Ölkə futbolu
Maksimovlu “Keşlə”nin perspektivi yoxdu
Fərhad Vəliyevlə Rail Məlikovun veteran təcrübəsinə yaraş…
Fərhad Vəliyevlə Rail Məlikovun veteran təcrübəsinə yaraşmayan tərzdə “Keşlə” üçün “hazırladıqları” avtoqol olmasaydı, “Sumqayıt” bu qədər əziyyət çəkməyəcəkdi. Çünki dünənki matçda çox üstün olan qonaqlar başsız atlı kimi meydanda qaçan rəqibini hələ matçın əvvəlində məyus etmişdi.
Erkən qolun davamını məhz bu səhv üzündən gətirmək olmadı, qələbə qolunu vurmaq üçün Samir Abasov ciddi risk etdi və istəyinə son anda nail oldu. Bəlkə start heyətində gözlənilməz dəyişikliklər bu məşqçinin səhvi idi, lakin oyunun gedişində əsas oyunçuları döyüşə atmaqla Abasov nəticəyə nail oldu. Bəlkə də taktiki gediş, bəlkə də kubokun yarımfinalı öncəsi kartgizlətmək idi – hər nə idisə, uğurlu alınmamışdı.
“Sumqayıt”ın layiqli qələbəsi öz yerində, bu nəticə “Keşlə”dəki durumu da üzə çıxardı. Yuri Maksimov yeni komanda qura bilməyib, bu kollektiv Zaur Svanadzenin vaxtındakı kollektivin zəif gölgəsidi. Qış transfer pəncərəsi tamamilə boşa verilib, heyətə lazımlı oyunçular deyil, say düzəltmək üçün gələnlər yığılıb. Məşqçi ilə rəhbərliyin əlbir işləməməsi aşkar görünür.
“Keşlə”nin oyununu müəyyən edənlər, baş rol ifaşıları komandanın əvvəldən qalan üzvləridi. Denis Silva, Slavik Alxasov, Pərdis Fərcad-Azad, Fuad Bayramov və Adrian Skarlatake yenə də əsas yükü çəkir. Kamran Ağayevlə Məqsəd İsayev ümumi ansambla uyğunlaşıb. Yeni gələn digər oyunçuların səviyyəsindən isə yüksək tonla danışmaq olmur. Parlaq günlərini çoxdan geridə qoyan Sezar Meza Kolli, eləcə də Herve Tçami və Ebrima Sohna ümumi fonda seçilmir. Belə legionerlərdənsə, klubun akademiyasında yetişən cavanlar daha faydalı olardı.
Maksimovun bu futbolçuları necə seçdiyini bilmirik, amma qaçarkən ayağı ayağına dolaşan Andre Klennon kimi əcnəbilərdənsə, heç kimi almamaq daha məsləhətli idi. Bəli, ola bilər ki, komandanın maliyyə durumu transferlərə imkan verməyib, lakin 6 lazımsız futbolçudansa, 2-3 daha bahalı və yaxşı əcnəbi gətirmək ən ağıllı variant olardı.
Ümumiyyətlə, klub daxilində ciddi problemlər olduğu aydındı. Hiss olunur ki, futbolçuların bəzilərini Maksimov gətirib və dünən oynayanlar da birbaşa onun sevimliləri idi. Məşqçinin gəlişinə kimi rəhbərliyin aldığı Pablo Podio, Nemanya Stoyanoviç isə heç cür ukraynalının gözünə girə bilməyib. Bu səbəbdən onların adı hətta matçın iştirak ərizəsinə salınmır. Belə xaotik durum, qarşılıqlı inamsızlıq mühitində uğur qazanmaq mümkünsüzdü.
Maksimovun müqaviləsi yaya kimidi və Müşahidə Şurasının sədri Zaur Axundovla düşmən kimi davranması göstərir ki, onun daha uzun müddət burada qalması mümkün deyil. Axundovu ümumiyyətlə, komandaya yaxın buraxmayan məşqçi bu 3 ayı yola verib, vətəninə qayıdacaq. Lakin qışda aldırdığı oyunçulara xərclənən, əslində, havaya sovrulan pullar “Keşlə”nin büdcəsinə ziyan verəcək. Xeyli oyunçu alınıb, amma komanda əvvəlkindən də zəifdi.
Düzdü, kuboku qazanmağa ümid var, lakin belə oyun tərzi ilə bu, ümiddən başqa bir şey deyil. Maksimov transfer dövründə ciddi səhvlər edib, indi də mənasız diktatura yaratmaqla gərginliyi bir az da artırır. Bəzi futbolçularla, rəhbərliklə münaqişə onun yolasalma prosesini sürətləndirəcək. Klubda bu işin peşəkarı olan rəhbər şəxslər, ukraynalının çaldığı havaya oynamayacaq təcrübəli futbolçular var. Svanadzeni yola salanlar üçün Maksimovu oyundan çıxarmaq su içmək kimi bir şeydi.
Yenə Ramiz Məmmədovdan danışmalı olacağıq. Lakin idman direktoru bu vəziyyətdə komandaya müdaxilə etsə, onu qınamamalıyıq. Maksimovla “Keşlə”nin sabahı yoxdu. Kubokda uğura ümid etmək mənasızdı, 7-ci pillədən yuxarı qalxmaq da olmayacaq. Ukraynalı isə avrokuboka vəsiqə üçün bu posta təyin olunub. Məmmədov indidən yay planlarını cızsa, pis olmaz.
FƏRİD