Aylton APOEL-lə matçların həlledici olacağı ilə razılaşır: “İstər-istəməz acı xatirə qalıb”

“Qarabağ”ın braziliyalı legioneri Aylton Silvanın futbolinfo.az-a müsahibəsi

– “Qəbələ” ilə matçda xal itkiniz gözlənilməz oldu…
– Ora qələbə üçün getmişdik. Məqsədimiz 3 xalı əldə etmək idi. Təəssüf ki, istəyimiz reallaşmadı. Amma sona qədər mübarizə apardıq. Sona qədər qalibiyyət topunu vurmaq üçün çalışdıq. Lakin rəqib müdafiədə inadkar idi. Nəticədə 1:1-lik heç-heçə etdik.

– Bu xal itkisi komandaya pis təsir etməyəcək? Ardıcıl 7 oyunluq qələbə seriyasından sonra…
– Qətiyyən belə düşünmürəm. Bunun bizə mənfi təsiri olmayacaq. Hər matça qalibiyyət üçün çıxırıq. Hər dəfə çox ciddi hazırlaşırıq. Amma istədiyinizi hər zaman edə bilmirsiniz. Çalışacağıq ki, qarşıdakı oyunumuz daha uğurlu olsun. APOEL-lə matçda qalib gəlməyə çalışacağıq.

– APOEL-lə oyuna komanda hazırdı?
– Əlbəttə ki, hazırıq. Neçə aydı ki, bir yerdə məşq edirik və çalışırıq ki, uğur qazanaq. Bu oyuna köklənmişik. Bütün konsentrasiyamızı əhəmiyyətli matça yönəltmişik. Maksimum nəticə qazanmalıyıq. Bunu bacaracaq gücümüz var.

– Bu qarşılaşmanı qrupdan çıxmaq üçün ən vacib matç adlandırmaq olar? Hər kəs düşünür ki, APOEL-lə matçlar həlledici olacaq…
– Tamamilə razıyam. Təbii ki, qrupda “Düdelanj” da var. Lakin mən də bu fikirlərlə razıyam ki, qrupda ikincilik uğrunda mübarizəmiz APOEL-lə olacaq. Onları əsas rəqibimiz saymaq olar. Ona görə də bütün diqqətimizi yönəltmişik ki, Kipr klubu üzərində qələbə qazanaq, onlardan xallar alaq. İşimizi daha da asanlaşdıraq.

– Çempionlar Liqasında sizi məğlub edən APOEL-lə qarşı qisas hissi varmı?
– İstər-istəməz həmin oyunlardan bizdə pis xatirə qalıb. Baxmayaraq ki, onlara qarşı hər iki oyunda yaxşı çıxış etmişdik. Təəssüf ki, rəqib mərhələ adlamışdı. Həmin matçlardakı acı nəticələr bizim bu qarşılaşmaya daha çox motivasiya olmağımıza səbəbdi. Yəni daha çox köklənməliyik.

– APOEL-i udan “Düdelanj” üzərində inamlı səfər qələbəsi qrupdan çıxmaq üçün ümidləri artırıb…
– “Düdelanj”la səfər oyunu bizim üçün yaxşı alındı. İstədiyimiz oyunu göstərə bildik və böyükhesablı qələbəyə sevindik. Düşünürəm ki, o matçda daha çox qol vurmaq imkanımız var idi. Məyusedici məqam isə qarşılaşmanın sonlarında qol buraxmağımız idi. İstənilən halda 3 xal önəmlidi, çox qol vurmaq yox. Artıq “Düdelanj”la matç çox arxada qalıb. Növbəti matçlara daha yaxşı köklənmək lazımdı. Komandamızın yaxşı potensialı var, qrupumuz da nosbətən əlverişlidi və növbəti mərhələyə çıxmaq şansımız var. Lakin qarşıdakı oyunlardan yaxşı nəticə qazanmaq lazımdı ki, arzumuzu reallaşdıraq.

FƏRİD