Ölkə futbolu
Uduzmaq üçün mübarizə
Turun “Sumqayıt” – “Qəbələ” oyunu &c…
Turun “Sumqayıt” – “Qəbələ” oyunu çox qəribə alındı. Matçın sonlarındakı dava-dalaş öz yerində, meydandakı futbol fərqli idi. Məşqçilər sanki uduzmaq üçün bəhsə girmişdilər və sonda bunu da heç biri bacarmadı.
“Qəbələ” “Neftçi” üzərində qələbədən sonra özünə gəlməliydi. “Sumqayıt”ın son turlar uğursuz oynaması isə əlavə motivasiya idi. Lakin oyunun startı elə alındı ki, “qırmızı-qaralar” tarixinin ən böyük yenilgisini də ala bilərdi.
Ardıcıl 2 qol buraxdığı üçün “Qəbələ” şükür etməlidi. Çünki daha artığı ola bilərdi. “Sumqayıt”ın fasiləyə kimi 10-a yaxın real qol şansı qazandığını nəzərə alsaq, başqa düşüncəyə ehtiyac qalmır. 3 dəfə zərbələrin qapı tirindən qayıtması, 2 dəfə dirəkdən fərqlənməyən Atilla Yıldırımın bədxərcliyi həm də bəxt məsələsi idi.
Ən pisi odu ki, qonaqların baş məşqçisi bu dəqiqələrdə oyuna müdaxilə edə bilmirdi. Sənan Qurbanovun yetirmələri sürətli, kombinasiyalı oyun quran rəqibə qarşı başsız atlı kimi idi. Halbuki hücuma hücumla cavab vermək əvəzinə futbolçular top saxlasa, oyunun tempini öldürsəydi, heç ikinci qol vurulmazdı. “Qəbələ” bunu fasilə ərəfəsində anladı və təsadüfi qol da vurdu. Rəqib müdafiəçilərlə qapıçının anlaşmazlığından sonra Stiven Monrozun ustalığı sözünü dedi.
Eyni səhvi bu dəfə Nazim Süleymanov etmişdi. “Sumqayıt”ın baş məşqçisi oyuna müdaxilə etmədi, taktikanı dəyişmədi və sürət yarışında yetirmələrinin gücü tükəndi. “Qəbələ”nin təşəbbüsə yiyələnməsi də bununla bağlı idi.
Fasilədə Sənan Qurbanovu ayıltdılar. İkiqat əvəzləmədən sonra artıq qonaqlar diqtə edən tərəf idi. Bunun nəticəsində bərabərlik qolu da vuruldu. Və bu anda, hər şeyin əla getdiyi məqamda Rauf Əliyevin əvəzlənməsi komandanı tormozladı. Düzdü, bu hücumçu da yaxşı vəziyyətdə deyildi, amma meydana çıxan Asif Məmmədovdan daha faydalı görünür, rəqib müdafiəsini narahat edirdi. Asifin meydana çıxması ilə hücumda anlaşma pozuldu.
Süleymanov da “borclu qalmadı”, oyuna heç bir müdaxilə etmədi, rəqibin hədiyyəsindən imtina etdi. Belədə meydandakı ab-havanı yalnız futbolçular müəyyən etməyə başladı. Sərkərdəsiz ordu isə məğlubiyyətə məhkum idi, hər iki tərəf ağ bayraq qaldırınca sülh rəsmiləşdi.
İlk yarıda fantastik oynayan meydan sahibləri bir neçə dəfə hakim səhvi də gördü. Epizodların birində Rasim Ramaldanov rəqibi tutub saxladı, əla hücumun qarşısını aldı. Hakim Orxan Məmmədov nəinki vərəqə vermədi, heç oyunu da saxlamadı. “Qəbələ”nin ilk qolundan öncə də şübhəli vəziyyət var idi. Hücum Aleksey İsayevin cərimə meydançasında kobudluqla dayandırılmasından başladı. Hakim “davam” işarəsi verdi, əks-hücumdan sonra isə hesab arasındakı fərq azaldı.
İstənilən halda, 2:0-ı əldən verən məşqçi ən azı yetirmələri qarşısında günahkardı. Dubl edən Şəhriyar Əliyev matçın gedişindəcə Süleymanovdan dəyişiklik, əks-hücum taktikasına keçməyi tələb edirdi. Amma Nazim bəy belə düşünmədi və cəzalandı. Bir az hakim, bir o qədər də məşqçi səhvi fasilədən sonra ayılan Qurbanovun üzünü güldürdü.
Bu nəticəyə rəqiblər daha çox sevindi. Avrokuboklara vəsiqə uğrunda mübarizədə hər iki komanda yara aldı. Düzdü, hələ nəticə çıxarmaq üçün tezdi, lakin sonda arzuların üstündən məhz belə səhvlər xətt çəkir.
FƏRİD