Bernard Şalland: “Bizdə Berişa varsa, sizdə də Almeyda var”

Noyabrın 20-də UEFA Millətlər Liqasının qrup mərhələsinin sonuncu turu çərçivəsində Azərbaycan millisini qəbul edəcək Kosovo yığmasının baş məşqçisi Bernard Şalland futbolinfo.az saytına eksklüziv müsahibə verib.

– Malta üzərində gözlənilməz hesablı qələbə qazandınız…
– Razıyam ki, gözlənilməz idi. Çünki hamı 1:0, 2:0 hesablı qalibiyyət gözləyirdi. Amma biz 5:0 udduq. Əslində, birinci hissədə çətin oldu. Çünki rəqib 5 müdafiəçi ilə qapanmışdı. İkinci qoldan sonra irəli atıldılar. Bu da bizim əks-hücumlarda istədiyimiz kimi oynamağımıza şərait yaratdı. Nəticədə belə hesab qeydə alındı. Oyundan qabaq mən də bu hesabı düşünmürdüm. Çünki Azərbaycan bu rəqiblə evdə heç-heçə etmişdi.

– Azərbaycan – Farer adaları matçını izlədinizmi?
– Yox, tam izləməmişəm. Bu gecə baxacam. Bilirəm ki, Farer adaları müdafiədə, yarımmüdafiədə sıx oynayan komandadı. Ona görə də onlara qol vurmaq asan deyil. Lakin Azərbaycan 2 qol vurmağı bacardı.

– Final Priştinada olacaq…
– Çox maraqlı oyun olacaq. Rəqibə qələbə lazımdı. Gərgin bir matç bizi gözləyir. Mən komandanı götürərkən proqrama baxdığım zaman bu ssenarini düşünmüşdüm. Təxmin edirdim ki, qrupun ən vacib oyunu Kosovo paytaxtında Azərbaycanla olacaq. Belə də oldu. İndi bizi ağır sınaq gözləyir. 

– Doğma azarkeşlər önündə oynamağınızı avantaj sayırsız?
– Əlbəttə ki, bu, böyük avantajdı. Doğma azarkeşlərimiz bizə ruh yüksəkliyi verəcək. Düşünürəm ki, stadion tam dolu olacaq. Bu da əlavə motivasiyadı. Ona görə meydanda hər şey etməyə çalışacağıq. 

– İlk matçda heç-heçə etmişdiz…
– İlk matçda Azərbaycan bizdən yaxşı oynamışdı. Bunu etiraf etmək lazımdı. Onlar daha inamlı çıxış etmişdilər. Bəlkə də biz yeni komanda olduğumuz üçün çətin idi. Amma həqiqətən Bakıda bizə çətin olmuşdu.

– Priştinada sizə heç-heçə də bəs edəcək…
– Amma bu, o demək deyil ki, biz heç-heçə üçün oynayacağıq. Meydana qələbə üçün çıxacağıq. Doğma azarkeşlərimiz bizdən qalibiyyət gözləyəcək. Bunun üçün də Azərbaycanı məğlub etmək lazımdı. "Final"ı udmaqla Avropa çempionatına layiq olduğumuzu göstərmək istəyirk.

– Azərbaycanın ilk dəqiqələrdən hücuma atılması işinizə yarayacaqmı? Komandanızı əks-hücumlar üçün hazırlamamısız?
– Maltada qələbə qazanıb işimizi asanlaşdırdıq və qolların çoxunu əks-hücumlarda vurduq. Ümumiyyətlə, Azərbaycan yığması topla ağıllı davranır. Daha çox özlərində top saxlamağa çalışırlar. Bu da bizə çətinlik yaradacaq. Təkcə əks-hücumlarda oyun qurmaq olmaz. Öz oyunumuzla üstün olmağa çalışmalıyıq.

– İlk matçda Valon Berişa yox idi. Sizin üçün çox vacibd fiqurdu və meydana çıxacaq. Onun olması sizə nə dərəcədə üstünlük qazandıracaq?
– Düzdü, Berişa çox vacib fiqurdu. Çox kömək edəcək. Amma biz bir komandayıq. Ona qalsa, Azərbaycan yığmasında da Riçard Almeyda var. O da yığmanızda eyni funksiyanı yerinə yetirir.

– Etiraf edək ki, Almeyda Berişa deyil…
– Amma onun qədər sizin milli üçün vacibdi.

– Kosovo heyətinə görə əvvəlcədən favorit idi…
– Bunu demək elə də asan deyil. Azərbaycanla matçda hər şey ola bilər. Asanlıqla qrupu birinci tamamlamamışıq. Çalışmışıq ki, nəsə edək.

CAVAD