Ölkə futbolu
Zaur Axundov üçün qoz ağacı axtarışı
Tərlan Əhmədov xilas etməyə gəldiyi “Keşlə”ni daha…
Tərlan Əhmədov xilas etməyə gəldiyi “Keşlə”ni daha betər günə qoyub. Bugünkü matç göstərdi ki, bu komandanın avrokubok həvəsi sadəcə, arzudu, reallıq autsayderlikdən yaxa qurtara bilməyəcəkləri ilə bağlı həqiqətdi.
“Keşlə” futbol oynamadı. Və Əhmədov bunu 2 oyunçunun – Nikola Mitroviçlə Slavik Alxasovun yoxluğuna bağlayırsa, deməli, özü heç bir iş görməyib. Bəs, onların ilk turda olmayacağı bilinə-bilinə niyə fərqli iş ortaya qoyulmayıb, alternativ oyun fikirləşilməyib? Qışda alınan oyunçular say düzəltmək üçünmü gətirilib?
Baş məşqçi toplanışda komandanı həddindən artıq yükləyib. Və bu futbolçular özünə gələnə kimi 3-cü dövrə yarılanacaq, o zaman isə çox suallara aydınlıq gələcək.
“Keşlə” “Səbail”in daimi abunəçisinə çevrilir. 3 oyunda 3 qələbə 3-cü pillənin sahibinin xallarınının 38 faizini bu komandadan alması deməkdi. Və insafən “dənizçilər” bugünkü qələbəni layiqli qazandı. Daha üstün oynayan, daha istəkli olan Aftandil Hacıyevin yetirmələri autsayderə yerini göstərdi.
Bu gün baş tutan hər 2 oyunda qonaqlar top buraxmadan qalib gəldi və məğlub etdikləri komandaları zirzəmidə saxlamaqla yanaşı, özləri medal mübarizəsini davam etdirdi. Lakin “Keşlə”nin məğlubiyyət hesabı daha biabırçı oldu.
İlk qol oyunçu paylaşımındakı səhvdən reallaşdı. İkincidə qovulması daha vacib olan, amma Vaqif Cavadov və başqalarından hansısa səbəbdən fərqli bilinərək saxlanan Andre Klennonun səhvi əsas rol oynadı. Meydana qol vurmaq üçün buraxılan “dişsiz” hücumçu bunu bacarmadı, əksinə, rəqibə toru silkələmək üçün kömək etdi – öz qapıçısını çaşdırdı. Son qol isə birbaşa Kamran Ağayevin vicdanına yazılmalıdı. Reklam çəkilişi üçün Antalya toplanışını yarmçıq qoyub vətənə qayıdan qolkiper səhnə ilə meydanı səhv saldı. Oyundaşının ötürməsinə gec reaksiya verdi, bunun çəkilişdə növbəti dubl olduğunu düşündü və 0:3.
Əhmədovun seleksiya işinin yarıtmazlığı haqda dəfələrlə yazmışıq. O, bu qış da məharətini göstərib. Con Kamaranın sıradan futbolçu olduğunu əvvəllər qeyd etmişdik, bu gün isə bəlli oldu ki, ona ümumiyyətlə, heyətdə yer vermək doğru deyil. Top itkiləri, ikili mübarizələrdə uğursuz oyun, yersiz qayda pozuntuları – Əhmədov onu “Kaysar”dan yəqin ki, bu “üstünlüklərinə” görə dartıb gətirib.
İlk oyunun nəticəsi aldadıcı ola bilər. Amma oyun planında aşkar zəiflik “Keşlə”nin sabahı haqda nikbin düşünməyə əsas vermir. Klubun Müşahidə Şurasının sədri Zaur Axundov təcili qoc ağacı tapmalıdı. Çünki Əhmədovun yetirmələrini başqa cür ayıltmaq olmayacaq. “Keşlə”ni bu vəziyyətdən məhz qoz ağacından düzəldiləcək ya sazla, ya da pazla çıxarmaq olar. Yəni ya sərt, söyüşlü “mahnı”yla, ya da fiziki güc tətbiq etməklə. Axundovun iş üslubuna uyğun olduğu üçün belə məsləhət veririk…
FƏRİD
- Ölkə futbolu2024-04-21 11:50
Rəfiyev “Sabah” üçün plan qurub: rəqibinin rəqibini stimullaşdırır
- Ölkə futbolu2024-04-21 10:19
Yeni AFFA rəhbərliyi də əcnəbilərə üz tutdu: hər şey xorvatlara tapşırılacaq
- Ölkə futbolu2024-04-21 08:00
Andersonun dediyi kimi…
- Premyer-liqa2024-04-20 20:55
“Zirə” “Neftçi”yə qalib gəldi