Keçmiş "Neftçi" rəsmisi: "Ədəbiyyatda zirvəyə çatmaq arzumdur"

"Payız adamı" Mehman Rəsulov: "Narahatlıq yazdırır"

 

ANS kanalı və "Neftçi" klubunun sabiq mətbuat katibi kimi tanıdığımız Mehman Rəsulov yeniliyə imza atıb. 

 

Hazırda "Real" TV-nin idman departamentində çalışan Mehman bəyin yeni kitabı çap olunub. 

 

"Payiz adamı" adlanan kitabda müəllifin 10-15 il ərzində qələmə aldığı şeirləri yer alıb. 

 

 

Mehman bəy, yeni kitabı haqqında fikirlərini Sport7.az-la bölüşüb. Futbolinfo.az həmin müsahibəni təqdim edir:

 

– Mətbuata gələndə prinsipcə idman jurnalisti olmaq kimi fikrim yox idi. O vaxtlar idmana jurnalist gözü ilə baxmırdım. Çox sevdiyim üçün azarkeş kimi baxırdım.  Ancaq əvvəldən hədəfim sırf idman jurnalisti olmaq olmayıb. İş elə gətirdi ki, ANS-də idman bölməsində vakant yer vardı. Gündüz Abbaszadə ilə danışdım və istəsən bizimlə birgə işləyə bilərsən dedi. Alındı və orada işləməyə başladım. Bu gün də özümü sırf futbola aid yox, ümumilikdə idman jurnalisti hesab edirəm. Eyni zamanda yazı-pozu ilə də məşğul oluram. 

 

– Gündüzlə tanışlığımız ANS-də oldu. 2007-ci ildən bir-birimizi yaxından tanıyırıq. Ondan əvvəl şəxsi tanışlığımız yox idi. "Neftçi"yə bərabər getdik. Ora da onun dəvəti ilə getdim. Uzun müddət bu klubda işlədik. İndi hər ikimiz ayrı kanallarda, o, "CBC Sport"da , mən isə "Real" TV-də işləyirəm. Ancaq münasibətimiz qalıb. Düzü, iş ilə əlaqədar olaraq tez-tez görüşmək imkanımız olmur. Ancaq bu yaxılarda görüşmüşük. 

 

 

– 2013-cü ildə "Arzuların ardınca" bədii filminin ssenarisini yazmışdım. O ərəfədə atamı itirmişdim. Onun təsiri altında melodram janrında film ssenarisi yazdım. Daha sonra bu işin arxası ilə davamlı getmək üçün vaxtım olmadı. Bu gün ədəbiyyatımızın problemi odur ki, ədəbiyyatla məşğul olaraq qazanmaq və maddi baxımdan yaşamaq çətindir. Bu reallıqdır, bunu qəbul etmək lazımdır. Jurnalistika isə, həm yaradıcı mühitdir, həm də maddi gəlir mənbəyidir. Ədəbiyyatla həmişə məşğul olmuşam. O illərdə də yazırdım. "Payız adam"ı kitabı bir neçə gün öncə satışa çıxıb. Bu kitabda da daha öncədən yazdığım şeirlər öz əksini tapıb. Qismət olarsa, bu işi də davam etdirəcəm. Ədəbiyyat mənə jurnalistika ilə məşğul olmağa mane olmur. Yəni bu işlərin biri digərinə mane olmur. Çalışacam ki, ədəbiyyatda bacardığımı ortaya qoyum. Qismət olsa, növbəti kitablar da olacaq. 

 

 

– Təbii ki, yazıçı özünü yazır, özüməm. Əslində insanın bəşəri narahatlıqlarıdı bu, narahatlıq yazdırır. Daha çox son 2 ilin şeirləridi. Amma 10-15 il əvvəl yazdığım şeirlər də var kitabda.

 

Bir müddət uzaq qaldım ədəbiyyatdan, daha sonra dostum Tural Əhməd məni şairə Nigar Həsənzadə ilə tanış etdi. Nigar xanım məni inandırdı ki, şeirlərim işıq üzü görməlidir. Onun sayəsində ARB telekanalında yayımlanan "Xalqın şairi" müsabiqəsinə qatıldım. Sonra onun rəhbəri olduğu "Söz ədəbi" layihəsinin iştirakçısı oldum. Ötən il "Nəsimi festivalı"nın qalibi adını qazandım. İnşallah, kitabın təqdimatını da "Söz ədəbi layihəsi" ilə birgə keçirəcəm. Ora mənim evimdir.

 

 

– İmza günü ayın 15-i "Gənclik mall"da yerləşən "Libraff" mağazasında olacaq. May ayında isə, "Söz ədəbi" layihəsi çərçivəsində tədbir keçirməyi düşünürəm. İnanıram ki, imza günündə jurnalist dostlarım da məni tək qoymayacaq. Təbii ki, sizi də dəvət edirəm.

 

– Bu gün "Real" TV-də çalışıram və kollektivimizlə fəxr edirəm. Biz qısa müddətdə çox iş görə bildik. Jurnalistika həm də çeviklik tələb edir. Əgər 15 il sonra belə ola biləcəmsə, işləyəcəm, olmasa yerimi gənclərə verəcəm. Ədəbiyyatda zirvəyə çatmaq isə arzumdur. Alınsa əla, alınmasa da ən azı biləcəm ki, cəhd etdim.