Layihə
GÜNÜN NİDASI: Belə halların yaşanması sistemdəki boşluqların nəticəsidir!
Texniki məğlubiyyətlərin sayı durmadan artır. Səbəblər mü…
Texniki məğlubiyyətlərin sayı durmadan artır. Səbəblər müxtəlif olsa da, nəticə birdi.
Cari mövsümün ilk 8 turunda təkcə Premyer Liqada 2 belə halın baş verməsi problemin ciddiliyindən xəbər verir. Klub nümayəndələri, məşqçilər günahlandırılır, eyni zamanda hakimlərin də belə yanlışların olmaması üçün işə cəlb olunmasının vacibliyi bildirilir.
Əslində, necə olmalıdı? Suala sabiq FIFA referisi, müxtəlif klublarda məsul post tutmuş mütəxəssisimiz Tahir Süleymanovun şərh verməsini istədik:
“Texniki məğlubiyyətlərlə bağlı məsələyə ikili yanaşmalar var. Limitlərlə bağlı müəyyən məsələlər var, amma bu, bəhanə ola bilməz. Elə də çətinlik yaratmayan işdi. Nəzarət başqa, məsuliyyət başqa.
Komandaların heyətlərinə, futbolçuların adlarının protokola yazılmasına rəsmi imzaları ilə məsuliyyəti klublar, rəsmi nümayəndələr daşıyırlar. Hakimlər protokolun səliqəli doldurulmasına, oyundakı sarı, qırmızı kartların, hadisələrin qeyd olunmasına və s. cavabdehlik daşıyırlar. Hakimlərin funksiyasına texniki zonada qaydalara uyğun davranış, intizamla bağlı nəzarət də daxildir.
Beynəlxalq futbol qanunları, FIFA, UEFA-nın, qaydalara uyğun hər bir yarışın öz tələbləri var. Çempionlar Liqası, Avroliqanın sifariş vərəqi heç də mürəkkəbliyi ilə daxili çempionatdan asan deyil. Orada da klubun öz yetirmələri ilə bağlı tələblər mövcuddur. Elə bu mövsüm tələblərə görə "Qarabağ" vəziyyətdən çıxmaq üçün 5 qapıçı sifariş etməyə məcbur oldu.
XXI əsrdə yaşayırıq. Futbolçulara şəxsi vəsiqələrin verilməsi ötən əsrdə qalıb. Nə ÇL, nə də Avroliqada buna ehtiyac duyulmur. Güclülər dəstəsi həvəskalar liqası, uşaq yarışları deyil. Hər tur, hər oyun canlı yayımlanır, ictimai nəzarət var. Hər oyundan sonra mütləq mətbuat konfransları keçirilir. Protokolda, oyunun gedişində saxtakarlıq etmək belə mümkünsüzdür. Premyer Liqada protokol otağında futbolçuların şəxsi kartlarının yoxlanılmasına heç bir ehtiyac yoxdur. Çempionatdan öncə ümumi sifariş vərəqi təqdim edilərək təsdiq edilir. Klublar oyuna çıxacaq heyətə, texniki zonada olacaq məşqçilərə, futbolçulara, protokolun doldurulmasına birbaşa məsuliyyət və cavabdehlik daşıyırlar. Qanunlar da müzakirəsiz bildirir ki, qaydalar pozularsa, texniki məğlubiyyətdir.
Hakimlər texniki zonada əyləşən futbolçuları tanımaq məcburiyyətində deyillər və ya istintaq aparıb əllərində kartla onları yoxlamağa da ehtiyac yoxdur. Hakimlərin vəzifəsi start fitinə kimi prosedurları həyata keçirib oyun ərzində görüşü yüksək səviyyədə idarə etməkdir. Klublar hakimlərdən obyektivlik tələb etdikləri kimi öz vəzifə və səhvlərini onların üzərinə qoymamalıdırlar.
Artıq uzun illərdir kütləvi hal alan bu tipli məsələlərin səbəbləri var. U-21, klublarımız Avropanın məsul yarışlarında qırmızı kart cəzası ilə bağlı texniki məğlubiyyətlər alıblar, indi çempionatda belə vəziyyətlər yaşanır. Bu, ümumi futbolumuzun imicinə böyük zərbə vurur. Futbol idarəçiliyi, klub/komanda anlayışı fərqlidir.
Hər bir işi baş məşqçi, köməkçilər, hakimlərin üstünə yükləmək də doğru deyil. Peşəkarlqdırsa, buna uyğun da sistem formalaşmalıdır. Ümumi təşkilatçılıqda, klublarda olan boşluqlar belə fəsadlara yol açır. İdarəçilik sistemində boşluqlar olmamalıdır. Böyük futbolda bir xırda səhv, səhlənkarlıq problemlər yarada bilir. Bizimlə birgə çalışanlar gözəl bilirlər, "Neftçi"də neçə-neçə bu tipli texniki məğlubiyyətlərin qarşısını vaxtında almışıq. Məşqçilərin oyuna, futbolçuları son anda görüşə kökləməyə, hazırlamağa başları qarışıq olur. Onlara təşkilati işlərdə mütləq kömək, yardım, nəzarət lazımdır. Vaxtilə öncədən, məşqçilər heyəti bildirdikdən, yoxladıqdan sonra Bəxtiyar Musayevlə Gündüz Abbassazdə protokolu doldururdu, ilk nüsxəsi məndə olurdu, öncədən məşqçilərə hər şeyin qaydasında olduğu bildirilirdi. Baş məşqçi və futbolçuların düşüncəsi ancaq 90 dəqiqə oyunda, qələbə qazanmaqda olmalıdır.
Belə halların yaşanması sistemdə baş verən boşluqların nəticəsidir! AFFA, PFL, klublar bu məsələyə daha peşəkar, həssas yanaşmalıdırlar”.
- Ölkə futbolu2024-05-06 10:08
“Dinamo” Mahiri satmaq istəyir, amma…
- Milli komanda2024-05-06 15:32
Millimizin yoldaşlıq oyununda daha bir rəqibi müəyyənləşdi
- Digər idman növləri2024-05-06 17:45
AVF rəhbərliyi Antalyada milli üzvləri ilə görüşdü
- Milli komanda2024-05-06 13:09
Aqolli: “Azərbaycanın rəqib seçilməsi doğru addımdır”