Ölkə futbolu
“Sabah”ın pauzası
“Sabah” yeni baş məşqçi təyinatı ilə bağlı …
“Sabah” yeni baş məşqçi təyinatı ilə bağlı tələsmək istəmir. Bir neçə namizədlə danışıq aparan paytaxt klubu kimi seçəcəyinə fasilə dönəmində qərar verəcək.
Futbolinfo.az xəbər verir ki, Premyer Liqanın növbəti turundan sonra ilk dövrə yekunlaşacaq. Milli komandaların oyunları ilə əlaqədar çempionatda fasilə yaranacaq. Həmin vaxt qısa istirahətə çəkiləcək klublar daxili problemlərini yoluna qoymaq üçün vaxt qazanacaq.
“Sabah” indiyədək bir neçə məşqçi ilə danışıq aparıb. Ümit Özatla bağlı xəbərlər rəsmi təsdiqini tapmayıb. Əslində, türkiyəli mütəxəssisin bakılılara uyğun biri olmadığı da sirr deyil. Əvəzində paytaxt klubunun ölkəmizə çağırdığı iki əcnəbi haqda başqa cür düşünməliyik.
“Sabah”ın mövsümdə ilk qələbəsini qazandığı “Səbail”lə ev matçını izləyənlər arasında ukraynalı Yuri Vernidub və gürcü Georgi Tsetsadze var idi. Vernidub hazırda işsizdisə, Tsetsadze Gürcüstanın U-21 yığmasına rəhbərlik edir. Onlar klub rəhbərliyinin istəyi ilə gəlmişdi və komandaya baxıb, yernidəcə danışıq aparmalıydılar.
Doğrusu, iki məşqçinin eyni məqsədlə dəvəti bir qədər qəribədi. Ən azı həmin məşqçilər bir-birinə hörmət naminə bu vəziyyətə düşməməliydilər. Lakin razılaşıblarsa, deməli, onları yalnız yeni müqavilə düşündürür.
Danışıqların gedişi sirr saxlanılır. Yalnız o bəllidi ki, klub rəhbərliyi Vernidub variantına daha çox üstünlük verir. Gəl ki, onun tələbləri həddindən artıq yüksək və qəbulolunmazdı. 3 il üçün 1,5 milyon dollar maaş istəyən ukraynalı transferlərdə də tək söz sahibi olmaq istəyir. Bu, çox risklidi, klub rəhbərliyi sponsorlarla məsləhətləşmək qərarına gəlib.
Əslində, “Sabah” islahatları vaxtında başladı. Mövsümə uğursuz start klub rəhbərliyinin yaratdığı şəraitlə, edilən transferlərlə düz mütənasib deyildi. Elşad Əhmədovun istefası tamamilə gözlənilən idi və vaxtında reallaşdı. İndi isə onu elə məşqçi əvəz etməlidi ki, komandanı hədəflərinə çatdırsın. Vernidub uğurlu biridi, zəngin karyerası var. Amma Azərbaycanda işləri alınmasa, onu yola salmaq asan olmayacaq. Əcnəbilərin təzminat məsələsində necə dəqiq olduğu hamımıza bəllidi. Üstəlik, onun etmək istədiyi transferlər də gələcəkdə komandaya yük ola bilər.
Bu səbəbdən “Sabah” qərar verməyə tələsmir. Üstəlik, müvəqqəti əvəzləyici təyin olunan İqor Ponomaryovun uğurlu debütü beyinlərdə sual yaradıb. Bəlkə elə qışa kimi Müşahidə Şurasının üzvü olan olimpiya çempionumuzla yola davam etmək daha məsləhətlidi. Ötən müddət ərzində həm əcnəbi məşqçilərlə bağlı daha dəqiq seçim edilər, həm də Ponomaryovun əsl potensialı aydınlaşar.
“Sabah”ın əcnəbi məşqçi gətirməkdə israrının səbəbi var. Əvvəla, ölkədə işsiz olan bacarıqlı məşqçilərin sayı azdı, işiylə seçilən, amma klublarla müqaviləsi olanlarla isə yalnız mövsüm yarılanarkən təmasa keçmək olar. İkinci əsas səbəb isə sponsorların mövqeyidi. Bildiyimizə görə, məhz onlar legioner mütəxəssis gətirilməsinin tərəfdarıdı.
İstənilən halda, “Sabah” dəyişikliklərə vaxtında, mövsüm əldən getməmiş əl atdı. İndi isə düzgün seçim edib, avrokuboklara vəsiqə arzusunu reallaşdırmaq olar. Klubun buna hər cür imkanı var. 3 məşqçi dəyişməsinə və bu qədər uğursuz nəticələr göstərməsinə rəğmən, komanda 2-ci pillənin sahibindən cəmi 5 xal geridədisə, deməli, düzgün seçimlərlə rahatca medallar uğrunda mübarizə aparmaq olar.
CAVAD
- Ölkə futbolu2024-04-19 21:00
“Sumqayıt” avrokubok iddiasını davam etdirir
- Premyer-liqa2024-04-19 18:26
“Turan Tovuz” “Sumqayıt”a böyük hesabla məğlub oldu
- Ölkə futbolu2024-04-21 11:50
Rəfiyev “Sabah” üçün plan qurub: rəqibinin rəqibini stimullaşdırır
- Ölkə futbolu2024-04-21 10:19
Yeni AFFA rəhbərliyi də əcnəbilərə üz tutdu: hər şey xorvatlara tapşırılacaq