“Keşlə”də gərgin günlər – Tarix təkrarlanacaqmı?

Topaz Premyer Liqasının 21-ci turunda "Qarabağ”la heç-heçə oynayan "Keşlə”nin düşərgəsində gərginlik davam edir.

Futbolinfo.az xəbər verir ki, liderlə oyunda qazanılan bir xal qəsəbə təmsilçisinin üzünü heç də güldürməyib. İndi klubda nəticədən daha çox ukraynalı baş məşqçi Yuri Maksimovun mətbuat konfransında dediyi sözlər müzakirə olunur.

Maksimov "Azərsun Arena”nın mətbuat zalında jurnalistlərin suallarını cavablandırarkən aldadıldığını açıq dillə etiraf etmiş, klubun büdcəsiylə bağlı ona deyilən rəqəmlərin gerçək olmadığını vurğulamışdı. Ukraynalı mütəxəssis onu da bildirmişdi ki, təklif olunan qiymətə səviyyəli legionerin Azərbaycana gəlməsi mümkünsüzdür. Həmin pula klub rəhbərliyinin transfer etdikləri isə ehtiyat oyunçular skamyasında oturmaqdan başqa heç nəyə yaramırlar, onlardansa gənc azərbaycanlıları meydana buraxmaq daha yaxşıdır.

Onun bu sözləri kluba rəhbərlik edən Zaur Axundovun xoşuna gəlməyib və ukraynalı çalışdırıcı "Keşlə”də arzuolunmaz şəxs elan edilib. Axundov "Qarabağ”la oyundan sonra Maksimovla görüşüb, söhbətləşməyi belə lazım bilməyib. Çünki daha əvvəl bu cür görüşlər keçirilib və Axundov Maksimovun "ramolunmaz aslan” olduğunu qəbul edib.

Maksimovun "Keşlə”dən qovulması isə maddi baxımdan sərfəli deyil. Məşqçinin müqaviləsi mayın sonunda bitir. Ona qapını göstərsələr, təzminat ödənməsi qaçılmazdır. Buna görə artıq iki dəfə könüllü getmək istəyən, son anda fikrini dəyişən mütəxəssisin özünün 3-cü cəhdi səbrsizliklə gözlənilir. Onun gedişinin maya qədər uzanmayacağı da ehtimal edilir. Mümkün uğursuzluqlar və növbəti gərginlik ayrılığı tezləşdirəcək. Boşalan posta isə yenidən Ramiz Məmmədov əyləşəcək. Prosesləri sürətləndirmək üçün Axundovla Məmmədovun çoxdan sınaqdan çıxarılmış, Zaur Svanadzeni yola salarkən uğurla tətbiq edilmiş "B” planı da hazırlanıb. "Kəpəz”lə görüşdə bu planın işə düşməsi mümkündür.

Xatırladaq ki, oktyabrın 28-də keçirilən "Keşlə” – "Kəpəz” qarşılaşması da Svanadze üçün sonuncu oyun olmuşdu. 10-cu tura təsadüf edən və "Keşlə”nin 0:2 hesablı məğlubiyyəti ilə yekunlaşan qarşılaşmadan sonra gürcü mütəxəssis yola salınmış, onun yerinə Ramiz Məmmədov gətirilmişdi.

Tarixin təkrarlanıb-təkrarlanmayacağı tezliklə məlum olacaq.

Sport7.az