Elxan Məmmədova Nikola Yurçeviçdən şikayət – Millidə “üsyan”

AÇ-2020-nin seçmə mərhələsi çərçivəsində keçirilmiş Macarıstan – Azərbaycan matçının üstündən günlər keçsə də, hələ də bir çoxları niderlandlı Dennis Hiqlerin Bəhlul Mustafazadənin qolunu saymamasından danışır. Yığmamızın düşərgəsində nələrin baş verməsindən isə ictimaiyyət, demək olar ki, xəbərsizdi.

Futbolinfo.az xəbər verir ki, sportinfo.az-a bu barədə olduqca ilginc, şok effekti doğuracaq yeni məlumatlar daxil olub. Belə ki, Budapeşt səfərindən öncə və sonra Nikola Yurçeviçlə bağlı ciddi problem yaşanıb. Əksər futbolçular baş məşqçidən AFFA mənsublarına, konkretləşdirsək, baş katib Elxan Məmmədova şikayətlənib.

Onlar xorvatiyalı mütəxəssisin işə yanaşmasından, kollektivə münasibətindən narazılıq edib, bildiriblər ki, Yurçeviçin məşq prosesi və seçdiyi taktika komandaya ziyan vurur:

"O, bizlərə barmaqarası baxır. Məşqlərdə ciddi heç nə etmirik. Rəqiblərin analizi üzərində çox dayanmır, bizi səthi başa salır. Nizam-intizama çox fikir vermir. Çox yumşaqdır. Oyun vaxtı səsini eşitmirik. Bizə necə oynamalı olduğumuzu əvvəlcədən dəqiqliyi ilə başa salmır, motivasiya vermir. Elə onu deyir ki, müdafiə olunmaq, çox qol buraxmamaq lazımdır. Biz artıq belə oynamaq istəmirik".

Məlumata görə, baş katib bu fikirlərin bir çoxuyla razılaşıb. Elxan Məmmədov Cavid Hüseynovdan komandanı bir yerə toplamağı xahiş edib və deyib ki, onları ruhdan düşməyə qoymasın. AFFA rəsmisi qarşıdan Uels və Slovkiya ilə oyunların gəldiyini xatırladaraq, nəticə qazanmağın vacibliyinə diqqət çəkib.