İnqilablı erkən final

Erkən final günü. “Qəbələ” ilə “Neftçi” bu gün ölkə kubokunun yarımfinalında ilk oyuna çıxsa da, əslində, onların dueli mövsümün ən vacib matçıdı.

Bir yanda ilk tituluna bu qədər yaxın olan “Qəbələ”, digər tərəfdə uğursuz mövsümləri sığortalamaq üçün kubok qazanmağa məhkum olan “Neftçi”. Və bu komandalar arasında indi ciddi səviyyə fərqi yoxdu. Əyalət klubu turnir cədvəlinin 2-ci pilləsində qərarlaşsa da, xal ehtiyatını qışadək yığıb, indi ən pis dönəmlərindən birini yaşayır, bakılılar isə qışdan bu yana özünə gəlib.

Kubok oyunları fərqlidi. Elə bu səbəbdən də əvvəlki nəticələr aldadıcı ola bilər. Oyun günü ən yaxşı futbolunu sərgiləyən, daha ciddi motivasiya olan qalib gələcək. “Qəbələ”nin bu baxımdan problemi yoxdu, Roman Qriqorçuk bu tipli matçlarda ən yaxşısına nail olmağı bacarır. Düzdü, indi yayın tezliklə gəlməsini və getməyi gözləyir. Lakin daha ciddi təkliflər üçün uğurla vida etmək məsləhətdi. Onun ruhdan düşmüş, meydanda ayaqlarını sürüyən yetirmələrini matça necə kökləməsindən çox şey asılı olacaq.

Əslində, bu matç “Qəbələ”nin sabahı baxımından da önəmlidi. Titulsuz qalmaq komandanın sonunu da gətirə bilər. Sponsorlar indiyədək kluba hər cür şərait yaradıb, amma titul qazanmağın yolunu heç cür tapmayıblar. Bu səbəbdən ölkə kuboku təsəlli ola bilər. Qəbələ akademiyasının “Bakı”nın taleyini yaşamaması üçün də bu, vacibdi. Və yaranmaqda olan ənənələrin yarımçıq qalmaması üçün mərhələ keçilməli, Qəbələdə oynanılacaq finalda da rəqibə şans verilməməlidi.

“Neftçi” bu il Qəbələdə qələbə qazana bilib. Ona görə də hansısa sindromdan danışmaq mümkün deyil. Səfər amili bakılılar üçün problem deyil, yerli azarkeşlər sevimli komandalarına biganədi. Bunun bir səbəbi rayonun futbol bölgəsi sayılmamasında, futbol ənənələrinin, azarkeşlik mədəniyyətinin tam formalaşmamasındadısa, əsas günah elə klubdadı. 9 ideal şəraitli meydançası ola-ola komandanın Bakıda məskunlaşması “Qəbələ”ni qəbələlilər üçün yad komandaya çevirib.

“Neftçi” təzyiqlərdən qismən qurtulub. Komanda son turlarda əsl futbol oynayır, azarkeşlərinə ümid verir. Rəhbərlikdəki dəyişikliklərdən sonra klubdaxili ab-hava xeyli yaxşılaşıb və bu, nəticələrdə özünü göstərir. Tempi saxlamaq üçün kubokda uğurlu nəticə vacibdi.

Kəsəsi, hər 2 komanda üçün titul qazanmaq çox önəmlidi və finala adlamaqla hədəfə yaxınlaşmaq olar. Bu məqam isə hər iki komandada qəribə qorxu yaradıb. Tərəflər nəticəni 3-cü tərəfin müəyyənləşdirəcəyindən ehtiyatlanır. Qəbələlilər AFFA – “Neftçi” yaxınlığından ehtiyatlanırsa, bakılıların da finalın Qəbələyə təyin olunması kürkünə birə salıb.

Bütün bunları nəzərə alaraq, hər iki matçda hakimlərin diqqət mərkəzində olacağını deyə bilərik. İnqilab Məmmədov bu tipli matçlara təyinatının nə dərəcədə doğru olduğunu işi ilə göstərməlidi. Öncəgörənlik etməyək, briqadaya uğur arzu edək. Hər kiçik səhvin ipdən asılı 2 komandanın ölüm fərmanı ola biləcəyini də unutmayaq. Qoy finala layiq olan vəsiqə qazansın.

AĞA