Ölkə futbolu
Şust: “Qarabağ”a qarşı açıq futbol oynamaq böyük səhv olar”
Avropa Liqasında qrup mərhələsinin 4-cü turu çər&cced…
Avropa Liqasında qrup mərhələsinin 4-cü turu çərçivəsində “Qarabağ”la qarşılaşacaq Ukraynanın “Vorskla” klubunun qapıçısı Boqdan Şustun futbolinfo.az-a müsahibəsi:
– “Qarabağ”la növbəti oyuna hazırsız?
– Bizi çox çətin qarşılaşma gözləyir. Bakıda artıq üz-üzə gəlmişik. Təsəvvürümüz var ki, necə rəqibə qarşı oynayacağıq. Buna görə də rəqibin oyun üslubuna bələdik. Məşqçi heyəti bizə daha ətraflı başa salacaq ki, necə oynamaq lazımdı. Sabah həqiqətən maraqlı qarşılaşma olacaq.
– Bakıdakı oyunda qalib gələcəyinizi gözləyirdiniz?
– Biz həmişə meydana maksimum nəticə üçün çıxırıq. “Qarabağ”la oyun da bu qarşılaşmalardan biri idi. “Qarabağ” elə rəqibdi ki, ona qarşı açıq futbol oynamaq olmaz. Biz müdafiədə daha inamlı oynayıb əks-hücumlarda qol vurmaq taktikasının seçdik. Düşünürəm ki, bu işimizə yaradı və bizə 3 xal qazandırdı. Azərbaycan təmsilçisinin gücü ortadadı və onlara qarşı belə oynamaq lazım idi.
– Məsələn, “Qarabağ”ın hansı oyunlarına baxıb bu taktikanı seçmişdiniz?
– Ötən il Çempionlar Liqasında yaxşı təsir bağışlamışdılar. Bu il də təsnifatda və qrupda yaxşı oyun göstərə biliblər. Ümumiyyətlə, Avropada çox təcrübəsi olan komandalara qarşı oynamaq asan deyil. “Qarabağ” da bu rəqiblərdən biridi. Düzdür, ötənilki ilə müqayisədə heyət dəyişib. Amma yenə də komanda gücünü qoruyur. Bizim də bir çox suallarımız var.
– Bakıdakı qələbə sizi qrupdan çıxmaq baxımından ümidləndirib?
– Bizim uğur qazanmaq istəyən böyük bir heyətimiz var. Bacardığımız qədər meydanda mübarizə aparmaq istəyirik. Lakin belə böyük turnirlərdə kifayət qədər təcrübəmizin olmaması ziyanımıza işləyən amildi. Amma əzmkarlığımıza güvənirəm.
– “Qarabağ”la oyun sizin üçün bu baxımdan çox vacibdi?
– Poltavada şanslar 50-50-yə olacaq. “Qarabağ”la matç bizim üçün vacib olsa da, rəqibin təcrübəsi və gücü var. Azərbaycan klubu fərdi keyfiyyətli usta futbolçulardan qurulmuş kollektivdi. Belə komandalarla oyunda 100 faiz qalib gələcəyini demək mümkün deyil. Çalışacağıq ki, şanslarımızı artırmaq üçün 3 xalı əldə edək.
– “Qarabağ” Bakıdakı oyunda tam gücünü ortaya qoya bildimi?
– Onların oyun üslubunu əvvəlcədən bilirdik. Yəni matçları izləmişdik və bilirdik ki, Ağdam klubu topla daha çox davranacaq. Onlara uyğun davrandıq. Taktikamız tamamilə rəqibin oyununu zərərsizləşdirməyə hesablanmışdı və alındı. Baxımlı futbol üçün açıq oyun göstərsəydik, böyük səhv edərdik.
– Qələbənizi həm də rəqib qapıçı Vaqnerin hesabına yaza bilərsiniz…
– Heç bir qapıçı bu cür səhvlərdən sığortalanmayıb. Amma burada Avropa Liqası üçün düzəldilən topların keyfiyyətini də nəzərə almaq lazımdı. Qapıçılar üçün çox əlverişsiz toplardır. Ani olaraq öz trayektoriyasını dəyişə bilirlər. Bu da bizə çox çətin olur.
AĞA