Messi “Qızıl buts”a bir qədər də yaxınlaşdı

Avropada mövsüm sona yaxınlaşdıqca “qızıl buts” uğrunda yarış qızışır.

Futbolinfo.az xəbər verir ki, ölkə çempionatında ən çox qol vuran futbolçuya verilən mükafata əsas namizədlər “Barselona”nın hücumçusu Lionel Messi və cari mövsümdə fantastik yüksəliş əldə edərək diqqət mərkəzinə düşən “Liverpul”lu Məhəmməd Salahdı.

Son həftəyə kimi “qızıl buts” uğrunda mübarizədə misirli ilk sırada idi. Lakin son turdan sonra vəziyyət dəyişib. İspaniya La Liqasının 35-ci turunda, “Barselona”nın “Deportivo”nu 4:2 hesabıyla məğlub edərək çempionluğunu rəsmiləşdirdiyi matçda 3 qola imza atan Messi hesabındakı topların sayını 32-yə çatdıraraq, vahid liderliyə yüksəlib. Son həftəyə kimi hesabında 31 qol olan Salah isə Premyer Liqanın “Stok Siti” ilə matçında qol vura bilməyib.

Qarşıda Messini 4, hazırda əsasən Çempionlar Liqasına köklənmiş Salahı isə 3 çempionat oyunu gözləyir.

Xatırladaq ki, Salah hələ ki, “qızıl buts”u qazanmayıb. Messi isə bu günə kimi üç dəfə bu mükafata layiq görülüb.