün ipləri əlində cəmləşdirməsi də fayda vermir. Veteran yaşında olan əcnəbilərin heyətə götürülməsi məhz "Yagelloniya” kimi sürətli futbol sərgiləyən komandalarla görüşlərdə özünü göstərir. Bu heyətlə bəlkə də Premyer Liqada 1-2 qələbə qazanmaq olar, lakin komandada hər şeyin doğru istiqamətdə getdiyini deyə bilmərik.
İstənilən halda, komandaya yalnız “Yagelloniya”ya məğlubiyyətə görə qiymət vermək olmaz. Yunis bəyin uyğyun olmayan zamanda – qış fasiləsində heyəti kökündən dəyişməsinin fəsadlarını çempionat bərpa olunandan sonra görəcəyik. Lakin klub rəhbərliyi də xərclədiyi pulların düzgün istiqamətə xərclənməsinə nəzarət etməlidi.
İctimaiyyət arasında gəzən söz-söhbətsə, indiki halda daha ciddi araşdırılmalıdı. Sosial şəbəkələrdə bu sınaq matçının bukmeker kontorlarına salınması və bir qrup şəxsin ilk yarıda 5 və daha artıq qolun vurulacağına pul qoyuluşu etməsi barədə söz-söhbət gəzir. Hətta Dario Federikonun transfer pulunun məhz bu yolla ödəndiyi də deyilir. Düzdü, bu, şaiyədi, lakin şaiyələr də araşdırılmalıdı ki, sonradan həqiqətə çevrilməsin.
İlk yarıda 7 qolun vurulması və dava da müəyyən mənada adamı şübhəyə salır. Sanki 5 qola razılaşan tərəflərdən birinin daha çox fərqlənməsi digərinin xətrinə dəyib və münasibətlər davaya çevrilib.
Yunis bəyin futbolçu və məşqçiliyi dövründə daim dürüst çalışdığına şahid olmuşuq. Ola bilsin, bu məsələdən onun da xəbəri olmayıb. Futbolçuları komandaya eyni şəxslər gətirib və onların əməkdaşlıq etdiyi oyunçularla belə məsələlərdə əlbir olması mümkündü. Gəncəlilərin bütün transferlərində pay sahibi olan Qoşqar Hacıyev “İnter”də çalışarkən də bu tipli məsələlərə görə tez-tez qınanırdı.
Bu yazı ilə kimisə ittiham etmirik, gəzən şaiyələri çatdırıb, klub rəhbərliyinin ayılması üçün xəbərdarlıq edirik. Diqqətli olaq, hörmətli olaq…
FƏRİD