Dünya futbolu
Yurçeviç üçün həm ziyarət, həm “ticarət”
Nikola Yurçeviç dünən Qəbələdə idi. Ölkə…
Nikola Yurçeviç dünən Qəbələdə idi. Ölkə kuboku uğrunda “Qəbələ” – “Qarabağ” matçını izləmək üçün bölgəyə səfər etməyi lazım bilmişdi.
Milli komandanın baş məşqçisi gərək olanı etmişdi. Mətbuatın tənqidlərindən sonra, nəhayət, Azərbaycana qayıdıb müqaviləsinin şərtlərinə əməl etməyi özünə borc bildi. 2 iddialı komandanın görüşündə yəqin ki, diqqətini çəkən oyunçular oldu, eyni zamanda əksər milli üzvlərini iş başında gördü.
Amma deyəsən, Yurçeviçin Qəbələyə yollanmasında əsas məqsədi futbola baxmaq deyildi, sadəcə, həm də stadionda görünməyi lazım bilmişdi. Elə olmasaydı, ailəvi səfərə çıxmazdı. Həyat yoldaşını və qızlarını yanına salan Nikola həm ziyarət, həm ticarət prinsipini əsas götürmüşdü.
Bu səfərin xərcini AFFA-nın çəkdiyi dəqiqdi. Yəqin müqavilədə ailə üzvlərinin istirahətinin təmin olunması haqda bənd də var. Yox, xorvat məşqçinin əsas köməkçiləri bu xanımlardısa, o zaman onları mənuniyyətlə Masazırda, Zirədə, Sumqayıtda da görmək istəyəcəyik. İşlə eşqi qarışdıran Nikola bunu da etməlidi.
Yaxşı olardı ki, xorvat çalışdırıcı ailəvi söhbətlərini asudə vaxtına saxlayar, oyunu daha diqqətlə izləyər, Amin Seydiyev, Bəhlul Mustafazadə kimi yaddan çıxardığı gənclərə diqqət edərdi. Bu oyunçuları Qəbələnin təmiz havasına, gözəl təbiətinə görə yox, əzmkar, ağıllı oyunlarına görə milliyə dəvət etmək lazım gələcək.
Xanımların milli komandaların geyimində görünməsi də maraqlıdı. Yığmaların keçmiş inzibatçısı İslam Abbasovu inventarların dağıdılmasında ittiham edənlər bir az diqqətli olmalıdı. Yoxsa bir müddətdən sonra onun xələfi Zaur Hacı-Məhərrəmov da geyim çatışmazlığına, it-bata düşməsinə görə ittiham ediləcək.
İstənilən halda, Yurçeviçin hətta ailəvi istirahətin tərkibində vacib bir oyunu canlı izləməsi yaxşı haldı. Əsas odu ki, mətbuatın tənqidlərindən nəticə çıxarıb. Eyni addımı AFFA-nın baş katibi Elxan Məmmədovdan və PFL-in prezidenti Ramin Musayevdən də gözləyirik.
Bu kabinet bəyləri də futbolu kreslodan idarə etməyin zamanı olmadığını anlamalı, stadionlarda görünməlidi. Ölkə futbolunun idarəçiliyi onlara tapşırılıb, yeganə bölgə komandasının oyununa heç olmasa, ildə bir dəfə getsələr, şərəf vermiş olarlar. Bakıdakı oyunlarda görünmürlər, heç olmasa, həm də istirahət etmək üçün Qəbələyə yollansınlar. Bölgə futbolu onlar üçün önəmlidisə…