Ölkə futbolu
“Sabah”ın son pilləyə salınması planı
O penalti təyin edilmədisə, səbəb “Qəbələ”yə k&ou…
O penalti təyin edilmədisə, səbəb “Qəbələ”yə kömək etmək deyildi. Bu klubun da adından istifadə edib, öz məkrli planlarını qururlar. Hədəfdə “Sabah”dı – bu komanda vurulur, kimin bundan xeyir tapmasının bir o qədər önəmi yoxdu.
AFFA-nın baş katibi Elxan Məmmədovun “Sabah”ı Premyer Liqadan qovmağa cəsarəti çatmaz. Məqsəd komandanı son pilləyə salmaq, sonra öz şərtlərini diqtə etmək, kluba hansısa əlaltısını yerləşdirməkdi. Ondan sonra bir bəhanə tapıb, minnət qoyaraq güclülər arasında saxlayacaq.
Dünənki oyunda “Qəbələ”nin qapısına təyin olunmayan penaltinin başqa adı yoxdu. FIFA referisi Rauf Cabbarovun 2 metrliyində olan, hətta İsmayıllıdan görünən epizodda penalti təyin edilmirsə, bu, qərəzdən başqa bir şey deyil. “Sabah” udsa, autsayderlər qrupundan uzaqlaşar, AFFA-dan maliyyələşən “Keşlə” və “Sumqayıt”ın xilas olmaq şansı azalardı. Ona görə də “Sabah”a 3 xal qazanmaq imkanı verilmədi.
4-cü dövrə mövsümün son mərhələsidi. Həm çempionatın medalçıları, avrokuboklara gedənlər, həm də elitanı tərk edən müəyyənləşməlidi. Hazırda sonuncu olan “Sumqayıt” Premyer Liqadan getməyə ən real namizəd sayılır, lakin “Keşlə”, “Zirə” və “Sabah” uzaqda deyil. Məmmədov “Zirə” və ya “Sabah”dan birini son pillədə görməyi arzulayır. “Keşlə” də AFFA-dan maliyyələşdiyindən, bu komanda ilə “Sumqayıt” xilas edilməlidi. Müstəqil “Zirə” qış transferlərindən sonra özünə gəlib, ümid qalıb debütantın çökdürülməsinə.
“Sabah”ın öz səhvləri də çox olub, amma indi komanda toparlanarkən aldığı belə zərbələr son pilləyə yol açır. Cabbarovun qərəzli qərarının başqa izahı yoxdu. Klub rəhbərliyi susur, etiraz etmir, bu isə Hakimlər Komitəsinin tapşırıqla göndərdiyi fit sahiblərinə ilham verir. Qarşısı alınmasa, qarşıdakı turlarda yenə eyni “qəzalar” reallaşacaq, iş işdən keçəndən sonra danışmağın isə faydası olmayacaq. Məkrli planı vaxtında ifşa etmək lazımdı.
AĞA