Ölkə futbolu
Cavid İmamverdiyev: “Ona görə qələbə bizim oldu”
“Sabah”ın kapitanı Cavid İmamverdiyev Premyer Liqanın …
“Sabah”ın kapitanı Cavid İmamverdiyev Premyer Liqanın 15-ci turunda “Zirə”yə qalib gəldikləri oyundan (2:0)sonra jurnalistlərin suallarını cavablandırıb. Təcrübəli yarımmüdafiəçi əvvəlcə qələbəni şərh edib.
– Çox gərgin qarşılaşma oldu. Yeni stadionda yeni komanda ilə oynadıq. Bilirik ki, Samir Abasov işlədiyi hər yerdə yaxşı kollektiv yaratmağa çalışır. “Zirə”də də buna nail olub. Düşünürəm ki, bu gün biz yaxşı oynadıq. Qırmızı vərəqəyə qədər üstünlük bizdə idi. Amma sonra bir müddət üstünlük onların tərəfinə keçdi. İstifadə edə bilmədilər. Biz 10 nəfərlə qalmağımıza baxmayaraq, qol vurduq. Rəqib də azlıqda qaldıqdan sonra isə ikinci topu vurduq. Bu gün yeni futbolçularımız komandaya çox kömək oldular. İnanıram ki, gələn oyunlarda daha yaxşı olacaq. Komandamızı təbrik edirəm. Sevinirəm ki, səfər oyunundan qələbə ilə ayrıla bildik.
– Bu qələbəyə əsasən demək olarmı ki, siz “Zirə” ilə müqayisədə təlim-məşq toplanışını daha yaxşı keçmisiniz?
– Yox, elə düşünmürəm. Çünki bəzən təlim-məşq toplanışını super keçirirsən, amma çempionatda həmin effekti ala bilmirsən. Çünki Premyer Liqa başqa bir yarışdı. Toplanış zamanı oyunları həm yorğunluq fonunda keçirirsən, həm fərqli komandalarla oynayırsan. Həm “Zirə”, həm də biz qış fasiləsində yaxşı hazırlıq keçmişik. Sadəcə, biz fürsətdən istifadə edib, qollarımızı vura bildik. Ona görə qələbə də bizim oldu.
– Oyunda aqressivlik yüksək dərəcədə idi. Bunu istəklə əlaqələndirirsən, yoxsa?..
– 3-cü dövrənin birinci oyunu idi deyə, qarşılaşma belə gərgin alındı. İstər-istəməz güc, aqressiya var. Təbii ki, hər iki komanda udmaq istəyirdi. İlk oyun olduğu üçün hamının diqqəti burda idi. Məncə, hər şey bundan irəli gəlirdi. Düzdü, hər iki komanda aqressiv idi. Sevinirəm ki, biz qalib gəldik.
– Bugünkü üstünlüyünüzü Antalyada keçirdiyiniz yoxlama oyunlarındakı rəqiblərinizin güclü olması ilə əlaqələndirmək olarmı?
– Bəli, orada Elşad müəllimin rəhbərliyi altında çox yaxşı təlim-məşq toplanışı keçdik. Düzgün işlədik, ona görə xeyirini də gördük. İnanıram ki, bu cür oyunumuzu həm 3-cü, həm də 4-cü dövrədə davam etdirərik.
– Oyunda kifayət qədər sarı, qırmızı vərəqə oldu. Hakimin qərarları ilə razısan?
– Bunlar bizim işimiz deyil. Bizim vəzifəmiz futbol oynamaqdı. Necə ki, bir komandanın məşqçisi, rəhbərliyi var, eləcə də hakimlərin rəhbərləri var. Onlar hər şeyə qərar verəcəklər. Bu haqda danışmaq istəmirəm.
– Növbəti turda rəqib “Qəbələ” olacaq…
– Bizim üçün bunun fərqi yoxdur. “Qəbələ”, “Neftçi”, “Qarabağ”, ümumiyyətlə, rəqibimiz hansı komanda olsun, meydana ancaq qələbə üçün çıxacağıq.
– Bu mövsüm Premyer Liqada əsas hədəfiniz nədir?
– Elə böyük hədəfimiz yoxdur. Sadəcə, nə qədər çox xal yığa bilsək, bu, bizim üçün müsbət cəhətdi. Bu, bizim Premyer Liqada debüt ilimizdi. Ona görə də bu mövsüm elə böyük məqsədimiz yoxdu. İstəyirik ki, Premyer Liqada qalaq. Gələn il üçün çox böyük hədəflərimiz var. Yuxarı yerlər üçün oynayacağıq.