Layihə
GÜNÜN NİDASI: Bu, onların son mövsümüdü!
Topaz Premyer Liqasının cari mövsümü 2 klub ü&cc…
Topaz Premyer Liqasının cari mövsümü 2 klub üçün pis keçir. “Keşlə” və “Zirə” son 2 pillədə qərarlaşmaqla digərlərindən geri qaldıqlarını göstərirlər.
“Qəbələ”nin də vəziyyəti yaxşı deyil, hətta mövsüm bitəndə sponsorların bu komandadan imtina edəcəyi haqda söz-söhbət var. Lakin əla təlim-məşq bazasını, klub ənənələrini və yeganə bölgə klubu olduğunu nəzərə alsaq, “qırmızı-qaralar”ın yaşama ehtimalı çox böyükdü. AFFA lazım olsa, özü sponsorluq etməklə klubu yaşadacaq.
“Keşlə”nin də arxası var. AFFA-nın klubu ötən il dağılmadısa, deməli, duruş gətirəcək. Ən pis zamanında ayaqda saxlanılan bakılılar rəhbəri Zaur Axundovun sayəsində yenə elitada mübarizə aparacaq. Klubun adının “Keşlə”yə dəyişdirilməsi də təsadüfi deyildi, assosiasiyadan yardım alması üçün hər şey edilib.
Ən pis durum “Zirə”dədi. Klub toparlanıb son pillədən çıxa bilməsə, nəinki elitanı, ümumiyyətlə, futbol səhnəsini tərk edəcək. Klubun alababat bazası sizi aldatmasın, ondan AZAL-da da var idi, daha yaxşısı “Bakı”da da. “Zirə” rəhbərliyinin uzunmüddətli planları yoxdu, nələri var idisə ötən illərdə göstərdilər, tükəndilər.
“Zirə” klub olaraq böyüyə bilmədi. Akademiya, məşq meydanları baxımından heç bir irəliləyiş yoxdu, əksinə, əsas komandanın büdcəsi də hər il azalır. Nəticələrin pisləşməsi ilə rəhbərliyin ciddiliyi də ortadan qalxır. 5-6 nəfərin çiynində olan klub belə idarəçiliklə yaşamağı haqq etmir.
Əldə etdiyimiz məlumata görə, sponsorlar da klubu böyük xərc çəkərək elitada saxlamaq marağında deyil. Qışda hər hansı ciddi transfer, güclənmə cəhdi olmayacaq. Sonuncu pillə tutulsa, güzəşt istənməyəcək, minimal vəsait klubun diviziondakı farm-klubu “Şüvəlan”a yönəldiləcək və bu komandanın Premyer Liqada oynamasına çalışılacaq. Kəsəsi, qışda möcüzə baş verməsə, “Zirə” elitada son mövsümünü keçirir!