Ölkə futbolu
Məcburi etimad: Axundov Əhmədovu sevdiyi üçün qorumur
Zaur Axundov Tərlan Əhmədovu çox istədiyinə görə qor…
Zaur Axundov Tərlan Əhmədovu çox istədiyinə görə qorumur. Özü hədəfə çevrilməmək üçün baş məşqçini hələ bir müddət də qalxan kimi istifadə edəcək.
“Keşlə”nin Müşahidə Şurasının sədri bəyan edib ki, Əhmədov postunda qalacaq. “Sumqayıt”a məğlub olub, son pilləyə düşdükləri oyundan sonra istefa vermək haqda fikirləşdiyini bəyan edən baş məşqçi dilə tutulub. Klubdaxili iclas keçirilib və bütün məsələlərə mövsümün sonunda aydınlıq gətiriləcəyi deyilib.
Axundovun məşqçiyə güvəndiyini deməsi boş sözdü. O, məşqçilərə günah keçisi kimi baxır. Klub düzgün idarə edilmir, faydasız transferlərə milyonlar dağıdılır, hərə bir tərəfdə başını açıb “yeyir”. Bunun təbii ardıcıllığı olaraq nəticələr pisləşəndə isə baş məşqçilər çətin vəziyyətdə qalır.
Tərlan bəyin gedişinə icazə verilsəydi, o deyil, sədr günahkar bilinəcəkdi. Yuri Maksimov və Mladen Milinkoviçdən sonra daha bir məşqçinin yola salınması artıq problemin başqa olduğunu göstərəcəkdi. İndiki vəziyyətdə isə Axundov vəziyyəti sabitləşdirməyi və son pillədən qurtulmaq üçün səy göstərməyi lazım bilir. Axı, klubun bütün maliyyəsini təmin edən AFFA da ondan hesabat istəyəcək.
Yeni məşqçinin gəlişi risklidi, 5 oyun üçün heç bir ciddi adam buna razılaşmaz. Dəyişiklikdənsə, komandanı tanıyan Əhmədovla yola davam etmək məntiqlidi. Amma mövsümün sonunda istənilən nəticə Tərlan bəyi xilas etməyəcək. Kifayət qədər sanballı büdcə ilə bu qədər uğursuz çıxış etməyin məsuliyyətini kiminsə boynuna yükləmək lazımdı və Zaur bəy də bu rol üçün Əhmədovu seçib.