Ölkə futbolu
Maksimovun maksimumu
Finalda Bakı derbisi? Hələ cavab oyunları irəlidədi, amma yarım…
Finalda Bakı derbisi? Hələ cavab oyunları irəlidədi, amma yarımfinal mərhələsinin ilk oyunlarından sonra bu ehtimal çox böyükdü. Ölkə kubokunun dünənki matçlarında paytaxt klublarının nisbi üstünlük qazanması bu variantı söyləməyə əsas verir.
“Keşlə” – “Sumqayıt” matçı mövsümün ən solğun oyunlarından biri idi. Temp çox aşağıydı, futbolçuların əzmkarlığı görünmürdü, ustalıq səviyyəsi(zliyi) də baxımlı oyun izləməyə imkan vermirdi. Qonaqların heyətlə bağlı problemləri onlardan gözlənilən oyunu izləməyə şərait yaratmırdısa, paytaxt klubunun maksimumu bu idi – müdafiədə diqqətli, hücumda bəxtə ümidli.
Məhdud heyətlə ağır marafonu yola verən komandalar qrafik sıxlaşan kimi bunun fəsadını gördü. 3 gündən 1 oynamaq lazım gəlincə, fiziki qüsurlar üzə çıxdı, hər iki komanda məcburi əvəzləmələrə əl atmalı oldu. İynə hesabına meydana çıxan Cavid İmamverdiyev bir hissəyə heç nəylə yadda qalmadısa, meydan sahiblərinin bəzi oyunçuları da ayağını dartmağa başladı.
Son dəqiqələrdə vurulan qol bir az təsadüfi alındı. Daha doğrusu, Sezar Meza Kollinin fərdi ustalığı komandasına vacib üstünlük qazandırdı. Bu qol bəlkə də onu finalda qardaşı Derlisin “Neftçi”siylə oyuna aparacaq. Sumqayıtdakı oyunda hər şey ola bilər, lakin Samir Abasovun yetirmələri ötən il noyabrın 17-dən bu yana ilk dəfə yenilirdi və seriyanın qırılması onların əhvalına təsir edəcək. “Keşlə”nin 2018-də keçirdiyi bütün oyunlarda qol vurduğunu və heç vaxt 2 top fərqi ilə uduzmadığını da xatırladaq. Bu statistika revanş ümidlərini azaldır.
Yuri Maksimova alqış düşür. Ukraynalı sınıq-salxaq heyətlə finala çıxmaq üzrədi. Düzdü, rəqiblərin zəifliyi, rəqabətsizlik də onun işinə yarayır, lakin adamın haqqını da vermək lazımdı. O, şikayət edə-edə, “ağlaya-ağlaya” xeyli iş görüb. Qışda transfer edilən əksər oyunçuları ehtiyatda saxlayan, köhnə oyunçuların suyunu sıxıb, onlardan maksimumu alan məşqçi mümkün olanın ən yaxşısını edir.
Samir Abasov hələ cavab oyununda vəziyyəti düzəldə bilər. Faciə baş verməyib, buraxılan qol ümumi oyunun axarına uyğun deyildi. Səfərdə qol vurmadan uduzmaq onu riskə məcbur edəcək, bunun üçün isə futbolçulara istirahət vermək lazımdı. Amma o şans yoxdu, çempionatdan Avropa Liqasına vəsiqə qazanmaq daha real olduğundan orada boşluq vermək, kökdən düşmək olmaz. Daha aşağı pillərdəki komandalar kubok qazanmağa şanslıykən, “Zirə”ni önə buraxmamaq üçün 3-cü pillədə möhkəmlənmək lazımdı.
“Futbolçular göyə qalxmışdılar. Bu gün rəqib bizi göydən yerə saldı. Yaxşı ki, böyük hesabla uduzmadıq. Komanda bərbad oyun sərgilədi. Bəlkə də bu cür oyunumuzun səbəbi əsas futbolçularımızdan bəzilərinin olmaması idi. Ancaq bu, bəhanə olmamalıdı. Avroliqaya haqq edən komanda getməlidi” – bunu da Abasov deyir. Və düz deyir, “Sumqayıt” Avropaya həm çox yaxın, həm də uzaqdı…
CAVAD
- Ölkə futbolu2024-05-10 08:00
“Yurqorden” Musa Qurbanlıya qiymət qoydu – 10 milyon kron
- Ölkə futbolu2024-05-10 09:21
“Əks təqdirdə fanatlar Şeydayevi qəbul etməyəcək”
- Ölkə futbolu2024-05-09 13:53
“Azərbaycanda həm yaxşı pul qazandım, həm də hörmət”
- Digər idman növləri2024-05-09 12:52
Kramarenkonun qızı millimizdə? – “Bu, ölkəmə xəyanət olar”