Dünya futbolu
Səriştəsizlərin menyusuna: azərbaycanlı balası “Qalatasaray”da!
“Azərbaycanlıdan futbolçu çıxmaz” deyənl…
“Azərbaycanlıdan futbolçu çıxmaz” deyənlərə daha bir sillə. Bəlkə Kənan Həsənov haqda bu xəbəri oxuyandan sonra bəhanələrindən utanar, əslində, futbolçu yetişdirə bilmədiyimiz həqiqətini qəbul edərlər.
Bu ölkədə istedad baxımından problem yoxdu, sadəcə, idarəetmə düzgün deyil, kadrlar layiq olduqları postlarda oturmayıb, kreslo sahibləri futbolu düşünənlər yox, talançılıqla məşğul olanlardı. “Yerlər səhv düşdüyü üçün” də istedadlı gənc nəsil məhv olur, milli komandalarımız Riad Rəfiyev kimi işbazların yığıb-gətirdiyi milliləşənlərin ümidinə qalır.
Kənan Həsənov 2011-ci il, mayın 5-də anadan olub. Məşqçiləri Elbrus Rzayev və İsa Fərzəliyevin sayəsində kəşf edilib, perspektivli olduğundan "Qalatasaray"a göndərilib, Seleksiyanı uğurla keçdikdən sonra klubun futbol akademiyasına qəbul edilib. Metin Ülgənin rəhbərliyi altında U-8 komandasının üzvüdü.
O, "Canbala" uşaq məktəbində futbolla məşğul olmağa başlayıb. Bir müddət “Qarabağ”ın düşərgəsində olub, daha sonra "Qalatasaray"da seçimlərdən uğurla keçərək komandaya qəbul edilib. İstanbul nəhənginə hər uşağın düşməsi mümkün deyil, Türkiyə klubu Kənanda ümid işığı gördüyündən onu ağuşuna alıb.
Futbolumuzdakı işbazlar isə normal çempionat təşkil edə bilmir, hər həftə uşaq liqalarında çıxış edən bir neçə komandaya yetərsayın olmamasına görə texniki məğlubiyyət verirlər. Bəs, uşaq sayı düzəlmirsə, bu istedadlar necə üzə çıxır? Deməli, işlər düzgün qurulmayıb, iş səriştəsizlərə tapşırılıb. Bu sahəyə diqqət yetirilsə, yüzlərlə uşaq it-bata düşməz, sağlam, istedadlı nəsil yetişər.
Ramil Şeydayev, Emin Mahmudov gözümüzün qabağındadı, vaxtilə Vəli Qasımov da Azərbaycandan kənarda yetişib. Başda Aleksandr Səmədov olmaqla, indi Rusiyada oynayan onlarla azərbaycanlının adını çəkə bilərik. Deməli, bizim istedadla bağlı problemimiz yoxdu, problem idarəçilərdə, beyinlərdədi.
Nə yaxşı ki, Qəbələ akademiyası quruldu. Əks halda, indi aşağı yaş qrupundan olan millilərimizdə oynatmağa da kimsəni tapmayacaqdıq. Bu akademiya da AFFA-nın deyil, futbolu sevən sponsorların sayəsində ayaq üstədi. Halbuki elə assosiasiyanın öz akademiyası indiyədək hansısa istedadı üzə çıxardığı ilə öyünə bilməz.