Ölkə futbolu
AFFA-dan maliyyələşən klubların növbəti şübhəli oyunu
Birinci divizionda mövsüm bitdi. Bu gün son tur baş tu…
Birinci divizionda mövsüm bitdi. Bu gün son tur baş tutdu və uzun marafon yekunlaşdı.
Mövsüm boyunca qumar meydanı olan divizionda işbazlar finişi də istədikləri kimi etdi. Ölkə futbolunun inkişafı baxımından qeydlər edə bilmirik, çünki yenə hansısa oyunçunun Premyer Liqa klublarına düşəcəyini, orada möhkəmlənəcəyini gözləmirik. Əvəzində yaxşı qumarbazlar yetişdi, qazandı, qazandırdılar.
Elə AFFA-nın özündən nəzarət edilən bazarda (əksini düşünə bilmərik, çünki hamının gördüyünü bu qurumdakılar görmək, tədbir tökmək istəmir – red.) son turda 2 “7+” reallaşdı, 1 matçda 6, digərində 5 qol vuruldu. Bukmekerlər bu variantların nə olduğunu, hansı əmsalla qiymətləndirildiyini yaxşı bilir.
Təbii ki, təsadüflər də var. Və ya həqiqətən oyun elə alınır ki, şübhə doğuran nəticələr real mübarizənin nəticəsi olur. İstənilən halda, araşdırmaq, sorğu-sual etmək lazımdı. Bunu isə AFFA-nın müvafiq komissiyası etməlidi.
Son turun “Ağsu” – “Turan Tovuz” matçında başverənlər məzhəkədi və təcili dünya kontorlarını araşdırıb bu matça harada və nə qədər “stavka” edildiyini dəqiqləşdirmək lazımdı. UEFA mütləq sirkulyar məktub göndərəcək. İşinə yarayanda belə “siqnallar”ı əlində bayraq edən AFFA əksərini özünün idarə etdiyi klubların xətalarına da göz yummamalıdı.
“Şərurspor”, “Bakılı”, “Rəvan” öz əllərində olmadığı üçün onları qovub, divizionu təmizlədilər. İndi isə AFFA-dan maliyyələşən “Ağsu”yla “Turan Tovuz” hoqqa çıxarır və kimsə araşdırma aparmaq istəmir. Deməli, assosiasiyada bu matçların manipulyasiyasında maraqlı olanlar var və onlara da pay çatır. Əks halda, mütləq ölçü götürüləcək.
Bugünkü oyunda qonaqlar 0:3 hesablı məğlubiyyəti 4:3-ə çeviriblər. Canlı pul qoyuluşunda nələrin qazanıldığını təsəvvür etmək belə çətindi. Amma ilk hissəni “Ağsu”nun, oyunu isə “Turan Tovuz”un qalib bitirməsi bukmekerlərə qoyduğu pulun minimum 20 qatını gətirib. Matçı “7+” bitməsi də bir o qədər qazancla ölçülür.
Bu işlə məşğul olanların, oynayanların, təşkil edənlərin ölkə futbolunun inkişafı nəyinə lazımdı? Bircə mövsüm işbazların rəsmən milyonçu olmasına kifayət edirsə, onları futbolun tərəqqisi niyə maraqlandırsın ki? Başlarını açıb pullarını qazanırlar və bu bazarı, bu təsərrüfatı heç kimə güzəşt edən deyillər. SOCAR-ın, AFFA-nın pulu vasitə kimi havaya sovrulur, xalis gəlir isə kimlərinsə cibinə gedir.