Ölkə futbolu
Baş katibin boş bəhanəsi
Elxan Məmmədov yenə yalan danışır, manevr edir, camaatı barmağ…
Elxan Məmmədov yenə yalan danışır, manevr edir, camaatı barmağına dolayır. Özünü ağıllı göstərən bu şəxs niyyətini bəhanələrin arxasında gizlədir.
AFFA-nın baş katibi ötən həftə radioda çıxışı zamanı hakimlərin hazırlığından da danışdı. O, ədalət təmsilçiləri üçün toplanış təşkil edilməməsini əsaslandırdı. Hakimlərin ölkə xaricinə çıxmaması haqda danışan katib, buna ildə bir dəfə ehtiyac duyulduğunu bildirdi. Qışda Antalyada olmuş hakimlər bu səbəbdən yayda vətəndə qalmalı olub.
Hələ ki, toplaşmayan, deməli, mövsümə hazır olmayan hakimlərin mümkün səhvləri üçün də Məmmədovun bəhanəsi hazırdı. O, məsuliyyəti Hakimlər Komitəsinin üzərinə atır: “Ölkəmizdə də toplanış keçmək üçün şərait var. Şimal rayonlarında havalar münasibdi və biz hazırlıq üçün şərait yaratmağa hazır idik. Amma komitə rəhbərliyi bunu istəmədi”.
Məmmədovun bəhanəsi yersizdi. Katibin dediklərini şərh edəcək qədər cəsarəti olmayan Xaqani Məmmədov susur. Sabah bütün məsuliyyəti çiynində daşıyacaq komitə sədrinin əvəzinə biz cavab verək.
Cənab Elxan bəy, hakimlərin fiziki hazırlığını qaydasına qoymaq üçün Bakıdan çıxmağa ehtiyac yoxdu, elə nəzəri bilikləri də AFFA-nın bunasında bir araya gəlib yaxşılaşdırmaq olar. Klublar bunu ölkə xaricində edir, amma onların səfərə çıxmasının əsas səbəbi səviyyəli rəqiblərlə üz-üzə gəlmək istəyidi. Hakimlərə də belə oyunlar lazımdı ki, təcrübələrini artırsınlar. Şimal rayonlarında məhz bu imkanlar yoxdu. 10 illik hakimiyyətiniz dövründə sayəsində bölgələrdə məhəllə komandaları da qalmayıb ki, hakimlər onların oyununu idarə etsin.
Belə ucuz bəhanələrdənsə, etiraf edin ki, hakimlərin səhv etməsində maraqlısız; onlar üçün büdcədə nəzərdə tutulan pulu özünüzə lazım olan başqa sahələrə sərf etmisiz və s. Bəri başdan deyək ki, sabah hakimlərin edəcəyi hər bir səhv sizin vicdanınıza yazılacaq.
AĞA