Ölkə futbolu
“Neftçi”də şok transfer: Dario gedir, Badibanqa gəlir
Premyer Liqanın ikinci yarısının startı ərəfəsində “Nef…
Premyer Liqanın ikinci yarısının startı ərəfəsində “Neftçi” çətin duruma düşüb. Çempionatın lideri “Qarabağ”la tale yüklü oyuna aparıcı oyunçusu olmadan çıxa bilər.
Dario Frederiko klubdan ayrılmağa hazırlaşır. Braziliyalı vinger yenidən Cənubi Koreyaya dönmək niyyətindədi və gələn əla təklifi geri çevirmək niyyətində deyil. Vaxtilə “Kəpəz”dən ayrılıb bu ölkəyə gedən, amma orada uğursuz olub Gəncəyə qayıdan Dario bəxtini bir daha sınayacaq.
Vaxtilə "Sonnam"da oynamış 28 yaşlı oyunçu yenə “Neftçi”də aldığından daha yaxşı maaş təklifi olduğu üçün getmək qərarına gəlib. Antalya toplanışının son günü menecerlərdən gələn dəvət braziliyalının fikrini qarışdırıb. “Neftçi” üçün qarşıdakı oyun vacib olsa da, klub ürəyi başqa yerə can atan oyunçunu saxlamağa həvəsli deyil. Həm də müqavilədə müəyyən məbləğ (50 min dollar) qarşılığında futbolçunun sərbəst qalması haqda bənd var.
Koreyalılar oyunçu üçün yaxşı transfer məbləği də təklif edib. Amma “Neftçi”nin bu keçidə razılaşması puldan çox başqa amildən asılıdı. Belə ki, hücum xəttinə daha səviyyəli oyunçu gətiriləcəyi halda, Dario buraxılacaq. Və bakılılar bu istiqamətdə də ciddi çalışır.
“Neftçi” “Qarabağ”la oyuna kimi sürpriz transfer reallaşdıra bilər. Baş məşqçi Roberto Bordinin israrla istədiyi, hələ “Şerif”də olarkən birgə çalışdığı Ziquy Badibanqanın gəlişi şox realdı. Danışıqlar yekunlaşmaq üzrədi, belçikalı oyunçu da Tiraspol klubunun qış toplanışına yollanmayıb. Moldova mətbuatına inansaq, futbolçunun Bakıya yollanması üçün son detalların dəqiqləşməsi qalıb.
“Qarabağ”la avrokubok oyunlardan tanıdığımız Badibanqanın transferi alınsa, “Neftçi” bundan fayda görər. Qeyri-sabit Darioyla müqayisədə 27 yaşlı Badibanqa daha yaxşı və faydalı oyunçudu. Bircə problem onun bakılılarla toplanış keçməməsi və “Qarabağ”la matçadək hazır olmayacağıdı.