Ölkə futbolu
İntihar edən “Qəbələ”
Hamı ölkə kubokunun Qəbələdə qalacağını gözləyirdi…
Hamı ölkə kubokunun Qəbələdə qalacağını gözləyirdi. Az qala bütün futbol ictimaiyyəti Peşəkar Futbol Liqasının finalı bu şəhərə salmaqla, “qırmızı-qaralar”ın titul həsrətinə son qoymaq məqsədi güddüyünü iddia edirdi.
Şaiyələr həqiqətə də oxşayırdı. Və doğrusu, bir çoxları məhz belə olmasını istəyirdi. Çünki “Qəbələ”nin kuboksuz qalması bu klubun sabahını zülmətə ata bilərdi və təhlükə indi realdı. Sponsorlar futboldan bezib, hər an gedə bilərlər. 2 ildi hər altı aydan bir azaldılan büdcə siqnallar idi. Eyni zamanda Yuri Maksimovdan başqa heç nəyə görə rəğbət doğurmayan qondarma klub olan “Keşlə”nin imici müsbət deyil. Bu o klubdu ki, icraçı direktoru Rəmiş Malıyev az qala hər gördüyü iki adamdan birinə Maksimovdan şikayətlənir, “onun rədd olub gedəcəyi günü” gözlədiklərini deyirdi.
Finalları təşkil etmək üzrə master-klass keçən PFL-in Qəbələ stadionunda yaratdığı ab-hava möhtəşəm idi. Qəbələdə ilk dəfə hətta stadion keçidlərində, tribunaların pilləkənlərində də boş yer yox idi. Yerli klubla birgə əla təbliğat aparılmış, iş görülmüşdü. Azarkeşlər tribunaları doldurmuşdu və mənzərə xoş idi – qalırdı əla futbol oynamaq.
Azarkeş amilindən başqa, statistika, real durum da “Qəbələ”nin xeyrinə idi. “Keşlə” yalnız rəqibin səhvi nəticəsində uğur qazana bilərdi. Və o səhv o qədər böyük oldu ki…
Klub daxilində nə baş verdiyini bilmirik, lakin futbolçularla baş məşqçi Roman Qriqorçuk arasında ciddi problem olduğu dəqiqdi. Ozobiçin və bəzi digər oyunçuların ehtiyatda qalması, Stankoviçin əvəzlənərkən birbaşa paltardəyişmə otağına getməsi adi məqamlar deyildi. Sanki futbolçular bilərəkdən oynamırdı və ya hansısa ciddi qruplaşmalar xaosa səbəb olmuşdu.
Bütün bunları rəhbərlik araşdırmalıdı. İstefa verən Qriqorçukun ardınca göndərilməsi lazım gələn digər şəxslər, o cümlədən xeyli futbolçu var. Və bəlkə də ukraynalı çalışdırıcını saxlayıb, həmin futbolçuları qovmaq daha məqsədəuyğun olardı. Qriqorçuk məşqçi səviyyəsini çoxdan sübut edib və onun xələfi heç də daha yaxşısı olmayacaq.
Amma rəhbərliyin kluba nəzarəti azaltdığı aşkar ortadadı. Yoxsa heç kim cürət edib, komandanı yerli azarkeşlər qarşısında belə rəzil duruma salmazdı. Bəlkə də əyalət klubu ola-ola Qəbələyə qonaq kimi getməyin verdiyi rahatçılığın cəzası belə olmalıydı. Bu rahatlığı təmin edən rəhbərliyi isə alqışlamaq olmur.
“Qəbələ”də Qriqorçuk erası bitdi, amma bu klubun yeganə problemi ukraynalı deyildi. Problem münasibətlərdə, rəhbərlik – məşqçi – futbolçu rabitəsinin pozulmasındadı. Və təəssüf ki, bütün bunlar komandanın başında çatladı, favorit olduqları görüşdə “Keşlə”nin titula uzanmasına şərait yaratdı. Ümid edək ki, “Qəbələ” sıradan komandaya çevrilməyəcək və iddiasını, müstəqilliyini yenə qoruyacaq.
CAVAD
- Premyer-liqa2024-04-14 20:55
“Qarabağ” “Sabah”a uduzdu
- Premyer-liqa2024-04-14 22:16
“Bir rəqiblə 4 dəfə oynamaq bizim üçün maraqsızdır” – Qurbanov
- Ölkə futbolu2024-04-15 10:17
“Qarabağ” üçün daha iki potensial rəqib
- Ölkə futbolu2024-04-16 13:19
AFFA-da fırtınaqabağı sakitlik: maliyyə yoxlaması davam edir