Ölkə futbolu
Aqibəti Antalyada müəyyənləşən “Neftçi”
“Neftçi”nin 4-cü pilləyə yüksəlişi bu…
“Neftçi”nin 4-cü pilləyə yüksəlişi bu gedişlə xəyal olacaq. “Zirə”ylə oyunda növbəti xal itkisindən sonra bakılıların vəziyyəti bir qədər də çətinləşdi.
Tarixi ərzində çempionat matçlarında “qartallar”ı yenə bilməyən “ağ-qaralar” dünən də bunu bacarmadı. Halbuki bunun üçün ən ideal şərait var idi. Qonaqların əsas oyunçularından bir neçəsi cəzalı və zədəli idi, rəqib son dəqiqələrdə azlıqda qalmışdı, üstəlik, hesabı da “Neftçi” açmışdı. Lakin Tərlan Əhmədov bütün bunları ümumi qələbəyə çevirməyi bacarmadı.
Cəzalı olduğu üçün komandasını tribunadan idarə edən Ayxan Abbasov qış fasiləsindən bu yana qələbə qazana bilməməyin həyəcanında idi. Yeni transferlər heyətə tam uyğunlaşmadığından “Zirə” ilk 2 dövrədəki kimi inamlı deyil, bununla belə, komandanın öz dəst-xətti var. Bu səbəbdəndi ki, ilk yarıda qonaqlar daha yaxşı oynayırdı. “Neftçi” isə xaotik oynayır, başıpozuq dəstəyə oxşayırdı. Futbolçular fərdi bacarığı hesabına nəsə etməyə çalışırdı, düşünülmüş kombinasiyalar görünmürdü.
“Neftçi” topa nəzarət taktikası seçsə də, hücumda rəngarənglik yarada bilmirdi. Bunun üçün hücum oyunçuları fərdi bacarıq baxımından üstün olmalıdı. Amma bakılıların həmlələrini oxumaq zirəlilər üçün çətin deyildi, buna görə də onları dəf etmək asanlaşırdı. Təsadüfi deyil, hesabın açılması da hansısa düşünülmüş hücumun nəticəsi deyildi, İqnasio Herreranın uzaq zərbəsindən sonra Kamal Bayramov qapıda düzgün mövqe seçmədiyindən, topu tordan çıxardı.
“Zirə”nin cavab qolu “Neftçi” müdafiəsinin necə ağır, mövqe seçmək baxımından bacarıqsız olduğunu göstərdi. Tellur Mütəllimov 5 dəqiqə ərzində ikinci dəfə sol cinahda əla reyd etdi və bu dəfə onun 5 oyunçunu uşaq kimi aldatması məhsuldar ötürmə verməsiylə nəticələndi.
Qüvvəsini bilən Abbasov ikinci hissədə əvəzetmələrlə tamamilə oyuna nəzarəti rəqibə verdi. 5 müdafiəçiylə oynamağa başlayan qonaqlar dayaq bölgəsini də gücləndirməklə “Neftçi”nin pressinqinə şərait yaratdı. Lakin meydan sahibləri bu fürsəti də qaçırdı. Lukas Qomesin hərəkətsizliyi üzündən hücumlar məntiqi sonluğa çatmırdı. Oyuna sonradan daxil olan Mirabdulla Abbasov bir neçə epizodda təhlükə yaratsa da, tək əldən səs çıxmadı.
Bu matçı Tərlan Əhmədov əldən verdi. Əvvəla, onun mətbuatın tənqidlərinə uyğun heyət seçdiyini əminliklə demək olar. “Kəpəz”lə matçdakı qələbə qolundan sonra Sumqayıtda Mirabdulla start heyətində göründü. Lakin həmin matçdakı uğursuz nəticədən sonra yenidən Qomes meydanda idi. Məşqçi birdəfəlik əsas hücumçusunu seçə bilmir. Forvardlarda belə problemlər olur, onların qara zolaqdan çıxması üçün daimi dəstəyə ehtiyacı var. Lukasın bu bacarığı yoxdusa, daimi xilaskar olan Mirabdullaya güvənmək lazımdı – həm də 5-10 dəqiqə yox, hər oyunda ən azı 1 hissə.
Əhmədovun bu komandanı xilas etməsi mümkün deyil. O, oyunçu seçimi, davranışı və danışıq tərzi ilə çoxdan məğlub olub. Tərlan bəy bu aqibəti özü üçün qış fasiləsində seçib. Hərəkətləri, yersiz açıqlamaları öz yerində, məşqçi heyəti lazım olduğu kimi gücləndirə də bilmədi. Qomes yararsız hücumçudu, Fransisko Qarsiya fərq yarada bilmir, Mayk Kampas isə hətta meydana 5-10 dəqiqəlik oyuna buraxılmağa layiq deyil. Seçimlər səhv aparılıb və bu komanda uğursuzluğa məhkumdu.
Əhmədov mətbuat konfransında hansısa mücərrəd gələcəkdən danışıb, vədlər verib. Lakin artıq onu ciddiyə almağa dəyməz. Antalya toplanışında möhtəşəm “Neftçi” qurduqlarını deyən Tərlan bəyin yalanları 3 tura aydın oldu. Elə bunun nəticəsi idi, azarkeşlər matçdan sonra bütün komandanı fitə basdı, “Neftçi”nin çörəyi haramdır sizə” deyərək etirazını bildirdi.
Matç bitincə paltardəyişmə otağının qarşısına yığışan və Əhmədovdan hesabat istəyən azarkeşlərin bir neçəsi onun hasarın yanına gələrək hesabat verməsinə nail oldu. Tərlan bəyin bəhanələrini ağzında qoyan fanatlar bu komandanın sanki toplanış keçmədiyini onun üzünə çırpdı. Bununla Antalya sərgüzəştlərini xatırladan azarkeşlər “Neftçi”nin uğuruna inanmadığını büruzə verdilər. Haqlıdılar. Qarşıda Qəbələyə səfər, ardınca “Qarabağ”la matç var. Bu oyunlar həm “Neftçi”nin, həm də Əhmədovun taleyində gözlənilən sonluq olacaq.
FƏRİD