Dünya futbolu
“Roma” ikinci möcüzəni gerçəkləşdirməyə çalışacaq”
UEFA Çempionlar Liqasının yarımfinal mərhələsi çə…
UEFA Çempionlar Liqasının yarımfinal mərhələsi çərçivəsində İngiltərənin “Liverpul” klubunu qəbul edəcək İtaliya təmsilçisi “Roma” növbəti möcüzəni hədəfləyib.
Futbolinfo.az xəbər verir ki, qarşılaşmadan bir gün öncə baş tutan ənənəvi mətbuat konfransında “canavarlar”ın baş məşqçisi Eusebio Di Françesko da bunu bəyan etməkdən çəkinməyib:
“Komandam ikinci möcüzəni gerçəkləşdirməyə çalışacaq. Buna inanmalıyıq. Bu mentalitetlə, bu tərəfdarla bunu bacarmağa çalışmalıyıq”.
“Liverpul”un təhlikəli rəqib olduğunu vurğulayan italiyalı mütəxəssis daha sonra bunları qeyd edib: “Onlara meydanda hətta kiçik bir ərazi versəniz, sizi cəzalandıracaqlar. Amma Çempionlar Liqasının yarımfinalında 70 min tərəfdarın gözü önündə oynayan komanda təslim ola bilərmi? Xeyr! Komanda olaraq var qüvvəmizi sərf edəcəyik. Matç 4:1 hesabıyla da bitə bilər. Ancaq bu coşqunu və sərhədləri aşmaq arzusunu yaşamaq istəyirəm. Bu mövsüm doğma meydanda keçirdiyimiz oyunlarda yalnız Madrid “Atletiko”su ilə matçda zor anlar yaşamışıq. Qalan oyunların hamısı nəzarətimiz altında keçib. Sabah (bu gün) da belə olmasını istəyirəm. Azarkeşlərimiz isə bizi ekstra olaraq motivasiya edəcəklər”.
Xatırladaq ki, “Roma” “Liverpul”a səfərdə 2:5 hesabıyla uduzub. Bu komanda 1/4 finalda İspaniya çempionu “Barselona”ya da ilk oyunda 1:4 hesabıyla uduzmuş, amma doğma meydanda 3:0 hesabıyla qalib gəlməklə mərhələ adlamışdı.