Ölkə futbolu
Liderlərin qiyabi dueli: büdrəyən olmadı
“Neftçi” eyni üslubda oynamağa və qələbə …
“Neftçi” eyni üslubda oynamağa və qələbə qazanmağa davam edir. Bəzən komanda yaxşı oynamır, bəxt gətirir, amma əsas olan pis görünərkən də 3 xal əldə etməkdi. “Neftçi”ni zirvədə saxlayan da bu amildi.
Roberto Bordinin resepti “Keşlə” ilə oyunda da işə yaradı. 2-ci dəqiqədə özünü qolçu kimi isbatlamaqda olan Mirabdulla Abbasov fərdi bacarığı sayəsində hesabı açdı, qalanı isə italiyalının öhdəsinə düşdü. O, yaxşı müdafiə qurdu, hətta Kiril Petrovun yoxluğunda da arxa xətt axsamadı. Ömər Buludov, son dəqiqələrdə Elvin Sərkərov kimi gənclər də ümumi uğura töhfə verdilər.
“Neftçi” sadə oynayır, qol buraxmamaqla matç qazanır. Risklidi, azarkeşlər 90 dəqiqə ərzində təşvişdə olur, lakin qələbə gətirəndisə, Bordinin taktikasından gileylənmək lazım deyil. Düzdü, Qəbələdəki kimi, ilk qolu “Neftçi” buraxanda vəziyyət acınacaqlı olur. Amma Azərbaycanda Bordindən daha yaxşı olan məşqçilərin sayı çox deyil, üstəlik, heyət baxımından da italiyalının imkanları daha genişdi.
Tərlan Əhmədov “Keşlə”ni canlandıra bilib. Hər yeni məşqçi gələndə adətən belə qığılcımlar olur, lakin alova çevrilmədisə, qələbəyə dönmədisə, o qığlcımlar da faydasızdı. Əhmədov keçmiş komandası ilə oyunda məhz bunu gördü – ümidverici oyun və qələbəsizlik. Burada “Neftçi”nin matça rahat hazırlaşması, “Keşlə”nin isə üç gündən bir oynamasının da rolu var idi.
Liderin qələbəsindən sonra “Qarabağ”ın büdrəməyə haqqı yox idi. 5 xallıq fərq artsaydı, ağdamlılar çempionluq yarışından uzaq düşə bilərdi. Bu səbəbdən Qurban Qurbanov “Sumqayıt”la matça ciddi yanaşdı və yetirmələri məşqi xatırladan oyundan üstün ayrıldı. İlk yarıda qonaqlar nisbətən müqavimət göstərsə də, fasilədən sonra tam təslim oldular.
“Azərsun Arena”da projektorlarla bağlı yaranan texniki problem üzündən ağdamlılar rəqibini Respublika stadionunda qəbul edirdi. Bu idman qurğusunun boş qalması təəssüf doğurur, amma reallıqdı. Şəhərin mərkəzində yerləşən, çox rahat, əla auraya malik “Tofiq Bəhramov”da oyun zövq verirdi. Hətta tribunaların boşluğu da mane olmurdu.
“Qarabağ” hər hissəyə bir qol vurub “Vorksla” ilə matç öncəsi özünə gəldi. Hannes Halldorsonnun ölkəmizdə olduğu müddətdə ilk dəfə top buraxmaması da diqqət çəkdi. O, 2 epizodda rəqibin real şansının üstündən xətt çəkdi və formaya düşdüyünü isbatladı.
“Sumqayıt”ın enişi davam edir. Ardıcıl 4 oyunda qələbəsiz qalması komandanı hədəflərindən uzaqlaşdırır. Düzü, rəqibi nəzərə alsaq, qonaqların məğlubiyyəti başadüşüləndi. Ancaq iş ondadı ki, “Sumqayıt” müqavimətsiz təslim oldu. Həmişə temp müəyyənləşdirən, sonadək mübarizə aparan Nazim Süleymanovun yetirmələri yorğun rəqib qarşısında çarəsiz görünürdü. Nə məşqçi müdaxiləsi gördük, nə futbolçu fədakarlığı, sadəcə, 90 dəqiqəni yola, 3 xalı rəqibə verdilər.
Qonaqların fiziki cəhətdən çatdırmaması, fasilədən sonra əldən düşmələri sanki məşqçilərin səhviydi. Qüvvənin doğru bölüşdürülməməsi bir yana, matçdan öncə 40 dəqiqəli isinmə hərəkətləri belə nəticələnməliydi. Süleymanov yetirmələrini matça kimi yormuşdu.
Turun ilk gününün qalibləri liderlər oldu və sensasiya baş vermədi. “Qarabağ”ın həyəcanı qismən aradan qalxdı və çempionluq mübarizəsi indi daha maraqlı keçəcək. Qışa kimi qalan oyunların nəticəsi yazda çox şeyi həll edə bilər.
FƏRİD