Ölkə futbolu
Qurbanovun debüt matçı
Türkiyənin Antalya şəhərində təlim-məşq toplanışında o…
Türkiyənin Antalya şəhərində təlim-məşq toplanışında olan Azərbaycan millisi sabah 2018-ci ildə ilk oyununu keçirəcək. Yığmamız Moldova ilə yoxlama matçında üz-üzə gələcək.
Bu qarşılaşma millimizin yeni baş məşqçisi Qurban Qurbanovun komandanın “sükanı arxasında” ilk matçı olacaq. Oyunu bizim üçün əhəmiyyətli edən əsas məqam da budur. Digər tərəfdən, Moldova yığmasını da görüşə yeni baş məşqçi çıxaracaq. Rəqib komandada Aleksandr Spiridon qısa müddət əvvəl bu posta təyin edilib və buna qədər yalnız bir oyun keçirib.
Bu baxımdan hər iki mütəxəssis üçün matç böyük əhəmiyyət daşıyacaq. Təbii ki, yoxlama oyununda nəticə önəmli deyil, ancaq Qurbanov debütündə qələbə qazanmaqda iddialı olacaq. Spiridon isə bir neçə gün əvvəlki Cənubi Koreya məğlubiyyətindən sonra bu dəfə yaxşı nəticə əldə etmək və millidə ilk qələbəsini qazanmaq niyyətində olacaq. Üstəlik, komandaların da səviyyəcə yaxınlığını nəzərə aldıqda hər iki mütəxəssisin uğurlu nəticə planladığını ehtimal etmək çətin olmamalıdır.
Yığmamız bu qarşılaşmaya ideal heyətlə çıxa bilməyəcək. Ölkə xaricində çıxış edən futbolçulardan yalnız Pavel Paşayev baş məşqçinin sərəncamındadı. Araz Abdullayev, Dmitri Nazarov, Renat Dadaşov kimi oyunçular klublarındakı vacib oyunlar səbəbilə təlim-məşq toplanışına cəlb olunmayıb. Bu siyahıda Deniz Yılmaz, Eddi İsrafilovun da adını qeyd etmək olardı, lakin onların ümumiyyətlə, bundan sonra yığmaya çağırılıb-çağırılmayacağı sual altındadır. Digər tərəfdən, yığmaya ilk dəfə çağırılan bir neçə futbolçu debüt etmək imkanına sahib olacaq.
Moldova millisinin heyətində də əsasən yerli çempionatda forma geyinən futbolçualr yer alıb. Yalnız Vitali Damaşkan müqavilə ilə İtaliya “Torino”suna məxsusdur, ancaq o da “Şerif”də çıxış edir. Üstəlik, heyətdə son zamanlara qədər klubsuz olan bir neçə futbolçunun da olduğunu qeyd etmək lazımdır.
Sabahkı oyun iki yığma arasında yubiley xarakteri daşıyacaq. Azərbaycan və Moldova sayca 10-cu dəfə üz-üzə gələcəklər. Əvvəlki 9 matçın yalnız 2-i rəsmi olubsa, komandalar 7 dəfə yoldaşlıq oyunları çərçivəsində qarşılaşıblar. 9 oyunun 2-də Azərbaycan millisi, 3-də Moldova yığması qələbə qazanıb. 4 görüşdə isə qalib müəyyənləşməyib. Milli sabah qalib gələcəyi halda qələbə sayında balans yaranacaq. Top fərqi isə 8:6 moldovalıların xeyrinədir.
Yeri gəlmişkən, Moldova Qurban Qurbanov üçün uğurlu rəqib sayılır. O, 2004-cü ildə millinin 1:2 uduzduğu matçda bu komandanın qapısına yol tapmağı bacarıb (futbolpress.az).
Millimizin Moldova ilə bütün oyunları:
02.09.1994 Kişinyov YO Moldova – Azərbaycan 2:1
22.03.1998 Bakı YO Azərbaycan – Moldova 1:0
24.03.2001 Bakı DÇSO Azərbaycan – Moldova 0:0
01.09.2001 Kişinyov DÇSO Moldova – Azərbaycan 2:0
31.03.2004 Kişinyov YO Moldova – Azərbaycan 2:1
09.02.2005 Bakı YO Azərbaycan – Moldova 0:0
18.05.2006 Kişinyov YO Moldova – Azərbaycan 0:0
26.05.2010 Avstriya YO Moldova – Azərbaycan 1:1
17.11.2015 Bakı YO Azərbaycan – Moldova 2:1