Ölkə futbolu
“Əlincə”də əyləncə
1:4, 0:4 – “Sabah”da belə tutulmalar olur. Debü…
1:4, 0:4 – “Sabah”da belə tutulmalar olur. Debütantdı, bəlkə də normaldı. Zədəli bolluğunu da nəzərə alsaq, lider komandalardan birinə yenilmək faciə sayılmamalıdı.
Lakin pis olan hesabın darmadağın həddinə çatmasıdı. “Sumqayıt”a yenilgini qəza saymaq olardı, evdə növbəti dəfə 4 qol buraxmaq, bu qədər asan təslim olmaq yüksək hədəfləri olan komandaya yaraşmır. Deməli, haradasa səhv buraxılıb ki, komandanın hətta müqavimət göstərməyə, nəyisə dəyişməyə də gücü yoxdu.
Aylardı, günlərdi “Sabah”ın komplektləşməsində qüsurlar olduğunu vurğulayırıq. Marko Deviçdən asılılq üzündəndi ki, belə məğlubiyyətlər yaşanır. Komandanın işinin yarısını bir nəfər görürsə, onun yoxluğunda darmadağın qaçılmazdı. Deviç həm özü qol vurur, həm də komandanı oynadırdı. Onun yoxluğunda isə faktiki, “Sabah”ın lideri, oyunu dəyişəcək, fərq yaradacaq kimsəsi yoxdu.
Cavid İmamverdiyev? Qətiyyən! Hətta kapitan sarğısı da ona ağırlıq edir. Əhval-ruhiyyə oyunçusu olan yarımmüdafiəçi yoldaşlarını arxasınca aparmaq gücündə deyil. Onun qüsurları məhz belə oyunlarda üzə çıxır. Qamçısız qaçmağı yoxdu, qamşılamaq da Elşad Əhmədovun stili deyil.
Ümumiyyətlə, heyət çox qocadı. Erik Ramos orta sahənin ağırlığını daşıya bilmir, işlər yaxşı gedəndə ansamblda mühüm rol oynayır, kritik anlarda isə o da ümumi axarı dəyişməyi bacarmır. Miloş Bosançiçin dünən etdiyi ötürmə səhvləri, top itkiləri də mətbuatın haqlı olduğunu sübut etdi – bu futbolçu vazkeçilməz biri deyil, onu “Keşlə”dən bəh-bəhlə gətirmək tələskənlik idi.
Bəxtiyar Soltanov, Novruz Məmmədov, Məqsəd İsayev böyük hədəflər üçün yararlı oyunçular sayıla bilməz. Səhvləri ilə diqqət çəkən Eltun Turabov və ya Elşən Abdullayevi də qınamaq olar, lakin bu gənclərin hələ özünü sübut etmək üçün şansı olacaq. Elə Elşad Əhmədovun da.
Məşqçi kimi öz stili, baxışı olan Əhmədovu bəyənənlərdənəm. Lakin o da ayılmalıdı. Gözlənilməz qələbələr və şok darmadağınlar qeyri-sabitliyin göstəriciləridi. Böyümək üçün daha sabit oyuna, nəticələrə ehtiyac var.
“Səbail”in də haqqını vermək lazımdı. Komanda bəlkə də mövsümdə ən yaxşı oyununu sərgilədi. Aftandil Hacıyev nə düşünmüşdüsə, hamısı reallaşdı. Yetirmələri bütün qol epizodlarını dəyərləndirdi, intizamlı oynadı və “Sabah”ın hədiyyələrini məmnuniyyətlə qəbul etdi.
Növbəti turlar artıq 2-ci pilləyə kimi irəliləyən “Səbail”in gücünü daha bariz şəkildə göstərəcək. “Sabah”ın səhvlərindən məharətlə yararlanan, erkən qolun gətirdiyi üstünlük nəticəsində oyununu əks-hücumda quran Bayıl təmsilçisinin fərqli situasiyalarda özünü necə aparacağı çox önəmlidi.
“Əlincə Arena”dakı əyləncə fikir yayındıran mənzərə ola bilər. 4:0 bu komandalar arasındakı qüvvələr nisbətinin əksi deyil. Sadəcə, bir komanda imkanlarından qat-qat aşağı səviyyədə oynadı, digərində isə hər şey alındı. Növbəti turlarda kimin nə nəticə çıxardığı bilinəcək.
AĞA