Ölkə futbolu
Heç-heçələr günündə Maksimov təkqapı oynadı: "Məni aldatdılar"
Topaz Premyer Liqasında uzunmüddətli fasilə heç-he&cced…
Topaz Premyer Liqasında uzunmüddətli fasilə heç-heçələrlə bitdi. 3-cü dövrənin son turunun ilk 2 oyununda üz-üzə gələn komandalar xalları bərabər böldü. O da var ki, son 2 pillənin sahibləri liderləri büdrətdi.
“Zirə” Gəncədə “Kəpəz”in müqavimətini qıra bilmədi. Meydan sahiblərinin daha yaxşı oynadığı matçda, qonaqların uğursuzluq zolağından çıxmadığı da aydınlaşdı. 2018-də qələbə üzü görməyən “qartallar” sanki ənənəvi oyununu da itirib. Xüsusilə qışda transfer edilən futbolçular ümumi ansambla uyğunlaşa bilmir. Baş məşqçi Ayxan Abbasovun fasilə dövründə də bu problem yoluna qoymağı bacarmaması gələcək üçün ciddi siqnaldı.
“Qarabağ”ın xal itkisi daha gözlənilməz oldu. Lider öz meydanında oynadığından, “Keşlə” ilə görüşdə aşkar favorit sayılırdı. Matçın gedişində də ağdamlılar bir baş üstün görünürdü. Zədəli Yakub Jezniçakın və cəzalı Elvin Yunuszadənin yoxluğunda Qara Qarayevi müdafiənin sağ cinahına çəkən Qurban Qurbanov Pedro Enrike və Riçard Almeydaya da start heyətdə güvənməmişdi. Lakin Əfran İsmayılovla Rahid Əmirquliyevin formada olmadığını görmək üçün bir hissə bəs etdi. Epizodların birində Əfranın hamını, hətta özünü də aldadıb topu boş qapıya vura bilməməsi isə gülüş gününə əla ərməğan oldu.
İkinci yarıya əvəzləmələrlə başlayan Qurbanov məğlubiyyətdən qaça bildi. İlk yarıda Slavik Alxasovun qol vurduğu qapının torunu bu dəfə Almeyda silkələdi. İlk yarıda zədələnib əvəzlənən Kamran Ağayev, ikinci yarıda dalaşıb meydandan qovulan Sezar Meza Kolli və Coşqun Diniyev oyuna “rəng qatan” adamlar oldu.
Həmin Sezar fasiləyədək Rəşad Sadıqovun da sarı vərəqə almasına səbəbkar olmuşdu. Meydan sahiblərinin kapitanı bir neçə dəfə aşkar kobudluq edən, aqressiv oynayan paraqvaylıya nümayişkaranə şəkildə təpik vurmuşdu.
Bu matçın gedişində hər şey oldu. Oyunsonrası mətbuat konfransı da istisna deyildi. “Keşlə”nin baş məşqçisi Yuri Maksimov elə tikanlı sözlər söylədi ki, yəqin klub rəhbərliyinə müalicə üçün vaxt lazım olacaq. Liderlərdən “Qarabağ” və “Qəbələ”yə uduzmayan, “Zirə”ni səfərdə yenən komandanın baş məşqçisi nəticələrdən razı görünürdü.
Maksimova haqq vermək olar. O, sınıq-sökük heyətlə “Keşlə”yə normal futbol oynadır və komandada məşqçi işi görünür. Ukraynalı cavanlarla 2 güclü heyəti olan “Qarabağ”la heç-heçə etməyi qələbəyə bərabər hesab edəndə də öz işini gözə soxmağa çalışırdı: “Turnir cədvəlinin lideri ilə aşağı pillələrdə qərarlaşan komanda üz-üzə gəldilər. Oyun maraqlı alındı. Təxminən 60 dəqiqə yaxşı oynadıq. Biz əvəzetmə edəndə meydana yaxınlara kimi əvəzedicilərdə oynayan gəncləri buraxırdıq. “Qarabağ”da isə təcrübəli oyunçular meydana çıxırdı. Buna görə heç-heçəni yaxşı nəticə hesab edirəm”.
Maksimov hər suala cavabda rəhbərliyin qapısından “top keçirirdi”. O, transferlərin bərbad alınmasında, qışda gələn əcnəbilərin ehtiyatda qalmasında günahının olmadığını bildirməklə faktiki rəhbərliyi nişan verirdi. Yaxşı oyunçunun meydanda olacağını deməsinin başqa səbəbi yox idi: “Məni düzgün başa düşün. Güclü futbolçu 4 aya müqaviləyə və bizim təklif etdiyimiz məbləğə gəlməz. Büdcə çərçivəsində hərəkət etmişik. Buna görə transfer etdiyimiz futbolçulara irad bildirə bilmərəm”.
Maksimovun bir suala cavabı düzgün tərcümə edilmədi. Halbuki o, həmin açıqlama ilə klubun Müşahidə Şurasının sədri Zaur Axundovu yalançılıqda, onu aldatmaqda ifşa etmişdi. Məşqçi heyəti qışda niyə lazımınca gücləndirə bilmədikləri barədə suala təxminən belə cavab verdi: “Mən müqavilə bağlayana kimi fərqli büdcədən söhbət gedirdi. Anlaşmaya imza atdım və ardınca bəlli oldu ki, transferlərə vəd ediləndən 10 dəfə az vəsait sərf olunacaq. Məni aldatdılar, bu büdcə ilə isə daha səviyyəli oyunçu almaq mümkün deyildi. Hər dəfə ruhdan düşmək, getmək istəyirsən, amma müqaviləm bitənə kimi vəziyyətlə barışmalıyam. Əlimizdə olan materialla maksimuma nail olmağa çalışıram”.
…Turun 2 oyunu heş-heçə bitdi, Maksimov isə Axundovun qapısına cavabsız qollar vurdu…
FƏRİD