Ramin Musayev: “Bu il "Neftçi"nin ili olmalıdır”

Topaz Premyer Liqasının növbəti mövsümünün püşkü atıldı. Futbolinfo.az xəbər verir ki, I Divizionun da reqlamenti bugünlərdə bilinəcək. Müzakirələrin mərkəzində Peşəkar Futbol Liqasıdır. Qurumun prezidenti Ramin Musayevin gündəmdəki əsas mövzularla bağlı "FutbolPress"ə müsahibəsiylə tanış olaq:

– PFL-in büdcəsi azaldılıb?
– Heç bir qurum öz büdcəsini açıqlamır, ancaq püşkatmadan sonra konfransda açıqladım ki, "Topaz"la illik 600 min manat sponsorluq müqaviləsi bağlamışıq. Bunu ona görə etdim ki, PFL-in layihələri icra edilmir deyənlər görsünlər, bizim bu qədər pulumuz var və bu pula lazım olan işləri görürük, görəcəyik.

– Amma "Topaz"ın sponsorluğu büdcənin bir hissəsidir.  PFL-in 2 milyon manat həndəvərində büdcəsi olub. Son illər maddi imkanınız bu qədər deyil, aşkar görünür, hiss edilir.
– Nə çatışmazlıq olanda Rövnəq müəllim dərhal həll edir, narahatlıq olmur. Büdcə həminkidir, sadəcə, əvvəllər sponsorluq müqavilələri daha çox olurdu, indi az, əvvəllər legionerə görə 20 min rüsum alınırdı, indi 5 min, onu da hamısı ödəmir. Büdcəyə təsir eləyən bu  şeylərdir.

– Ödənişləri etməyən klublara sanksiya tətbiq etmək hüququnuz var.
– Bu mövsümdən artıq belə olacaq. Legionerə görə rüsum ödəməyən klub həmin legioneri oynada bilməyəcək.

– Yeni yaradılan klublar guya yerli futbolçuların yetişdirilmsinə xidmət edəcəkdilər, onlar da durmadan legioner gətirir…
– Görürük bunu. Bilirsiz, əsas məsələ legioner gətirmək deyil, nə cür oyunçu gətirməkdir. Rövnəq müəllim İcraiyyə Komitəsnin son iclasında bir daha vurğuladı, legioner gətirib oynatmayacaqsınızsa, gətirməyin. Bir legioner təkcə transfer məbləği demək deyil, onun çoxlu yol xərcləri, özünün və ailəsinin burda qalması xərcləri var. Oynadılmayacaq oyunçuları gətirmək ciddi səhvdir. Legioner yerli oyunçudan birbaş üstün olmasa, onu qətiyyən gətirmək olmaz. Klublar bu məsələdə diqqətli olmalıdır. Bəzi klubların seleksiya işi əməlli-başlı problemdir. Qətiyyən qəbul oluna bilməz, bu barədə ciddi ölçülər götürülməlidir. Əksər klubların büdcəsinə AFFA kömək edir, ona görə də heyəti quranda hansı futbolçuları gətirdiklərinə diqqət yetirsinlər.

– Elə bil, PFL əvvəlki qədər aktual, gümrah deyil, yoxsa mən elə görürəm?
– PFL-in Azərbaycan futbolunda rolunu dana bilmərik. Bizə tapşırılan sahənin nizamlı, intizamlı olması üçün əlimizdən gələni etdik və nail olduq. Azərbaycan klub reytinqində autsayderlərdən ortabablar sırasına qalxdı, hətta daha da irəliyə getdi. Hakimlərin şəffaflığı üçün həmişə çalışdıq və nail olduq.

– Hakimlərin yay toplanışı niyə olmadı?
– Yay toplanışında qışdan fərqli olaraq klublarımız müxtəlif yerlərdə olurlar. Qışda isə hamısı Antalyada olur, ona görə də hakimlərimizin oyun idarə eləməsi, hazırlığının səviyyəsini yoxlamasına imkan olur.

– Qış tolanışı planda var?
– Bəli, hakimlərin qış toplanışı olacaq.

– İcraiyyə Komitəsinin son iclasından sonra məlum oldu ki, I Divizionla əvəzedicilərin yarışı birləşəcək. Bu, qarışıqlıq yaratmayacaq ki?
– Problem yoxdur. Düşünülüb, planlaşdırılıb, qəbul edilmiş qərardır. Yaş limiti məsələsini də qəribçiliyə salmaq lazım deyil, tezliklə faydasını görəcəyik.

– İK-nın son iclasından sonra edilən müzakirələrdən sonra belə məlum olub ki, yeni formata əsasən, I Divizionda iştirak etmək istəyində olan "Xan Lənkəran" bundan məhrum olacaq. Problem nədədir?
– I Divizionda iştirak etmək istəyən klub artıq ciddi, formalaşmış klub olduğunu göstərməlidir. Mən bu klubu yaratmaq istəyənlərlə danışmışam, demişəm ki, dəstəyəm, dəstək olacam da. Ancaq bircə il Region Liqasında çıxış etsinlər, biz də, onlar da, hamı görsün, ondan sonra heç bir problem olmayacaq.

– Deyirlər, Ramin Musayev "Xəzər Lənkəran" istəsin, Premyer Liqada oynamasına da icazə verərik" deyib, fərqi nədir, bu da Lənkəran klubudur…
– "Xəzər Lənkəran" Azərbaycanda ən böyük imkanları olan klublardan idi. Bazası, möhtəşəm stadionu, akademiyası, hansı ki, indi də fəaliyyətdədir. Bu klubu bu dəqiqə Premyer Liqaya burax, hazırdır çıxış üçün. Ancaq "Xan Lənkəran" hələ formalaşmalıdır, klublaşmalıdır. Sıfırdan yaradılan və hələ formalaşmayan klub əvvəlcə Region Liqasında bircə il özünü göstərsin, AFFA da xeyir-duasnı versin də.  Yoxsa elə sizin də gözünüzün qarşısında olub, nə qədər klub söz verib, amma yalançı çıxıb. Hamısının əziyyətini AFFA çəkib. Daha sözə, vədə görə zamin durmaq yoxdur, nəticədə səhv etmiş olarıq. Məsuliyyəti boynumuza götürməkçün konkret görməliyik, inanmalıyıq. Yoxsa bunu Lənkəran futboluna, Cənub futboluna AFFA-nın qərəzli mövqeyi kimi təqdim eləmək lazım deyil.

– Region Liqasında oynasalar, qalib olsalar, zəmanət varmı Diviziona buraxılacaqlarına?
– Zəmantə nə gərək, Region Liqasında bir mövsüm çıxış etsinlər, problem olmayacaq, I Diviziona buraxılacaq.

– "Neftçi" haqda soruşmaq istəyərdim, bilmirəm danışmaq istəyərsinizmi…
– Hər mövzuda danışmağa hazıram, buyurun sualınızı.

– Bir keçmiş "Neftçi" idarəçisi kimi, hazırkı durumunu necə görürsünüz?
– Keçmiş yox, mən həmişəlik "Neftçi"liyəm və bunu daim demişəm. Başqa klublarımız inciməsin, hamısı doğmadır, əzizdir, ancaq "Neftçi" Azərbaycan futbolunun tarixidir.

– Tariximizi simvolizə edən klubun hazırkı durumu, gələcəyi haqda nə fikriniz var?
– Avropa Liqasına vəsiqə qazandılar, ancaq Macarıstan klubunu səriştəsizlikdən keçə bilmədilər. "Neftçi" sırf arxayınlığın qurbanı oldu. Bu, baş məşqçinin günahıdır. Necəsə komandanı formada saxlamlıydı. Mən ilk oyundan sonra düşündüm ki, "Neftçi" bu futbolla macarları rahat keçəcək, hətta "Sevilya"ya ciddi rəqabət göstərəcək. Səfərdəki oyun göstərdi ki, komandanın zəifliyi deyil əsas səbəb, yalnız və yalnız arxayınlıq idi.

– İndi klubun AL-dəki uğursuzluğu unutdurmaqçün əsas hədəfi ölkə çempionu olmaqdır. "Qarabağ"ın hegemoniyasına qarşı bunu gerçəkləşdirə bilərlər?
– Niyə də yox?

– Maraqlı cavabdır. Komandanın bu potensialını görürsüzmü?
– Əlbəttə, görürəm. Komandanın hər mövqeyində yaxşı oyunçular var. Hər imkan yaradılıb. Hazırda çempionatda ən yaxşı imkan "Neftçi"dədir. Bu il "Neftçi"nin ili olmalıdır.

– Kapitan Ruslan Abışov azı 5 ay meydana çıxa bilməyəcək. Püşkatmada bu məqamı qabardıb, ironik bir söz işlətmişdiniz…
– Bəli, Ruslan yoxdur, indi millidə müdafiənin mərkəzində kim oynasın? Rəşad Sadıqov? Etibarlı oyunçu yetişibmi?

– Təqsirkar?
– Hamımız!

– Ramin müəllim, aşağı yaş liqaları nə vəziyyətdə keçirilir, bilirsiniz. Nə AFFA-nın yaratdığı "CBC Sport" o sektoru diqqətdə saxlayır, nə yazılı medianın imkanı var işıqlandırsın. Liqalar bərbad vəziyyətdədi. Ona görə də aşağı yaş millilərinin nəticələri də pisdi. Hələ qələbə üzü görməyiblər. Bu durumda hələ AFFA millidən Millətlər Liqasında qalib gəlib, Avropa Çempionatına vəsiqə qazanmağı gözləyir, hətta şərt kimi qoyur. Nə məsələdir, hansı əsasla bu təbliğatı qurur assosiasiya rəhbərliyi?
– AFFA neyləməlidi, deməlidi ki, Millətlər Liqasında sadəcə iştirak edirik?

– Nə qədər problem sadaladıq. Üstəlik, bu problemlərin həlli üçün real islahatların, layihələrin tətbiq olunması  da gözlənmir. Bəs millinin uğurlu nəticəsi üçün yenə əcnəbilərə ümid bağlayaq?
– Mən Qurban Qurbanovun məşqçi bacarığına hamıdan çox güvənirəm. Millətlər Liqasında da yaxşı oynayacağımıza əminəm. Nəticələr isə mütləq yaxşılaşacaq. Gec, ya tez – bu, mütləq olacaq. Tələsmək qətiyyən olmaz. Hamımız birləşməliyik bu məsələdə.