Ölkə futbolu
İK-da veteran yükü: Cavadov, Tuayev, Qurbanov və Sadıqov fərq yaratmalıdı
Mayın 11-də , AFFA-nın inzibati binasında İcraiyyə Komitəsinin …
Mayın 11-də , AFFA-nın inzibati binasında İcraiyyə Komitəsinin növbəti iclası keçiriləcək. Gündəliyi açıqlanan tədbirdə bir çox məsələlər müzakirə olunacaq, qərarlar qəbul olunacaq.
1. Topaz Premyer Liqası klublarının əvəzedici komandaları arasında keçirilən çempionatla bağlı Klublar Komitəsinin 01.05.2018-ci il tarixli iclasında klubların irəli sürdüyü təkliflərin müzakirəsi
2. Topaz Premyer Liqasında gənc futbolçularla bağlı limit
3. Lisenziyalaşdırma prosesi ilə bağlı məlumat
4. Digər məsələlər
Əslində, bu tədbirdə milli çempionatın reqlametinin müzakirəsi daha çox tələb olunan məsələdi. Premyer Liqa ilə bağlı açıq qalan bir çox məqamlar var. Yeni mövsümdə neçə klubun çıxış edəcəyi hələ də bəlli deyil. AFFA-nın baş katibi Elxan Məmmədovun dedikləri hökm ola bilməz. Belə ki, ya komanda sayı artırılmalı, ya da həqiqətən 8 komandadan artıq iştirakçının çıxışı mümkün deyilsə, “Kəpəz” diviziona yollanmalı və onu bir başqası əvəz etməlidi.
Bəlkə də bu, adi prosedur olduğundan müzakirəsinə ehtiyac yoxdu. Lakin bəllidi ki, bununla bağlı ciddi suallar var və gəncəlilər hələ də elitada qalacağına ümid edir, stadionda yenidənqurma işləri başlanıb. Divizion klubları, xüsusi ilə qalib “Xəzər” isə güclülər arasında yer istəyir.
Düzdü, lisenziyalaşdırma prosesi ilə bağlı məlumat verilməsi planlaşdırılır. Amma bu, hələ qərar demək deyil.
Əlimizdə olan son məlumatlara görə, İcraiyyə Komitəsinin bəzi güzəştlər edə bilər. Vaxtilə “Rəvan”la bağlı məsələdə olduğu kimi, qurumun məsuliyyəti üzərinə götürərək lisenziya almasında problem olan bəzi komandalara “yaşıl işıq” yandırması mümkündü. Elxan Məmmədov açıqlamasında buna görə nala-mıxa vururdu və o da yekun qərarı İK-nın verməsini gözləyir. Belədə istənilən qərarda məsuliyyət komitənin üzərində olacaq.
“Kəpəz” hər nə qədər AFFA-dan maliyyələşsə də, son vaxtlar Gəncənin hakim dairələri assosiasiyanı kluba yaxın buraxmır. Qurumun göndəriyi İslam Abbasov müqəvvaya çevrilib və klub idaretməsində əsas söz sahibi deyil. Şəhər rəhbərliyi kluba ayrılan maliyyəyə də nəzarət etməkdə israrlıdı və bu, qarşıdurma yaradıb. Bu səbəbdən “Kəpəz”in reqlamentə uyğun olaraq, Premyer Liqadan getməsi reallaşsa, təəccüblənməyə dəyməz.
Hadisələrin hansı axarla gedəcəyinin ssenarisi kabinetlərdə cızılır. Ona görə də hələlik qəti fikir bildirmək olmur. Divizion klublarındakı problemlərin hansı həddə olduğu, güzəştin mümkün olub-olmadığı da az sayda insana məlumdu. Lisenziyalaşdırma qrupunun verəcəyi məlumata ən operativ münasibət isə İK üzvlərindən asılıdı. Katibliyin hökmünü kəsmək bu ali qurumun əlindədi və məhz onların daha cəsarətli olması lazımdı.
Təbii ki, İcraiyyə Komitəsində əksəriyyət yalnız əl qaldırmaqla, baş katibin ssenarisinə razılıq verməklə məşğuldu. Futbolla ciddi bağlılığı olmayan bu insanlar təsadüf nəticəsində qurumdadı və onların futbol idarəetməsində elə bir rolu yoxdu. Elmar Məmmədyarov və ya Firudin Qurbanovu lisenziya prosesi yox, çalışdıqları nazirliklər maraqlandırır; Mahir Məmmədovun proseslərə hansısa təsir qüvvəsi yoxdu; 1-ci vitse-prezident Rauf Əliyev əyləncəli festivallarda açılış etməklə işini bitmiş sayır, onun bacarığı olsaydı, rəhbəri olduğu uşaq futbolu hazırkı bərbad durumda olmazdı; Elşad Nəsirov isə futboldakı klanının maraqlarının qoruyucusudu, onu inkişaf yox, monopoliyasının sabitliyi düşündürür.
Müzakirələrin gedişinə təsir imkanı olanlar futbol veteranlarıdı. İnsaf naminə, bu gün onların İK-da təmsilçilik sayı bütün dövrlərlə müqayisədə daha çoxdu. AFFA prezidentinin də daxil olduğu olduğu 11 üzvdən 4-ü sabiq futbolçudu ki, bu da qərarverici orqanın 40 faizə yaxını deməkdi. Daim futbol idarəçiliyində olan, əvvəllər yalnız futzalda, indi isə həm “Keşlə”də aktiv fəaliyyət göstərən Zaur Axundovu da islahatçı qrupun üzvü kimi göstərmək olar. Bu adamlar problemləri daha yaxşı bilir və doğru yolu müəyyənləşdirməkdə söz sahibi olmalıdılar.
Heç şübhə yox ki, İsgəndər Cavadov, Kazbek Tuayev, Qurban Qurbanov və Vaqif Sadıqov ölkə futbolundakı problemləri daha yaxşı bilməlidi. Və bu gün onlar bayraqdar olmalı, futbolun inkişafı, kütləviləşməsi, bölgələrə diqqət göstərilməsi üçün təşəbbüskar olmalıdılar. Ölkə çempionatında rəqabətin yüksəlməsi üçün onlardan təkliflər gözlənilir. Sabiq futbolçu kimi onlar aid olduqları sahənin durumunu daha yaxşı bilir və onlardan gözləntilər çoxdu. İllərdi kreslo zəbt edən bu insanlar ölkə futbolunun uçurumda olduğu, minimum həddə çatdığı bugünlərdə də səsini ucaltmayacaqsa, onlara güvənməyin faydası yoxdu.
Söhbət diviziondan neçə komandanı və ya komlərinsə yüksəlməsindən getmir. Futbolun kimlərinsə əlində alət olmasından, monopoliyasında qalmasndan, müəyyən dostlar qrupunun əlindən qurtarılmasından gedir. Silkələnmək, böhrandan çıxmaq, inkişaf etmək lazımdı. Əsas azarkeş kütləsi bölgələrdədi və top oyununun əyalətlərə yayılması, bir çox problemlərin həlli üçün söz sahibi olmaq gərəkdi. Baş katibin hörümçək torunu dağıtmaq zamanıdı.
CAVAD