UEFA-dan yeni siqnallar: “Səbail” də qumara qurşanıb?

AFFA danışılmış oyunlarla bağlı yeni qərarlar qəbul edə bilər. I divizionda qumarı azaltmaq mümkün olsa da, virus tam təmizlənməyib. UEFA-dan gələn siqnallar yenə davam edir və kifayət qədər ciddidi.

Futbolinfo.az yaxınlarda şübhəli bildiyi oyunların siyahısını açıqlamışdı. Qitə futbol qurumundan gələn məktublarda da həmin matçlar yer alıb. Qurum rəsmiləri KİV-də bunu etiraf etmişdi. Bu üzdən AFFA tezliklə müəyyən addımlar atmağa məcburdu. Bəzi futbolçu və komandalar haqda ölçü götürülməsi mümkündü.

AFFA elita klublarının əvəzedici komandalarını diviziona göndərməklə bu yarışda müsbət irəliləyiş əldə etməyə çalışırdı. Belə ki, qumara qurşanmış bəzi veteranları futboldan kənar saxlamağa, bununla da müəyyən təmizləməyə cəhd edildi. Bəli, bəzi irəliləyişlər əldə olundu, lakin indi də yeni işbazlar üzə çıxıb.

Maraqlıdı ki, hazırda danışılmış oyunlarla daha çox “Səbail”in məşğul olduğu deyilir. Paytaxt klubunun əvəzedicilərinin əksər oyunları şübhə altındadı. Baş məşqçi Elman Sultanovun istefası 2 texniki məğlubiyyətlə əlaqələndirilsə də, sən demə, onun danışılmış oyunlara qurşanan bəzi yetirmələrinin qarşısını ala bilməməsi də həlledici olub.

Ümumiyyətlə, divizionun əvəzedicilər hesabına dəyişdirilməsi çıxış yolu deyilmiş. Yaş limitini də nəzərə alsaq, yarış xeyli “cavanlaşdırılsa” da, bu məqamın özü yeni problemə səbəb olub. Ötən mövsüm U-19 liqasında oynamış xeyli futbolçunun indi burada olması diviziondakı qumarı daha da vüsətləndirib. Çünki U-19 liqası mətbuatda çox qabardılmasa da, danışılmış oyunlara burada daha çox rast gəlinirdi və gəlinir. Xarici kontorların ciddi nüfuz etdiyi bu yarış hazırda da əsas diqqət obyekti olmalıdı. Liqanın əksər matçlarına canlı “stavka” etmək mümkündü.

Qumarın “Səbail”ə ayaq açması da buradan qaynaqlanır və bildiyimizə görə, klubda bu məsələ ilə bağlı olan şəxslər var. Onları tapmaq, izlərinə düşmək AFFA-nın işidi. UEFA-dan konkret siyahılar göndərildiyini nəzərə alsaq, araşdırmaq da çətin olmamalıdı. “Ağsu”, “Turan Tovuz” və başqaları xüsusi komissiyanın nəzarətinə götürülməlidi.

CAVAD