Ölkə futbolu
Obradoviçin nağılı
Milan Obradoviç deyir ki, düzələsi çox şey var. …
Milan Obradoviç deyir ki, düzələsi çox şey var. Həqiqətdi, amma mənim həqiqətim daha gözəldi. Bəli, çox şey düzəlməlidi: Azərbaycan futbolunun idarəçiliyində, AFFA binasının daxilində, onlara dözənlərin beynində, milli komandalarda, uşaq futbolunda…
AFFA rəhbərliyinə, prezident səlahiyyətlərinə malik baş katib Elxan Məmmədova, İcraiyyə Komitəsi üzvlərinə, Məşqçilər Komitəsinin məsləhət verən üzvlərinə sualımdı: məğlubiyyətləri sıralamaq üçün mütləq əcnəbi məşqçi gətirmək lazım idi? 400 min avronu serb Obradoviçə yedirdəndə ləzzətmi alırsız? Kimdi, nə edib ki, onu milliyə baş məçqçi gətirmisiz? Ümumiyyətlə, bu futbolçu potensialı ilə bizə əcnəbi məşqçi lazımdımı?
Beləsindən özümüzdə onlarladı, hələ daha yaxşıları var. Elə Məşqçilər Komitəsində aylıq min manat maaşa papağını günə yandıranlar özü serbdən daha faydalı olardı. Ölkədə 50-dən çox PRO kateqoriyalı məşqçi həsrətlə iş gözləyir, biz isə onların ehtiyaclarını toplam ödəyəcək bir məbləği yarıtmaz serbə veririk. İş görsə, dərd yarı idi, adam aktyorluq edir.
Hazırkı U-21 son dövrlərdə bu yaş qrupundakı ən yaxşı kollektivdi, istedadlı futbolçular var, əksəriyyəti klublarında əsas heyət üzvüdü. Amma Obradoviçə nəyi sübut edəcəksən? Müqaviləsini bağlayıb, AFFA-nı sağmaqla məşğuldu. Bir söz deyən kimi hakimin 2 səhv qərarıyla yendiyimiz Slovakiyanı misal gətirir. AFFA-da da Lixtenşteyn rəzalətini, 5 tura 4 məğlubiyyəti onun gözünə soxa biləcək cəsarətdə kimsə yoxdu. Bəlkə də var, amma özləri gözükölgəlidi…
Dünən Avropa çempionatının seçmə mərhələsi çərçivəsində İsveçrəyə məğlub olduqları oyundan sonra Milan yenə cəfəngiyyat danışıb: “Planlaşdırdığımız kimi oynadıq. Amma təbii ki, hər şeyi meydanda reallaşdıra bilmədik. Nəticədən narazıyam. Komanda inkişaf istiqamətində bir addım atdı. Bütövlükdə oyunu yaxşı keçirdik. İsveçrəyə istədiyi kimi oynamağa imkan vermədik. Komandanı daha da inkişaf etdirmək üçün çox çalışmalıyıq”.
Rəqibə imkan verməməyin təpənizə dəysin. Necə imkan verməmisən ki, qol vurub, qələbə qazanıblar? İnkişaf deyib, nəyi nəzərdə tutur, görəsən? Əvvəlki oyunlarla müqayisədə daha az top vurmağımızı? “Qərarı mən verirəm” deyib, xoruzlanmaq da lazım deyil, xoruz Fransada elə “xoruzlar” tərəfindən qoltuğa verilib.
Obradoviçin inkişaf haqda açıqlamasına baxaq: “Oyunu öz qapımızdan daha irəli çəkməyi bacarmışıq. Son iki oyunda topa sahib olma ya rəqiblə bərabər olub, ya da üstün olmuşuq. Rəqibi daha irəlidə qarşılayırıq. Futbolçularla ünsiyyətdə olmağa çalışmışıq və onlara həqiqətən futbol oynamağı bacara biləcəklərini demişik. Son iki məğlubiyyətdən sonra narazı olmalı olduqlarını demişik. Artıq detallar haqda danışmağa başlamışıq. Düzələsi çox şey var, həm müdafiədə, həm də hücumda. Və oyun ərzində daha çox əlaqədə olmaqda”.
Deyəsən, Berti Foqts, Bernard Lippert haqda eşidib, onlara ölkəmizdə necə qayğı göstərildiyini, heç bir iş görmədən uzunmüddətli müqaviləylə təmin edilmələrini Obradoviçə də çatdırıblar. Bu adam hələ futbolçuları qapıdan uzaqlaşdırır, növbəti 3-4 oyunu mərkəzə çatmağa həsr edər, sonra da tsiklin sonunda hücum barədə düşünər. Həmin vaxt yeni komanda qurmaq lazım gələcək və Milan da yeni komandanı qurmaq üçün yenə sıfırdan başlayacaq. Beləcə illər ötəcək, əcnəbilər pulunu qazanacaq, gedəndə də heç nəyin alınmadığını deyəcəklər.
AFFA rəhbərliyi başlarını ciblərindən çıxarmağa vaxt tapmadığından anlamaya bilər, amma daha yuxarı dairələr ölkədəki futbol siyasətinə əl gəzdirməlidi. Bizdə milli komandalara əcnəbi məşqçi lazım deyil, əvvəlcə futbolçu yetişdirməliyik. Futbolçunu isə millidə yetişdirmirlər. Klublara, cəmiyyətlərə, akademiyalara təcrübəli məşqçilər gətirilməli, həm futbolçu, həm də yerli məşqçi kadrların yetişdirilməsinə çalışmaq lazımdı. Yalnız sistem qurulduqdan, material hazırlandıqdan sonra millinin nəticələrini yaxşılaşdırmaq haqda düşünə bilərik. İndi Obradoviçə və digər əcnəbilərə verilən pullar havaya sovrulur. Quyuya su tökməklə quyu olmaz. Və ya “üstü bəzək, altı təzək”lə özümüzü aldadacağıq.
Dünən Lixyenşteynə, bu gün İsveçrəyə uduzuruq, əsas olan SABAHın özünü uduzmamaqdı! Obradoviçin dediyi kimi – düzələsi çox şey var. Amma “düzəltməyə” elə serbin özündən başlamaq lazımdı.
AĞA
- Ölkə futbolu2024-04-13 08:35
Leandro Azərbaycan dilini öyrənib: “Qarabağ”da yaşadıqlarım mənim üçün gözəl hekayədir”
- Premyer-liqa2024-04-13 20:52
“Neftçi” “Araz-Naxçıvan”ı darmadağınla yola saldı
- Milli komanda2024-04-12 18:00
Millinin Gürcüstanla oyunlar üçün heyəti açıqlandı
- Premyer-liqa2024-04-12 20:56
“Sumqayıt”la “Zirə”dən heç-heçə