Dünya futbolu
Qadzeni qaytarmağa gərək varmı?
“Zirə” yenidən Riçard Qadzeyə möhtac qalıb…
“Zirə” yenidən Riçard Qadzeyə möhtac qalıb. Qəsəbə klubu 25 yaşlı qanalı hücumçuyla müqavilə bağlamağa hazırlaşır.
Artıq Bakıda olan futbolçu mətbuata açıqlamasında birbaşa müqavilə bağlamaq üçün gəldiyini bildirib: "Zirə" ilə birbaşa müqavilə bağlamaq üçün Bakıya gəlmişəm. Əlimdən gələni edəcəm ki, komandaya ikinci qayıdışım da uğurlu olsun".
Qanalı futbolçunun qəsəbə təmsilçisi ilə müqaviləsi mövsümün sonuna qədər olacaq. Yenidən ölkəmizə qayıdışının səbəblərini açıqlayan forvard son klubu "Voluntari"də əcnəbilərə qarşı münasibətin yaxşı olmamasının qərarına təsir etdiyini söyləyib: "Zirə"dəki ilk çıxışım yaxşı alınmışdı. Burada gözəl günlərim olub. Başqa təkliflərim də var idi. Amma menecerimə inanıb, qayıtmışam. "Voluntari"də legionerlərə münasibət, daxili ab-hava yaxşı deyildi. Ora getdiyim ilk gündən mənə münasibət xoş deyildi. Buna görə Rumıniya klubunda heç bir legioner özünü yaxşı tərəfdən göstərə bilmir. "Zirə"nin avrokuboklara vəsiqə qazanması üçün əlimdən gələni edəcəm" (sportinfo.az).
Riçardın bəh-bəhlə danışması gözləniləndi. Lakin onun hansı bacarığa sahib olduğunu görmüşük. Vaxtilə “Zirə”də keçirdiyi 23 oyuna 7 qol vuran forvard, “Voluntari”də 28 matça 6 dəfə fərqlənib. Bu isə hücumçu üçün çox pis göstəricidi. İndi “qartallar”ın havada qalan belə birinə qucaq açması təəccüblüdü. Halbuki “Zirə”nin problemi hücumçu qıtlığı deyil, oyun üslubunda, komanda oyununda ciddi problemlər var.