Ölkə futbolu
Stuxlikin kriteriyaları
AFFA Hakimlər və Hakim-İnspektorlar Komitəsinin yeni sədri Frits …
AFFA Hakimlər və Hakim-İnspektorlar Komitəsinin yeni sədri Frits Stuxlik islahat aparır. İnsafən, onun bir çox addımları təqdirəlayiqdi.
Avstriyalı komitəni artıq, təsadüfi adamlardan təmizləməyə çalışır. AFFA-ya doluşmuş qeyri-peşəkarların biletini kəsən sədr heyəti buna haqqı çatan insanlarla formalaşdırmaq niyyətindədi. Lakin onun köməkçiləri, komitə üzvləri özü də daha titizliklə seçilməlidi. Çünki yardımçıları da bu baxımdan səriştəsiz, bacarıqsızdı.
Əlimizə Stuxlikin tələblərini əks etdirən, AFFA nümayəndəsi və hakim-inspektor olmağa iddia edənlərin seçilməsi ilə bağlı meyarlar, kriteriyalar olan sənəd keçib. Bu sənəddən əsas məqsəd bəlli olur, lakin onu kim tərtib edibsə, savadına rişxənd etməkdən başqa yolumuz yoxdu.
Dəhşətli dərəcədə orfoqrafik səhv olan mətndə “yeyilən”, “qondarılan” hərflər kifayət qədərdi. Orta təhsili olduğuna şübhə etdiyimiz kimsə tərəfindən yazılan sənədə diqqət edək.
* “Müəyyən” sözünü fərqli cümlələrdə 3 fərqli formada istifadə edən müəllif üçün Vətənin önəmi yazdığı “vətandaş” sözündən bəlli olur. Əvəzində SSRİ sevgisi sıralanan “S” sayından hiss olunur.
* “Azərbaycan dilində danışmaq və raport yazmaq” tələbi əladı, amma siyahı müəyyənləşərkən məhz belələri ilə bağlı problem yaranacaq. Çünki kimsəyə bunu bacarmadığı sübut edilə bilməz, hamı bir ağızdan AFFA-nın baş katibi Elxan Məmmədovdan daha səlis danışdığını deyə və isbatlaya bilər.
* Dövlət tərəfindən mükafatlandırılmış şəxslərlə bağlı bənddə yalnız “Tərəqqi” medalının “İdman sahəsinə görə” kimi fərqləndirilməsi absurddu. Belə aydın olur ki, “Şöhrət” və ya “Şərəf” ordeni alanların idmana bağlılığı vacib deyil. Yəni, Zeynəb Xanlarova və ya Alim Qasımov da bu kriteriyaya cavab verir, onlar da AFFA nümayəndəsi kimi təyinat ala bilərlər.
* AFFA abreviaturasının kiçik hərflərlə yazıldığı bölümdəki qadağalar da qəribədi. Əslində, burada “AFFA nümayəndəsi ola bilməz” kimi yazılsa, daha məntiqli görünər. Yeri gəlmişkən, bu qadağalardan sonra çox adamın problemi olacaq. Məsələn, “Keşlə”nin Müşahidə Şurasında olan Asim Xudiyevin hakim-inspektor kimi təyinat alıb-almayacağı maraqlıdı. O, klubdan istefa verməlidi. Çünki beynəlxalq oyunlara təyinat alır və sabiq FIFA referisi kimi sevimli peşəsində qalması daha məqsədəuyğundu.