Müsahibə
Tahir Süleymanov: Bunun səbəbini Lənkəran klubu daha yaxşı bilər
“Neftçi”nin vitse-prezidenti Tahir Süleymanovu…
“Neftçi”nin vitse-prezidenti Tahir Süleymanovun Futbolinfo.az-a müsahibəsi
– İlk öncə "Böyük oyun" haqda fikirlərinizi öyrənək…
– Adından da göründüyü kimi, bu, "Böyük oyun"du. "Neftçi" və "Xəzər Lənkəran" qarşılaşması həmişə böyük əks-səda doğurub. Turnir cədvəlində tutduğu yerdən asılı olmayaraq, bu komandaların oyununda meydanda həmişə əzmkarlıq və mübarizə olur. Əsas odu ki, meydanda sağlam mübarizə getsin və güclü olan tərəf qalib gəlsin. "Xəzər Lənkəran" bu gün öz gücünə layiq olmayan yerdə durub. Bunun səbəbini Lənkəran klubu daha yaxşı bilər. Lakin bu, bizi qəti şəkildə arxayınlaşdırmır. Xal fərqi böyükdü, amma buna baxmayaraq, bundan öncəki oyunlar kimi, budəfəki qarşılaşma da yadda qalacaq. İstəyimiz odu ki, oyunda hər hansı bir problem yaşanmasın və güclü olan tərəf qalib gəlsin.
– Bu qarşılaşmanı Superkubokun revanşı adlandırmaq olar?
– Bilirsiniz ki, iki klub bir-biri ilə ən azı 4 dəfə görüşür. Kubok oyunlarını da nəzərə alsaq, elə hallar olub ki, 5-6 dəfə qarşılaşıblar. Buna görə revanş deməzdim. Ən önəmlisi may ayında turnir cədvəlində kimin neçənci yerdə olmasıdı. Çempionatda 10 komanda var və hər bir kluba hörmətlə yanaşırıq. Əgər hər hansı bir görüş üzərində bu qədər dayanılarsa, o zaman çempionat yaddan çıxar və hər hansı bir nəticədən söhbət gedə bilməz. "Neftçi" son üç mövsümün ardıcıl çempionu və kubokun sahibidi. Qarşıda duran hədəfimiz bu nəticələri təkrar etmək və Avropada qazanılan uğurun davamını gətirməkdi. Buna görə də biz bu prinsipiallığı nəzərə alaraq bu qarşılaşmaya növbəti oyun kimi baxırıq.
– Rəhbərlik olaraq rəqib azarkeşlərin meydana buraxılmaması ilə bağlı hansı tədbirlər görülür?
– Bildiyimiz kimi, AFFA İntizam Komitəsinin müvafiq qərarı var. Hər iki klub da bu qərara hörmətlə yanaşmağa borcludu. Çünki qərar qəbul olunub. Hər bir oyunda AFFA-nın rəsmi nümayəndəsi olur. Biz də qaydalara uyğun olaraq lazımi qərarların yerinə yetirilməsi üçün əlimizdən gələni edəcəyik.
– "Neftçi"nin hazırda həbsdə olan azarkeşi var. Stadionda azarkeş qruplarının bununla bağlı pankart açmalarına icazə verilmir…
– Mən bu məsələnin ictimaiyyətdə bu qədər gündəmə gətirilməsinin tərəfdarı deyiləm. Çünki bu, heç də o azarkeşlərə kömək olmur. Söhbət tək bizim yox, “Xəzər Lənkəran” azarkeşlərindən də gedir. Dünya praktikasında da çox belə hallar olur. Bu tipli hadisələrə hər yerdə rast gəlmək olar. Lakin bu, futboldu, bizim istəyimiz də odu ki, bu cür hallar baş verməsin. İstər "Neftçi", istərsə də "Xəzər Lənkəran" azarkeşlərinin tez bir zamanda azadlığa çıxmasını istərdik. Yenə qeyd etmək istəyirəm ki, bütün bunları gündəmə gətirmək heç də onlara xeyir gətirməz. Ona görə təmkinli olmaq lazımdı. Müvafiq orqanlar öz işlərini bilir və onlar da məlumatlıdırlar ki, bütün dünyada belə hallar olur.
– Cavid İmamverdiyevin sosial şəbəkələrdə azarkeşlərlə mübahisəsinə toxunmaq istərdim. Artıq İmamverdiyev klubun rəsmi saytı vasitəsilə üzrxahlıq elədi…
– Bəli, rəsmi sayt vasitəsilə Cavid İmamverdiyevin fikirləri bildirilib. Biz buna təbii baxırıq. Amma Azərbaycan futbolunda bunlardan da vacib məsələlər var. Cavidlə söhbət etmişik, azarkeşlərlə də görüşmüşük. Klub rəhbərliyi olaraq bu məsələləri daimi olaraq diqqətdə saxlayırıq. Belə desək, anlaşılmazlıq olmuşdu. Təbii ki, Cavid də hər oyunda rəqib qapısından top keçirmək istəyir. Əgər futbolçu hər oyun 3-4 qol epizodu yaradırsa, deməli, o, meydanda futbol oynayır. Əgər Cavid futbol oynamasa, o qol epizodlarını yarada bilməzdi. Dünya futboluna baxsaq, nəinki qol epizodu, penalti zərbələrini Bekhemlər, Baccolar yerinə yetirə bilməyib. Bunu da bir qədər təmkinlə qarşılamaq lazımdı, qarşılıqlı hörmət olmalıdı. Azarkeş də doğma komandasına sona qədər dəstək verməlidi. Bir daha qeyd edim ki, Cavidlə və azarkeşlərlə şəxsən mən və Gündüz Abbaszadənin görüşü oldu. Fikir mübadiləsi apardıq. Tək Cavidlə bağlı yox, qarşıdan gələn "Böyük oyun"la bağlı da müzakirələr apardıq. Azarkeşlərə təşəkkürümü bildirirəm ki, bu məsələləri anlayışla qarşıladılar.
– Nazim Süleymanovun debütündən razı qaldınız?
– Hələ Süleymanov "Neftçi"də təzədi. Müəyyən vaxt verilməlidi. Əgər hansısa bir kluba baş məşçqi gəlirsə, həmin komanda aşağı yerlərdə olursa, bu zaman komandada psixoloji gərginlik olur. "Neftçi"də isə bu cür problem yoxdu. Komandamızın yuxarı pillədə olması buna sübutdu. Bu baxımdan hər hansı bir problem yoxdu, sadəcə, bu işi davam etdirmək lazımdı. Bu arada əvvəllər klubumuzda çalışan bütün məşqçilərə təşəkkürümüzü bildiririk. Onların komandada çox böyük əməyi olub. Ona görə "Neftçi"yə gələn baş məşqçi sadəcə, bu uğurların davamını gətirməlidi. Təyinatdan sonra Süleymanovun mətbuat konfransında bildirdiyi kimi, "Neftçi"nin məqsədi çempionluq, minimum Avroliqanın və şansimiz olarsa, Çempionlar Liqasının qrupunu hədəfləməkdi. Bu yolda rəhbərlik tərəfindən komanda üçün hər cür şərait yaradıb. Ən önəmli məqam isə "Neftçi" rəhbərliyinin yerli məşqçilərlə çalışmasıdı.
– Gəray Qarayevlə bağlı məsələni aydınlaşdırmağınızı istərdim… (sözümü kəsir)
– Bir daha vurğulamaq istəyirəm ki, bu tipli şayiələrin ictimaiyyətdə yayılması mənfi bir haldı. Böyükağa Hacıyev nəinki indi, bundan öncə də məşqçilərin işinə qarışmayıb. "Neftçi"nin belə bir istəyi də olmayıb. Əgər hansısa bir real məsələ olarsa, klub bununla bağlı rəsmi açıqlama verəcək.
– Superkubokdan öncə saytımıza verdiyiniz müsahibədə "Kubok qazanılmazsa, Əhmədov istefaya göndəriləcək" sualına "Əsas odu ki, Azərbaycan futbolu qələbə qazansın, heç bir istefadan söhbət gedə bilməz" demişdiz. Amma oyundan sonra Əhmədov istefaya göndərildi. Süleymanovu bu cür bir təhlükə gözləyir?
– Gəlin belə danışaq, demişdim ki, Azərbaycan futbolu qalib gəlsin. Doğurdan da Naxçıvanda "Neftçi" və "Xəzər Lənkəran"a münasibəti özünüz gördünüz. Biz bildirmişik ki, məşqçilərə həmişə dəstək veririk. Amma bunun da qarşılığı olmalıdı. Məğlubiyyətdən sonra Tərlan Əhmədov, Bəxtiyar Musayev və Kamal Quliyev özləri qarşılıqlı razılaşma əsasında yola davam etməyəcəklərini açıqladılar.
– Amma Sadıq Sadıqov oyundan dərhal sonra məşqçilər korpusunun istefaya göndəriləcəyini bildirmişdi…
– Belə deyək də nəticələr göz qabağındadı. Həyatda hər şey olur. Onlara da uğur arzu edirik, Nazim Süleymanova da. Yenə deyirəm ki, "Neftçi"nin uğur qazanması üçün rəhbərlik yerli məşqçilərə güvənir və əlindən gələni edir.
– Çempionluğa iddialı klub Melvin Platye kimi uğursuz transferlə qışdan sonra da yola davam edəcək?
– Hollandiya çempionatının səviyyəsi ilə Azərbaycan çempionatının səviyyəsini müqayisə edin. Ötən mövsüm Hollandiya çempionatında 9 qol vurmuş gənc futbolçunun hər hansı uğursuzluğundan söhbət gedə bilməz. Ümumiyyətlə, "Neftçi"də olan legionerlərin hamısı Azərbaycan çempionatının səviyyəsindən yuxarı olan futbolçulardı. Hələ çempionatın sonuna çox var. Vaxtilə Nikolas Kanales gələndə bəziləri onu uğursuz transfer adlandırırdı. "Neftçi"də rəqabət var, səviyyəsiz transfer yoxdu.
– 11 tura bir qol vurmuş hücumçunu necə uğurlu adlandırmaq olar?
– "Neftçi"nin sayılmayan qollarını saysanız, görərsiniz ki, "Neftçi" kifayət qədər qol vurub. Futbolçunun adaptasiya olması üçün müəyyən vaxta ehtiyac var. Bir daha vurğulayım ki, o futbolçunun "Neftçi"yə xeyri dəyəcək. Bəlkə Azərbaycan futbolunun sürəti Hollandiya çempionatının və Platyenin sürətinə çatmır? Bu barədə düşünsək, daha yaxşı olar.
RÖVŞƏN ƏHLİMANOĞLU
- Ölkə futbolu2024-04-19 21:00
“Sumqayıt” avrokubok iddiasını davam etdirir
- Ölkə futbolu2024-04-21 11:50
Rəfiyev “Sabah” üçün plan qurub: rəqibinin rəqibini stimullaşdırır
- Ölkə futbolu2024-04-21 10:19
Yeni AFFA rəhbərliyi də əcnəbilərə üz tutdu: hər şey xorvatlara tapşırılacaq
- Ölkə futbolu2024-04-21 08:00
Andersonun dediyi kimi…