Ölkə futbolu
“Neftçi” “Səbail”dən şikayət edə bilər
Məhəmməd Mirzəbəyov, Petru Raku və Qoran Paratski ilə vidalaşa…
Məhəmməd Mirzəbəyov, Petru Raku və Qoran Paratski ilə vidalaşan “Neftçi” yeni oyunçularıyla bağlı hər hansı addım atmayıb. Bir çox oyunçunun adı bakılılarla yanaşı hallansa da, hələlik real nəticə yoxdu.
Lakin “ağ-qaralar” narahat deyil. Avrokuboklarda yeni mövsümün startına xeyli vaxt var və klub rəhbərliyi tələsmək niyyətində deyil. Transferləri xüsusi titizliklə seçən bakılılar səhv etməməyə çalışır.
Heyəti qorumaqla məşğul olan “Neftçi” Səlahət Ağayevin düşərgədə qalmasına nail oldu. İndi isə Mirabdulla Abbasovun məsələsi həll olunur. “Səbail”ə can atan hücumçunun daha bir illik müqaviləsi var və gedişi mümkünsüzdü. Düzdü, anlaşmada Mirabdullanın sərbəst qalması üçün ödənilməsi gərəkən məbləğ qeyd olunub. Belə ki, 100 manat ödəyən klub futbolçunu trnsfer edə bilər. Lakin bunun üçün də son söz “Neftçi”nindi və klub razılıq verməlidi.
Aparıcı yerli oyunçuların qıt olduğu bir vaxtda bakılıların Abbasovu itirməsi yerinə düşməz. “Neftçi” də hücumçusunu saxlamağa cəhd edir. Hətta “Səbail”dən AFFA-ya şikayət edilməsi də mümkündü. Onlar müqaviləli oyunçuya klubundan xəbərsiz təklif göndəriblər və bunu etiraf ediblər. Bu isə doğru addım deyil. Məsələ ciddiləşsə və “Səbail” israrını davam etdirsə, “Neftçi” məsələni hüquqi müstəvidə həll etməyə çalışacaq.
Əslində, Abbasovun daha çox maaş dalınca, həm də daim oynayacağı yerə qaçmaq istəməsi gözləniləndi. Amma daim çempionluq üçün yarışan kollektivi dünənin komandasına dəyişmək arzusu ağılsızlıq, geriyə addımdı. Mirabdulla qalıb özünü sübut etmək istəsə, daha yaxşı olar. Çünki “Səbail”də böyük perspektiv yoxdu və hücumçunun 1-2 ildən sonra olan-qalan istedadının da üstündən xətt çəkiləcək.
Düzdü, bəlkə də Abbasov indiki komandasında lazımi qədər şans qazanmır, baş məşqçidən incikdi. Lakin bunun üçün qaçmaq yox, bir az da çox çalışmaq lazımdı. Ötən mövsüm göstərdi ki, Mirabdullanın da qüsurları çoxdu və heç də həmişə ümidləri doğrultmur. Küsmək, tənbəllik etmək ona uğur gətirməyəcək.
“Neftçi”nin heyətinə qatmaq istədiyi Stiven Monroz və Vojislav Stankoviç isə tezliklə rəsmi anlaşmaya imza atacaq. “Qəbələ”dən ayrılan bu legionerlərin keçidinə əngəl qalmayıb. Yəqin ki, qarşıdakı həftədə onların təqdimatı reallaşacaq. Daha sonra bakılılar yeni futbolçuların transferləri ilə məşğul olacaq.