Müsahibə
“Foqts mütləq getməlidi”
“Neftçi”nin sabiq məşqçisi Kamal Quliyevin…
“Neftçi”nin sabiq məşqçisi Kamal Quliyevin Futbolinfo.az saytına müsahibəsi
– "Neftçi"dən ayrılandan sonra nə işlə məşğul olursuz?
– Futbolla bağlı hələlik heç bir iş görmürəm. Demək olar ki, istiahət edirəm. Yenidən klub prezidenti Sadıq Sadıqovla görüşəcəm. Biz futbol adamıyıq, gələcəkdə də futboldan kənarlaşmaq fikrim yoxdu. Biz futbolun acı günlərini görmüşük. İnşallah bundan sonra da futbolun içində olaram.
– Hər hansı bir klubdan təklif gəlib?
– Yox, heç bir təklif yoxdu. Bu mövzuda heç bir zəng də olunmayıb.
– Keçmiş komandanızın Super Kubokda məğlub olmasının başlıca səbəbi nə idi?
– Bilirsiniz, həmin gün Lənkəran klubu daha istəkli idi. Bu, açıq görünürdü. Biz ikinci yarıdan sonra üstünlüyü ələ ala bildik. Birinci hissədə uşaqlar meydana sanki məcburi çıxmışdılar. İkinci hissədə dönüş yaratdılar, oyunun gedişatı bizim kubok qazanacağımızı göstərirdi. Təəssüf ki, alınmadı. Gözləmədiyimiz anda qapımızda qol gördük. Kardosonın zədələnməsi burada böyük rol oynadı.
– Məşqçilər korpusu istefa verdi, ya istefaya göndərildi?
– Belə də olmalıydı. Çünki bizim qarşımıza məqsəd qoyulmuşdu ki, ölkədə hər bir titulu qazanaq. Oyun da klub prezidentinin anadan olduğu torpaqda keçirilirdi. Sizin vasitənizlə təşəkkürümü bildirirəm ki, bizi çox gözəl qarşıladılar. Nəinki bizi, hər iki komandanı gözəl qarşılayıb, yola saldılar. Bu oyun orada olduğundan Sadıq Sadıqov üçün xüsusi önəm kəsb edirdi. Lakin, biz onu sevindirə bilmədik. Bu hissləri yaşamaq lazımdı. Həmin gün mən də olsam, elə edərdim. Oyundan sonra normal şəkildə ərizələrimizi klub prezidentinə təqdim etdik və hər bir çıxarılan qərara hörmətlə yanaşırıq.
– Nazim Süleymanovun "Neftçi"yə gətirilməsi düzgün addımdı?
– Bunu zaman göstərəcək. Sadıq müəllim həmişə yerli mütəxəssislərə güvənir və onların arxasında durur. Seçimi yerli mütəxəssisdən yana etdiyi üçün təşəkkürümü bildirirəm. Amma futbol sürprizlərlə doludu. Futbol adi oyun deyil, böyük bir elmdi. Nəyin düzgün, nəyin yalnış olduğunu zaman göstərəcək. Kimin gəlməsindən asılı olmayaraq, bundan sonra da "Neftçi"nin hər bir uğuruna sevinəcəm. Mən də bu ailənin bir üzvüyəm, bu komanda mənə əzizdi. 3 illik məşqçilik karyeramda, bəlkə də 30-40 ilin məşqçisinin qazanmadığı uğuru qazandım.
– Böyükağa Hacıyevin Süleymanovun işinə qarışdığı deyilir. Hacıyev sizin işinizə də müdaxilə edirdi?
– Xeyr, müdaxilə etmirdi. O, müşavir vəzifəsindədi. Öz işi ilə məşğul olurdu. Şuranın iclaslarında iştirak edirdi. Nə məşq prosesinə, nə oyun zamanı qurulan taktikaya, nə də məşqlə bağlı hansısa bir məsələyə müdaxilə edirdi.
– "Böyük oyun" haqda fikirləriniz maraqlı olardı…
– "Neftçi"nin hər oyunu çəkisinə görə böyükdü. Super Kubokdan sonra komanda "Simurq"la bərabərə qaldı. "Neftçi"dən qələbə gözləyirəm. İnşallah, futbolçuların əzmkarlığı sayəsində qələbə "Neftçi"nin olar. Ən azından onlar Super Kuboku gözlərinin qarşısına gətirib qələbə üçün meydana çıxmalıdılar.
– Sizin fikrinizcə, Berti Foqts millidən getməlidi, ya qalmalıdı?
– Bu, AFFA-nın səlahiyyətində olan bir işdi. Amma mənim fikrimcə, Foqts mütləq getməlidi. Lap məşqçiliyi bir kənara qoyum. Azərbaycan vətəndaşı kimi Foqtsun getməyini istəyirəm. Axırıncı oyunlar, yığılan bu xallar bizi aldatmasın. Ortada oyun yoxdu, keyfiyyət yoxdu. Foqts bizi ələ saldı, bizi bacarıqsızlıqda günahlandırdı, klublarda şəraitin olmamasını dedi. Klublarda məşqlərin yaxşı keçirilməməsindən şikayətləndi. Onun sözüylə oturduq, durduq. AFFA rəhbərliyi ona şərait yaradıldı. Heç bir yerli mütəxəssisə 5 il vaxt verilməyib. Gəlin baxaq, Foqts bizə bu 5 ildə nə verdi və nə aldı? Mən deyərdim ki, verdiyindən çox aldı. Birmənalı şəkildə özündə günah görməyən, Almaniyadan Azərbaycan futbolunu izləyən məşqçinin getməsini istəyirəm. Millinin baş məşqçi postuna yerli mütəxəssis gəlməlidi. Bacarıqlı məşqçilərimiz çoxdu. Yunisi, Vidadisi, Qurbanı, Arifi, Tərlanı kifayət qədər bacarıqlıdı. Bunlara şans vermək lazımdı. Bu, Foqtsun xərclədiyi pulun 10 faizinə gənc məşqçilərimizi inkişaf etdirməliyik. Əsas odu ki, inam olsun. İnam olmasa, heç bir nəticədən, irəliləyişdən söhbət gedə bilməz.
RÖVŞƏN ƏHLİMANOĞLU
- Ölkə futbolu2024-04-19 21:00
“Sumqayıt” avrokubok iddiasını davam etdirir
- Ölkə futbolu2024-04-21 11:50
Rəfiyev “Sabah” üçün plan qurub: rəqibinin rəqibini stimullaşdırır
- Ölkə futbolu2024-04-21 10:19
Yeni AFFA rəhbərliyi də əcnəbilərə üz tutdu: hər şey xorvatlara tapşırılacaq
- Ölkə futbolu2024-04-21 08:00
Andersonun dediyi kimi…