Ölkə futbolu
“Neftçi”də daha bir yunan: Ceyhun Sultanov canlı izlədi
“Neftçi”nin idman direktoru Ceyhun Sultanov Yunanı…
“Neftçi”nin idman direktoru Ceyhun Sultanov Yunanıstana gedib. Klub rəsmisi yeni mövsüm üçün heyətin gücləndirilməsinə çalışır və axtarışlara indidən start verib.
Futbolinfo.az xəbər verir ki, bakılılar növbəti mövsüm avrokuboklarda iştirak edəcəyini rəsmiləşdirib. Komanda ən azı Avropa Liqasında mübarizə aparacaq. Buna görə də heyətə daha səviyyəli legionerlər cəlb edilməsi üçün çalışmalara start verilib.
“Neftçi”nin “Zirə” ilə matçı bitən kimi səfərə çıxan Sultanov, dünən Yunanısatan çempionatı çərçivəsində baş tutan “Panetolikos” – “Olimpiakos” matçını canlı izləyib. 16 komanda arasında 7-ci pillədə olan meydan sahiblərinin futbolçularından biri bizimkilərin transfer siyahısındadı.
Diqqət mərkəzinə düşənin adını dəqiqləşdirə bilməsək də, bizdə olan bilgiyə görə, “Neftçi” yayda heyətdən uzaqlaşdırılacaq Kiril Petrova əvəzedici axtarır. Raku Petruyla bağlanmış 6 aylıq müqavilə də bitəcək və onların əvəzinə daha səviyyəli oyunçu gətiriləcək. “Olimpiakos”dan 5 cavabsız qol buraxan komandada beləsinin olub-olmadığını bilmirik, lakin Sultanovun səfərində əsas məqsəd məhz bu idi.
Son matçda “Panetolikos”un müdafiə xəttinin mərkəzində 22 yaşlı Aleksandros Malis və 27 yaşlı Anastasios Tsokanis oynayırdı. Güman ki, “Neftçi”nin hədəfindəki oyunçular da onlardan biridi. Bakılılar hazırda heyətdə olan Evangelos Platellasın daha bir həmyerlisini gətirməklə transfer planlarını reallaşdırmağa başlayır.