“Neftçi”nin qızıla bərabər gümüş şansı

Topaz Premyer Liqasının XXVI turunun nəticələri gümüş və bürünc mükafatlar uğrunda mübarizəni daha da gərginləşdirib. 

Futbolinfo.az xəbər veirr ki, “Keşlə” ilə öz meydanında 1 xal qazanan “Qəbələ” bu iki mükafatdan birini qazanmağı rəsmiləşdirsə də, əyalət klubunun medalının əyarına son turlar aydınlıq gətirəcək.

Belə ki, “Qəbələ” kimi “Neftçi”nin də gümüş medal şansı qalıb.

Tərlan Əhmədovun yetirmələri “qırmızı-qaralar”dan 6 xal geri qalsa da, onlara çatmaq və əlavə göstəricilərdə keçmək imkanına malikdi. Çünki Roman Qriqorçukun yetirmələri hər iki görüşdə uduzsa, bakılılar qələbələri sıralasa üstünlük sonuncuların tərəfində olacaq.

Düzdü, “Qəbələ”nin gümüş medal qazanmaması inandırıcı deyil. Bunun üçün komandaya cəmi 1 xal lazımdı. Bununla belə, Qriqorçukun yetirmələrini “Sumqayıt”la səfərdə, “Qarabağ”la evdə çətin matçlar gözləyir.

Amma artıq bu həftə “gümüş” sahibini tapa bilər. Ən yaxın izləyicisi olan “Gənclik şəhəri” təmsilçisinin qonağı olacaq “qırmızı-qaralar” səfərdə uduzmasa, ikinciliyi təmin edəcək.

“Qəbələ” məğlubiyyətlə də “gümüş”ə qovuşa bilər. Amma bunun üçün “Neftçi” “Səbail”lə oyunda xal itirməlidi.

XXVII tur təkcə gümüş deyil, “bürünc”ün də taleyinə aydınlıq gətirə bilər. Bunun üçün “Sumqayıt” “Qəbələ”yə qalib gəlməli, “Neftçi” “Səbail”ə uduzmalı, “Zirə” isə “Kəpəz”lə görüşdə xal itirməlidi. Belə olan vəziyyətdə “Qəbələ” (46 xal) 2-ci, “Sumayıt” (43 xal) 3-cü olur və “Neftçi” (40 xal) ilə “Zirə” (39 xal) üçün əlçatmaza çevrilir. Çünki “qırmızı-qaralar” “Gənclik şəhəri” təmsilçisini, sonuncularsa bakılıları şəxsi oyunlarda üstələyir.

Əgər qarşıdakı tur gümüş və ya hər iki medalın taleyinə aydınlıq gətirə bilməsə, mövsümün son turu daha prinsipial mübarizə vəd edir. Gümüşə iki (“Qəbələ” və “Neftçi”), bürüncə üç (“Sumqayıt”, “Neftçi” və “Zirə”) namizədin olması belə deməyə əsas verir.

Ən maraqlısı isə odu ki, mövsümün sonunda 3 komandanın eyni xala malik olmasıdı. “Qəbələ” hər iki oyunu uduzsa, “Sumqayıt”la “Neftçi” xal itirməsə, hər üç komanda 46 xala malik olacaq. Bu isə paytaxt klubuna sərf edən durum deyil. Belə alınsa, “Qəbələ” 2-ci, “Sumqayıt” 3-cü, “Neftçi” 4-cü olacaq.

Bu komandalarla müqayisədə daha şanssız görünən “Zirə”nin ümidləri daha çox 4-cü yerlə avrokuboklara getmək ehtimalıdı. Ayxan Abasovun komandası mükafat qazanmaq üçün özü uğurlu çıxış etməklə yanaşı, “Neftçi”nin büdrəməsinə ümid etməlidi. (Apasport)

Mükafatlara iddialılar son iki turda

“Qəbələ”

XXVII. 12.05.2018. “Sumqayıt” (s)
XXVIII. 20.05.2018. “Qarabağ” (e)

“Sumqayıt”

XXVII. 12.05.2018. “Qəbələ” (e)
XXVIII. 20.05.2018. “Zirə” (e)

“Neftçi”

XXVII. 12.05.2018. “Səbail” (e)
XXVIII. 20.05.2018. “Kəpəz” (s)

“Zirə”

XXVII. 12.05.2018. “Kəpəz” (e)
XXVIII. 20.05.2018. “Sumqayıt” (s)