Ölkə futbolu
Ümumi işin nəticəsi: dayanmaq olmaz!
Öhdəsindən gəlinməyəcək vəzifə yoxdu. İstəməli, bunun …
Öhdəsindən gəlinməyəcək vəzifə yoxdu. İstəməli, bunun üçün çalışmalı, ona doğru ən düzgün yolla getməli və rəqibin bütün səhvlərini analiz edib, ondan yararlanmalısan. Roberto Bordin məhz bunları etdi, əsl mütəxəssis kimi çalışdı, əziyyətinin meyvəsini 4 oyuna top buraxmadan qazanılan 4 qələbə ilə gördü.
Milli çempionatın növbəti mövsümü daha maraqlı olmalıdı. Barışmaz rəqiblər avrokuboklarda da qiyabi rəqabətdədi. “Qarabağ” rəqiblərini sıradan çıxarır, “Neftçi” ardınca daha yaxşısını etməyə çalışır. Və hər ikisi də buna nail olur. 2 rəqib keçilib, komandalar oyundan-oyuna artırır, daha yaxşı oynamağa başlayır.
“Neftçi”nin baş məşqçisi rəqibin ən incə bəndini tapdı. “Arsenal” hər iki oyunda hazırlıqsız yaxalandı. Rəqibin avrokubokda debütant olması ciddi çatışmazlıq idi. Eyni zamanda rusların təmsilçimizə barmaqarası münasibəti bumeranq effekti verdi. Bordin taktiki hazırlıqda həmkarından iti düşündü, futbolçularsa bütün tapşırıqları yerinə yetirdi.
Tulada hər şeyi italiyalı həll etmişdisə, Bakıda böyük azarkeş dəstəyi futbolçuların motivasiyasını artırdı. Səbrlə davranan komanda ilk dəqiqələrdəki təzyiqi adladıb, oyunu bərabərləşdirdi. İlk hissədə qol vurulmadı, lakin fasilədən sonra əks-hücum taktikasının bəhrəsini gördük. Komandanın lideri Emin Mahmudov savadlı oyununa məhsuldar ötürmə də əlavə edincə hesab açıldı. Rauf Əliyev tənqidçilərinin cavabını soyuqqanlılıqla vurduğu qolla verdi.
“Neftçi”nin müdafiəsini yara bilməyən, yaradıcı oyun baxımından onsuz da “sinifdə qalan” ruslara növbəti zərbələri vurmaq üçün son dəqiqələrədək gözlədik. Və yenə sürətli əks-hücumdan sonra penalti qazanıb, qola çevirdik. Oyuna sonradan girən Rəhman Hacıyevlə Mamadu Mbodjun birgə səyi nəticəsində vurulan 3-cü qol da gözəl alındı. 5-ci müdafiəçi kimi meydana buraxılan Mamadudan standart vəziyyətlər zamanı əsl hücumçu kimi faydalanmaq olar. Onun qol sayı oyun sayının az qala yarısına bərabərdi.
Qələbənin Rusiya klubu üzərində qazanılması onun dəyərini bir az da artırır. Siyasi, psixoloji səbəblər bir yana, bu, həm də bizə yuxarıdan aşağı baxanlara mənəvi dərs idi. Ən azı Tuada azərbaycanlıları Moskva bazarlarına görə tanımayacaqlar. Mədəniyyətdə, incəsənətdə və s. sahələrdə olduğu kimi, idmanda da deyəcək sözümüz olduğunu bir daha sübut etdik. Və bunu “Neftçi”nin etməsi ikiqat sevindiricidi. SSRİ çempionatlarını xatırladan təmsilçimiz ənənələrinə sadiqliyini, ən azı postsovet məkanında böyük klub olduğunu isbatladı.
Qələbəni yalnız məşqçi və futbolçu heyətinin ayağına yazmayaq. “Neftçi” bu uğura klub kimi nail oldu. Azarkeşlərlə bütünləşmək klub rəhbərliyinin əsas uğurudu. Eyni zamanda klubun struktur olaraq düzgün işləməsi, bütün daşların yerinə oturdulması faydasını verdi. Yaxşı idarəçilik komandanın rahatlığını təmin edincə nəticələr özünü gözlətmədi. Bir daha isbatlandı ki, hər şey strategiyadan, getdiyin yolu bilməkdən asılıdı, büdcələr arasındakı fərqdən yox. “Qarabağ” illərdi yumruq olmağın meyvələrini dərir, indi də “Neftçi” – bir az fərqli formada – bu yola çıxıb.
Rusiya klubunu mübarizədən kənarlaşdırmaq böyük nailiyyətdi. Tuladakı qələbəni təsadüf sayanlar cavab matçındakı darmadağından sonra bakılılara daha çox inanmalıdı. “Neftçi” minimal vəzifənin öhdəsindən gəldi. Lakin indi “Bney Yahuda”nı keçmək lazımdı. Vaxtilə Avropa Liqasının qrupuna vəsiqə qazanan ilk klub olmuş “Neftçi” üçün elə ovaxtdan müəyyənləşən vəzifə var. Üstəlik, “Qəbələ”, xüsusilə də “Qarabağ” hədəfləri böyüdüb. 1-2 mərhələ keçmək azarkeşləri razı salmır. Yola çıxmışkən, göstərilən oyunla buna qadir olduğun görünürkən, heyət və büdcə imkan verirkən dayanmaq olmaz. Daha çox motivasiya, daha çox səbr, daha çox çalışmaq…
AĞA
- Ölkə futbolu2024-04-13 08:35
Leandro Azərbaycan dilini öyrənib: “Qarabağ”da yaşadıqlarım mənim üçün gözəl hekayədir”
- Premyer-liqa2024-04-13 20:52
“Neftçi” “Araz-Naxçıvan”ı darmadağınla yola saldı
- Milli komanda2024-04-12 18:00
Millinin Gürcüstanla oyunlar üçün heyəti açıqlandı
- Premyer-liqa2024-04-12 20:56
“Sumqayıt”la “Zirə”dən heç-heçə