Ölkə futbolu
Deviçlə bahar oldu
“Zirə” mövsümün ikinci yarısına hazır d…
“Zirə” mövsümün ikinci yarısına hazır deyil. Baş məşqçi Samir Abasov qış fasiləsində nə edibsə, “qartallar” 3-cü dövrənin ilk matçında xeyli bərbad göründü.
Qışa kimi nəticələri pis olsa da, “Zirə”nin baxımlı oyunu diqqət çəkirdi. Amma bu gün “Sabah” qarşısında aciz autsayder gördük. Bəlkə də mövsümün ilk yarısında komandanın daha yaxşı təsir bağışlamasının səbəbi onu yarışa sabiq baş məşqçi Ayxan Abbasovun hazırlaması idi. İndiki çalışdırıcı isə…
Bəlkə də qiymət vermək üçün tezdi. İlk oyun idi, üstəlik, yeni əcnəbilər start heyətdə yer almamışdı – onlar hələ hazır deyil. Amma hətta əvvəlki heyət də olduqca pis təsir bağışladı.
Abasovun “Sumqayıt”dan gətirdiyi Bəxtiyar Həsənalızadə ilk qolun “təşkilatçısı” oldu. Onun adi səhvindən sonra qonaqlar penalti vurmaq hüququ qazandı. Oyunun taleyini həll edən daha bir epizodun “qəhrəmanı” Vüqar Mustafayev oldu. Qazandığı cərimə zərbəsinin əvəzinə, rəqib oyunçunu vuran yarımmüdafiəçi qırmızı vərəqə aldı.
Halbuki buna kimi “Sabah” azlıqda idi. Amma Məqsəd İsayevin 25-ci dəqiqədə oyundan qovulması autsayderə təsir etməmişdi, əksinə, qonaqlar daha üstün təsir bağışlayırdı. Elşad Əhmədovun ağıllı taktikası sayəsində təmkinli oynayan “Sabah” fasilədən həmən sonra hesabı açdı, daha sonra ikinci qolu vurdu.
Marko Deviç yenə baş rolda idi. Serb futbolçu komandasının yeganə hücumçusu olsa da, faktiki hər şeyi təkbaşına həll etdi – qol vurdu, məhsuldar ötürmə verdi, rəqib oyunçunun meydandan qovulmasına səbəbkar oldu. Yeni transferlər də oyunları ilə komandaya fayda verəcəklərini göstərdilər.
“Zirə” son pillədə möhkəmləndi, “Sabah”ın medallar uğrunda mübarizəsi isə davam edir.
AĞA